Կոալիցիոն հուշագրերի տեքստերը ՀՅԴ-ն է մշակել, դրանք մեր սեփականությունն են. Ա. Համբարձումյան

դեկտեմբերի 3, 2018

Հարցազրույց ՀՅԴ ԳՄ ներկայացուցիչ Արսեն Համբարձումյանի հետ

-Պարոն Համբարձումյան, ինչպե՞ս եք գնահատում հետհեղափոխական կես տարին:

-Հույսեր, սպասումներ, անցյալի մերժումներից հետո դրական փոփոխություններ տեսնելու ակնկալիքներ կային, որոնք մեծ հաշվով չարդարացան: Ցավոք, ծրագրային քաղաքականության առումով էական քայլեր չեն արվել: Այն կադրային ռեսուրսը, որի վրա անցնող ամիսների ընթացքում փորձում էր հենվել իշխանությունը, հաջողության հույսեր չի ներշնչում: «Մերժիր Սերժին» ժողովրդական շարժման նպատակը անցյալի հոռի բարքերը, կոռուպցիան, թալանը մերժելն էր, բայց թե այդ մերժումից հետո ինչ պետք է կառուցվի և ինչպես՝ պատասխանն անհայտ է:

-Ինչո՞ւ է ՀՅԴ-ն ուզում դարձյալ հայտնվել Ազգային ժողովում:

-Քաղաքական կյանքում լուրջ դերակատարում ունեցող ուժը խորհրդարանական հարթակն ունենալով՝ կարող է ավելի արդյունավետ գործունեություն ծավալել: Մենք ծրագրային գաղափարական մոտեցումների հստակ տարբերություններ ունենք: Այն գաղափարները, նպատակները, որոնք ունի ՀՅԴ-ն, կարևոր են երկրի զարգացման համար: Դա նշանակում է, որ ԱԺ-ում ՀՅԴ-ի ներկայացվածությունը շատ կարևոր է:

-Որո՞նք կլինեն Ձեր առաջին երեք օրենսդրական նախաձեռնությունները նոր խորհրդարանում:

-ՀՅԴ-ն միակ քաղաքական ուժն է, որ դավանում է սոցիալիզմին և սոցիալական արդարությանը: Պետության սոցիալ-տնտեսական քաղաքականությունը ենթակա է արմատական փոփոխության: Այդ առումով բազմաթիվ օրենսդրական նախաձեռնությունների անհրաժեշտությունկա: Կենսաթոշակային ոլորտում դա վերաբերում է պայմանական և ոչ թեպարտադիր կուտակային կենսաթոշակային համակարգի ներդրմանը: Կենսաապահովման նվազագույն զամբյուղի վերաբերյալ դեռևս տարիներ առաջ ընդունված և չգործադրված օրենքը նոր պայմաններում նոր մոտեցումների և օրենսդրական նախաձեռնությունների անհրաժեշտություն ունի: Օրենսդրական նախաձեռնությունների կարիք կա նաև բիզնեսի աջակցման և գյուղատնտեսության ոլորտի զարգացման համար:

-Բյուջետային մեծ մուտքեր հանքարդյունաբերությա՞մբ, թե՞ համեստ բյուջե՝ առանց հանքարդյունաբերության:

-Միշտ էլ կարելի է ոսկե միջինը գտնել, բայց Հայաստանում հանքարդյունաբերության ոլորտում խայտառակ վիճակ է: Հստակ չափորոշիչներ պետք է սահմանվեն և վայրի թալանին պետք է վերջ տալ: Մենք կարևորում ենք նաև սերունդների համերաշխությունը. այսօրվա սերունդը որևէ բարոյական իրավունք չունի մսխելու մեր ազգային հարստությունը: Երկրում ունենք գործազրկության բարձր մակարդակ, իսկ հանքարդյունաբերությունը համակարգաստեղծ ճյուղ է: Այդ պատճառով էլ պետք է այնպիսի լուծումներ գտնել, որ էկոլոգիական ստանդարտները պահելով՝ փորձենք ոլորտը զարգացնել:

-Կա՞ Սահմանադրությունը նորից փոխելու անհրաժեշտություն:

Եթե խոսքը վերաբերում է պետական կառավարման համակարգին, ապա փոփոխությունների անհրաժեշտություն չենք տեսնում: Եթե այլ իրավակարգավորումների դեպքում ինչ-որ դրույթների հստակեցման խնդիր կա, պատրաստ ենք քննարկել: Բայց մեծ հաշվով Սահմանադրությունը նորից փոխելու անհրաժեշտություն չկա:

-Եթե ընտրության հարց դրվի՝ Ե՞Մ թե՞ ԵԱՏՄ, ո՞րը կընտրեք:

-Մենք մշտապես հանդես ենք եկել և-և-ի քաղաքականության դիրքերից, ցանկացած կամ-կամ-ի իրավիճակում մենք կունենանք լրջագույն մարտահրավերներ: Կարծում եմ արտաքին քաղաքական ոլորտում որդեգրված ուղեգիծը տարիների ընթացքում իրեն արդարացրելէ, և այն պետք է շարունակել: Այլ խնդիր է, որ պետք է այդ քաղաքականության արդյունավետությունը բարձրացնել: Անցնող ամիսներին այդ ուղղությամբ որևէ շոշափելիք քայլ չենք տեսել. թե ԵԱՏՄ-ի, թե ԵՄ-ի և թե ԱՄՆ ուղղությամբ ՀՀ քաղաքականությունը նախաձեռնությամբ չի փայլել:

-Ղարաբաղյան հակամարտության հնարավորինս արագ կարգավորո՞ւմ, թե՞ ստատուս քվոյի պահպանում՝ հայանպաստ լուծման սպասումով:

ՀՀ-ն կարող է և պետք է զարգանա առանց զիջելու մեր համազգային ձեռքբերումները: Արցախը մեր պատմական հայրենիքի անբաժանելի մասն է: Չկա առանձին վերցրած ԼՂ խնդիր, դա Հայ դատի բաղկացուցիչ մասն է, և Արցախը համարում ենք ՀՀ անբաժանելի մասը: Այդ թվում՝ բոլոր ազատագրված տարածքները: Այս առումով Արցախի հարցում թե՛ իշխանությունների, թե՛ մյուս քաղաքական ուժերի մոտեցումները պետք է որոշակի վերանայումների ենթարկվեն, կիսատ-պռատ լուծումներով չենք կարող առաջ գնալ: Կան իրողություններ, որոնց հետ պետք է հաշվի նստել՝ Արցախի ժողովուրդը կարողացել է իր ինքնորոշման, ազատ ապրելու իրավունքը պատերազմով նվաճել, և այդ իրավունքը պետք է պաշտպանել:

-ՀՅԴ-ն ունի՞ արտահերթ ընտրություններում անցողիկ շեմը չհաղթահարելու մտավախություն: Սոցհարցումները ձեզ համար մոտ 2 տոկոս են կանխատեսում: Եվ ի՞նչ եք անելու, եթե դուրս մնաք ԱԺ-ից:

-Մեր կանխատեսումները բոլորովին այլ են: Վստահեցնում եմ, որ այդ հարցումներից մի քանի անգամ ավելի ձայներ ենք ստանալու: Իսկ հիմնական գործոնը, որը դժվարացնում է կանխատեսումներ անելը, մասնակցության խնդիրնէ: Դա էական ազդեցություն կունենա նաև արդյունքների վրա: Ես դա ասում եմ՝ նկատի ունենալով թե՛ Երևանի ավագանու, թե՛ ՏԻՄ ընտրություններին մասնակցության ցածր ցուցանիշը: Իսկ չանցնելու տարբերակը չենք դիտարկում, մեր հնարավորությունները բարձր են, թեև քաղաքականության մեջ ոչ մի բան պետք չէ բացառել: Որպես կազմակերպական ներուժ ունեցող կուսակցություն՝ շարունակելու ենք մեր ճանապարհը՝ ի տարբերություն մյուսների, որոնց դեպքում հաճախ ենք տեսել, թե ինչքան արագ են ստեղծվում ու հեռանում:

-ՀՅԴ-ի կողմից անսկզբունքայնություն չէ՞ր կոալիցիա կազմել ՀՀԿ-ի հետ, վարչապետի պաշտոնում ընտրել ՍերժՍարգսյանին, երկու շաբաթ անց դուրս գալ կոալիցիայից ու այդ պաշտոնում ընտրել ՀՀԿ-ի մրցակից ՆիկոլՓաշինյանին, միանալ նրա գլխավորած կառավարությանը:

-Ամենևին ոչ:

-Ստացվում է, որ ՀՅԴ-ի սկզբունքը իշխանության հետ լինե՞լն է:

-Ոչ: ՀՅԴ-ն իր ծրագրերը, մոտեցումներն ու առաջնահերթությունները փոխե՞լ է, թե՞ տեղի է ունեցել հակառակը: Մենք եղել ենք կոալիցիաների մեջ, այսօր էլ պատրաստ ենք մեր ստորագրությունը պնդել ցանկացած կոալիցիոն հուշագրի տակ, որովհետև դրանց տեքստերը մշակվել են ՀՅԴ-ի կողմից, դա մեր սեփականությունն է: Իսկ եթե այլ ուժեր հանգել են ՀՅԴ-ի տեսակետներին, դա իրենց խնդիրն է: 2012թ. երբ ՀՅԴ-ն հանդես եկավ 7 կետերով՝ կարևորելով պետական կառավարման համակարգի փոփոխությունները, ՀՀԿ-ն կտրուկ դեմ էր դրան, այդ թվում՝ Սերժ Սարգսյանը: Անցավ ժամանակ, և նանք եկան այն դաշտը, որտեղ մենք էինք կանգնած: Նույնն էլ վերաբերում է Նիկոլ Փաշինյանի հետ համագործակցությանը: Երբեք մեր մասնակցությունը իշխանությանը չենք պարտադրել, հակառակը, մեզ են հրավիրել: Ընդ որում միշտ չէ, որ մենք ընդունել ենք այդ հրավերը: Նույն Սերժ Սարգսյանի կառավարման օրոք կոալիցիաների մեջ ենք եղել ընդամենը 3 տարի:

-Ուրեմն, որտեղի՞ց է ծագել ՀՅԴ-ին բնորոշող հայտնի խոսքը՝ կողմ ըլալով դեմ են կամ դեմ ըլալով՝ կողմ են:

-Դա կեղծ թեզ է: Ինչ է ասել ՀՅԴ-ն, ինչ են ասել ուրիշները նախկինում ու հիմա ԵՏՄ-ի, ԵՄ-ի, Արցախի մասին: Հիշեք, թե ինչ են ասել Նիկոլ Փաշինյանն ու իր թիմը և ինչ են ասում հիմա: Ո՞վ է պարտադիր կուտակային համակարգի ներդրման դեմ «Դեմ եմ» շարժումը նախաձեռնել ու հիմա հանկարծ իշխանություն լինելով՝ փորձում հակառակ տեսակետը առաջ տանել:

Սասնա ծռերի»-ի հայտ գալով՝ ՀՅԴ-ն չի՞ կորցնում իր մենաշնորհը ազգային հարցերում:

-Լո՞ւրջ եք ասում: Ուշադիր նայեք «Սասնա ծռերի» ցուցակը. այնտեղ ներկայացված մարդիկ որքանո՞վ են համապատասխանում իրենց հռչակած գաղափարներին: Ես այնտեղ ոչ Սասունցի Դավիթ եմ տեսնում, ոչ Ձենով Օհան, ոչ էլ Քեռի Թորոս: Դուք այնտեղ բազմաթիվ բացասական կերպարների կտեսնեք: Ովքեր Սասնա ծուռ կոչվելու հավակնություն ունեին, այնտեղ չեն, օրինակ՝ Պավլիկ Մանուկյանը: Եվ հանկարծ այդ թիմում են հայտնվում Պետրոս Մակեյանը և Ստեփան Գրիգորյանը: Ինչ վերաբերում է օրակարգերին, ապա դրանք տարբեր են: Թե՛ արտաքին քաղաքական կողմնորոշման, թե՛ ներքաղաքական հարցերը լուծելու նրանց մարտավարությունը մեզ համար մերժելի է: Նրանց որդեգրած մոտեցումները արկածախնդրություն են: Ի՞նչ է նշանակում՝ Արցախի ընտրված նախագահին համարել խամաճիկ կամ Արցախի իշխանությունների հասցեին այնպիսի գնահատականներ հնչեցնել, որոնք բխում են Ադրբեջանի շահերից, առանց այլընտրանքը ձևավորելու՝ ռուսական ռազմաբազայի՝ օր առաջ հեռանալու պահանջ դնել և, վերջապես, ի՞նչ է նշանակում՝ զենքի ուժով սեփական երկրում քաղաքական հարցեր լուծել: