Մեզ սուպերվարչապետական համակարգ պետք չէ. Գ. Գորգիսյան

դեկտեմբերի 21, 2018

Հարցազրույց «Լուսավոր Հայաստան» կուսակցության ցուցակով պատգամավոր ընտրված Գևորգ Գորգիսյանի հետ;

-Պարոն Գորգիսյան, ինչո՞ւ ԲՀԿ-ի հետ փոխադարձ քննադատությունների դաշտ մտաք:

-Էդմոն Մարուքյանը տվել է բոլոր պատասխանները. օլիգարխիան պետք է հեռացվի քաղաքականությունից։ Բիզնեսմենը պետք է բիզնեսով զբաղվի և չապականի քաղաքական դաշտը։ Պարոն Ծառուկյանը շատ ծանր է տարել ասվածը և փորձում է ռևանշ վերցնել, հարվածել մեզ, բայց դա մեր օրակարգը չէ, մենք լուրջ օրակարգ ունենք։

-ԲՀԿ-ն Էդմոն Մարուքյանին մեղադրում է 2012թ. խորհրդարանական ընտրություններին մասնակցելու համար Հայաստանում մշտական բնակության մասին կեղծ տեղեկանք ներկայացնելու մեջ։

-Ազգային ժողովում նախագահ Սերժ սարգսյանի ներկայացուցիչ Վիկտոր Դալլաքյանը ընտրություններում պարտվեց Էդմոն Մարուքյանին: Եթե նա պարոն Մարուքյանին մանդատից զրկելու որևէ իրավական տարբերակ ունենար, կարծում եք՝ այդ քայլին չէ՞ր գնա։ Չի կարելի 2012 թվականից նույն թեման բարձրացնել, բայց այդ ուղղությամբ որևէ բան չանել: Դա ծիծաղելի է, հիմարություն է, տգիտություն։

-Կարծիք կա, որ դուք և ԲՀԿ-ն զգուշանում եք իշխանություններին քննադատելուց ու դրա համար քննադատում եք միմյանց, որ գոնե այդպես ընդդիմադիր կեցվածք դրսևորեք։

-Դա նույնպես սուտ է, մենք հայտարարել ենք, որ լինելու ենք ընդդիմություն և, հարկ եղած դեպքում, ամենասուր կերպով քննադատելու ենք իշխանություններին։ Դա ուղղակի մեր հիմնական գործառույթից մեզ շեղելու փորձ է։ Չեմ կարծում, թե այդպիսով հնարավոր է որևէ բան ընդգծել, մենք ունենք մեր օրակարգը, և առաջիկայում դա կտեսնեք։

-ԲՀԿ-ն էլ, հավանաբար, իշխանության մաս չի կազմի և կգործի ընդդիմադիր դաշտում: Դուք խորհրդարանում չե՞ք համագործակցելու։

-Բայց նրանք չեն հայտարարել, որ ընդդիմություն են, ամբողջ խնդիրն այն է, որ իրենք էլ վստահ չեն, թե ինչ են լինելու։ Նրանք հայտարարում են, թե մենք չենք կարող ընդդիմանալ Նիկոլ Փաշինյանին։ Կամ այնքանով են լինելու ընդդիմություն, որքանով եղել են Սերժ Սարգսյանի օրոք՝ բոլոր կարևոր հարցերում կողմ քվեարկելով՝ ԱԺ նախագահից մինչև Սերժ Սարգսյանի ընտրությունը վարչապետի պաշտոնում։

-Այնուամենայնիվ ԱԺ-ում ԲՀԿ-ի հետ համագործակցության եզրեր տեսնո՞ւմ եք:

-Եթե իշխանության մաս չկազմեն, մենք հինգ տարի միասին ենք աշխատելու: Զարմանում եմ անձնական դաշտ մտնող նրանց մեկնաբանություններից, որ մեր հասցեին անում են: Եթե ավելի կոպիտ չարտահայտվեմ, դրանք առնվազն քաղաքական չեն:

-Հայտարարում եք, որ եթե Ծառուկյանի թիկնապահ Էդիկ Բաբայանը ռեյտինգային ընտրակարգով չառաջադրվեր, ԲՀԿ-ի փոխարեն ձեր կուսակցությունը երկրորդ տեղում կլիներ. Իսկապե՞ս այդպես եք կարծում:

-Հարցը անունը կամ մարդը չէ, հարցը երևույթն է: Ընտրապայքարը տոտալ ապաքաղաքական էր: Կարո՞ղ եք ասել, թե Գագիկ Ծառուկյանի թիկնապահին ինչու են այդքան ձայն տվել: Կան խոսակցություններ, որ տարբեր ազդեցություններ են եղել: Օլիգարխիան հարստություն ձեռք է բերել` օգտագործելով իր իշխանությունը: Այդ մարդիկ ունեցել են ապօրինի ճանապարհներով ձեռք բերված հարստություն: Եվ այդ հնարավորությունները կիրառվել են նաև վերջին ընտրությունների ժամանակ: Երևանում, որտեղ ապրում է սոցիալապես պակաս խոցելի և ավելի բարձր քաղաքական գիտակցություն ունեցող խավը, ԲՀԿ-ն չորրորդ քաղաքական ուժն էր: Նրանք ավելի շատ ձայն են հավաքել հիմնականում այն քաղաքներում, որտեղ սոցիալական վիճակը ավելի ծանր է:

-Կարծում եք ընտրություններին գումա՞ր է բաժանվել:

-Այդ ուղղությամբ բազմաթիվ հրապարակումներ ու ահազանգեր են եղել, որոնք արդեն փոխանցվել են իրավապահ մարմններին: Ես հույս ունեմ, որ մենք շուտով որևէ արդյունք կունենանք:

-Նոր խորհրդարանում ի՞նչ նախաձեռնություններով եք հանդես գալու։

-Որպեսզի ի վերջո մեր երկրում կայանա խորհրդարանական կառավարումը, առաջին հերթին պետք է գործի փոխզսպումների մեխանիզմը, ինչը հիմա կաղում է։ ԱԺ կանոնակարգ օրենքում, նույնիսկ Սահմանադրության մեջ ունենք հանրաքվե չպահանջող դրույթներ, որտեղ որոշակի փոփոխություններ կառաջարկենք։

-Ի՞նչ փոփոխություններ։

-Դեռ վաղ եմ համարում այդ մասին խոսելը։ Բացի այդ հանրային ֆինանսների կառավարման ոլորտում նույնպես բավականին բացեր կան։ Ունենք Հաշվեքննիչ պալատ, որն օժտված չէ բավարար մասնագետներով, և ԱԺ-ն այդ մարմնին վերահսկելու բավարար գործիքներ չունի։ Այդ մարմինը խորհրդարանի ձեռքում պետք է գործիք լիներ պետական բյուջեի գումարները վերահսկելու համար, որպեսզի դրանք նպատակային ծախսվեն։ Հաշվեքննիչ պալատը կազմավորվել է մեկ տարի առաջ, բայց ունի զրո արդյունք։ ԱԺ հաշվետվություններ չեն ներկայացվել։ Այդ մարմնում 2022թ. հետո պետք է բոլորը հաշվեքննողներ լինեն: Չորս տարի կունենանք մի մարմին, որի վրա բյուջեից գումարներ կծախսվեն, բայց որը որևէ արդյունք չի տա, քանի որ չունի մասնագետներ։ Այս դրույթը նույնպես պետք է փոխվի: Տնտեսական ոլորտում բարեփոխումներ իրականացնելու համար Հարկային օրենսգրքում փոփոխություններ կառաջարկենք: Գործող օրենսգիրքը գրվել է ստվերային տնտեսության համար, նոր իրավիճակում երբ մեր քաղաքացիները հակված են չխախտելու օրենքները, այն չի կարող աշխատել։

-Փոխզսպումների մեխանիզմների դեպքում վարչապետի լիազորությունները հավասարակշռող նախագծեր կառաջարկե՞ք։

-Միանշանակ, որովհետև մեզ սուպերվարչապետական համակարգ պետք չէ, մեզ պետք է նորմալ խորհրդարանական երկիր իր բոլոր ինստիտուտներով։ Եվ փոփոխությունների առաջնահերթություններից մեկն էլ այնն է, որ Ոստիկանությունը, ԱԱԾ-ն ու Պետական պահպանության ծառայությունը հաշվետու լինեն խորհրդարանին։ Սրանք անմիջապես վարչապետին ենթակա կառույցներ են, բայց նույնը վերաբերում է նաև կառավարությանն առընթեր մարմիններին, որովհետև չպետք է որևէ մարմին դուրս լինի խորհրդարանի վերահսկողությունից։