Իշխանություն-ընդդիմություն լարվածություն չկա. Մ. Հայրապետյան

մարտի 7, 2019

Հարցազրույց ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նախագահ Մխիթար Հայրապետյանի հետ

-Դուք հայտարարեցիք, որ կընդունեք ընդդիմության ներկայացրած բոլոր օրինագծերը, որոնք կբխեն քաղաքացու շահերից: Ուրեմն, ինչո՞ւ «Արհեստակցական միությունների մասին օրենքում» լրացումներ առաջարկող ԲՀԿ-ի նախագիծը լիագումար նիստերի օրակարգ չընդգրկեցիք:

-Այս պահին առաջարկում եմ չմտնել բովանդակային քննարկման մեջ: Եղել են նախագծի վերաբերյալ որոշ վերապահումներ, և գլխադասային հանձնաժողովում մեր ընդդիմադիր գործընկերներն անգամ ըմբռնումնով են ընդունել այդ վերապահումները և նշել, որ դեռ անելիքներ կան:

-Հնարավո՞ր է՝ այդ նախագծի հիմքում արհեստակցական միությունները քաղաքական նպատակներին ծառայեցնելու խնդիր եք տեսել:

-Այս պահին զերծ կմնամ նման մեկնաբանություններից:

-Ինչո՞ւ են այս քառօրյայի օրակարգում նախագծերն այսքան քիչ, և չկա կառավարության ներկայացրած որևէ օրինագիծ:

-Սրանք այն օրինագծերն էին, որոնք մեր գործընկեր խմբակցությունները օրակարգ էին բերել նախորդ գումարման Ազգային ժողովում, բայց պատգամավորների չներկայանալու և այլ պատճառներով չէին քննարկվել: Սրանք պատրաստի նախաձեռնություններ էին, իսկ առաջիկա լիագումար նիստերում «Իմ քայլը» խմբակցությունից բավական շատ նախաձեռնություններ են լինելու: Իսկապես ծանրակշիռ և համակարգային փոփոխություններ բերող նախաձեռնություններով հանդես գալու համար ժամանակ է հարկավոր: Ես ամբիոնից հայտարարեցի, որ աշխատանք ենք տանում տարբեր պատճառներով բանակում չծառայած մեր 11 հազար հայրենակիցների խնդիրը փաթեթով լուծում համար, բայց այդ լուծումը գտնելու համար ժամանակ է պետք: Պետք է աշխատել նաև կառավարության ու սփյուռքի կառույցների հետ:

-Բայց 7-րդ գումարման ԱԺ-ն աշխատանքն սկսել է հունվարի 14-ից, և, փաստորեն, ձեր խմբակցությունն ու կառավարությունն այս երկուսուկես ամսում չաշխատեց այնպես, որ այս քառօյայում նման մեկ-երկու նախագիծ ընդգրկվեր:

-Այն նախագիծը, որի մասին խոսում եմ, գուցե կես տարի ժամանակ կպահանջի: Եթե Դուք գաք Ազգային ժողով, կտեսնեք, որ մեր խմբակցության անդամները առավոտից երեկո աշխատում են: Որևէ օրինագիծ ինքնանպատակ չէ, մենք պոպուլիզմով զբաղվելու և հանրության վստահությունը շահելու խնդիր չունենք: Մեր նպատակը խնդիրներ լուծող նախագծեր ներկայացնելն է, և շուտով գործադիրից մի քանի նախաձեռնություններ կգան:

-Իսկ կառավարության կառուցվածքի փոփոխության մասին նախագիծն ի՞նչ եղավ. Կառավարության նիստում այն դեռ չի քննարկվել և ԱԺ չի ուղարկվել:

-Չեմ մեկնաբանի:

-Վարչապետ Նիկոլ Փաշինյանը անընդհատ հայտարարում է, որ եկել է տնտեսության մեջ հեղափոխություն անելու ժամանակը: Այդ նպատակին ծառայող ի՞նչ նախագծեր եք ներկայացնելու:

-Ես կխոսեմ այս նստաշրջանում քննարկվող նախագծերի մասին:

-Ընդդիմությունն ասում է, որ դուք քննադատություն լսել չեք կարողանում, ի պատասխան՝ կոպտում կամ հեգնում եք: Այսօր էլ Դուք սթափության կոչ արեցիք, հորդորեցիք ձեզ հետ շփվելիս «դեմագոգիկ հայտարարություններ չանել», Արեն Մկրտչյանն էլ ընդդիմադիրներին հորդորեց գնալ կոռեկտության դասընթացների:

-Իշխանություն-ընդդիմություն որևէ լարվածություն չկա: Ավելին, տեսաք, որ «Պարտադիր զինծառայության մասին» օրինագծի շրջանակում նույնիսկ համագործակցություն եղավ: Ինչ վերաբերում է «Լուսավոր Հայաստան» խմբակցության քարտուղար Գևորգ Գորգիսյանի ելույթին, այո, ես այն որակել եմ դեմագոգիկ: Դա ակնհայտ դեմագոգիա էր, ինչու ոչ` նրա խոսքը լի էր նաև մանիպուլացիաներով, քանի որ իմ խոսքերը նենգափոխվել էին: Ես չէի հայտարարել, թե ընդդիմությունը քաղաքացու շահերից չբխող հայտարարություններով է հանդես գալիս: Հակառակը, ես իմ ելույթում բավականին դրական էներգիա էի դրել` ասելով, թե նախկինից եկած պրակտիկան մեզ համար ընդունելի չէ, երբ իշխանությունը մերժում էր ընդդիմության հաջողված նախագծերը, հետո երկու-երեք փոփոխություն անում ու ինքն էր ներկայացնում: Ես իմ ելույթներում շեշտել եմ, որ հեղինակները մեր ընդդիմադիր գործընկերներն են ու նրանց շնորհակալություն եմ հայտնել լավ նախաձեռնություններ բերելու համար:

-Նախորդ խորհրդարաններում քննարկվող նախագծերի ավելի քան 90%-ը կառավարությունն է ներկայացրել: Կարո՞ղ եք ավելացնել ԱԺ-ի նախաձեռնությունների թիվը:

-Ես հստակ տպավորություն ունեմ, որ օրենսդիրի այսպիսի ակտիվ գործունեության արդյունքում այդ հարաբերակցությունը որոշակիորեն կխախտվի: