Սպասում էին, որ մեկ օրում ամեն ինչ կփոխվի, բայց չարիքի չափը չէին գնահատել.Ս. Հովսեփյան

մարտի 26, 2019

Հարցազրույց «Իմ քայլը» խմբակցության պատգամավոր Սոֆյա Հովսեփյանի հետ:

-ԱԺ վերջին նիստերի օրակարգը շատ արագ սպառվեց. կազմված էր ընդամենը 2 հարցից: Ինչո՞ւ էր օրակարգն այսքան աղքատիկ:

-Այդ օրինագծերը նախորդ գումարման խորհրդարանի պատգամավորների հեղինակած օրինագծերն էին: Այսինքն, դրանք գրեթե պատրաստ էին: Այս գումարման պատգամավորներից Հովհաննես Հովհաննիսյանն է Գովազդի մասին օրենքում փոփոխությունների նախագիծ ներկայացրել, որին հանձնաժողովը դրական եզրակացություն է տվել: Ինքս այս պահին ուսումնասիրում եմ հեռուստաեթերը մաքրելու, ցենզուրայի միջազգային փորձը, տեսնենք՝ աշխարհում ինչ կա և ինչպիսի հետաքրքիր ձև կարող ենք գտնել՝ հայկական հեռուստաեթերը մաքրելու համար: Օրենքը մեկ վայրկյանում չի գրվում, ու եթե մարդիկ մտածում են, որ օրենքներ գրելը հեշտ է, պետք է հիասթափեցնեմ՝ այդպես չէ:

-Այս օրերին մշտական հանձնաժողովներում քննարկվում է 2018-ի հունիսին ընդունված կառավարության ծրագիրը: Ի՞նչ եք կարծում, կատարվե՞ց այդ ծրագիրը:

-Կառավարության ծրագիրը ոչ թե մեկ օրում, այլ 5 տարում կատարվելիք ծրագիր է: Կարևոր է, որ տարբեր ոլորտների զարգացման առումով անելիքները, որ նշված են ծրագրում, կատարվեն: Այս օրերին խորհրդարանում քննարկվում են նաև Հայաստան ներդրումային ծրագրեր բերելու, ներդրումային դաշտը բարելավելու հարցերը: Սա դնել կառավարության ուսերին ու ասել՝ ինչպես գրել եք, այնպես էլ գտեք ձևերը և իրականացրեք, խնդրահարույց է: Առանց մեր անմիջական մասնակցության անգամ լավագույն ծրագիրը չի կարող իրականացվել, որովհետև որքան էլ լավ գաղափարներ տանք, առաջարկենք, առանց մեր մշակած օրենքների լավագույն գաղափարները չեն իրականացվի:

-Մասնագիտական շրջանակները պնդում են, որ ներդրումներ չեն արվում, դրանց մասին, համենայն դեպս, պաշտոնապես չի ազդարարվում: Ինչո՞ւ:

-Իրականում շատ ներդրողներ են եկել, գալիս Հայաստան: Մարդիկ ուրախացել են, ոգևորված են ու պատրաստակամ են, որ գան Հայաստան: Հարկային օրենսգրքի փոփոխության կարիքն առաջացավ հենց այս ժամանակ, քանի որ ներդրողների համար իսկապես շահավետ տարբերակներ պետք է լինեն: Մենք բավականին բացեր ունենք հարկային դաշտում: Ես չեմ ուզում մտնել տնտեսական հարցերի մեջ, բայց փաստ է, որ կա հետաքրքրվածությունը և, մասնավորապես, սփյուռքահայերի շրջանում: Այսօր էլ անընդհատ գալիս են, ներդրումներ են կատարում: Օրինակ, Շիրակի մարզում վերջերս հերթական ներդրումային ծրագիրը մեկնարկեց: Բոլորն ասում են, որ ոչ մի բան չի եղել, բայց պատկերացրեք՝ 2018 թվականի հունիսից լուրջ քայլեր են արվել Ամասիայի բրդի վերամշակման գործարանը աշխատացնելու ուղղությամբ: Գործարանը շուտով կաշխատի: Ջինսի արտադրամասն է բացվել: Մարդիկ, երևի, մտածում էին, որ մեկ տարվա ընթացքում բոլոր համայնքներում ինչքան քանդված գործարան կա, պիտի աշխատեր: Վարչապետի խորհրդականները հսկայածավալ գործ են կատարում ներդրումներ բերելու համար: Կան պայմանավորվածություններ, որոնք իրականացնելու համար ժամանակ է պետք:

-«Դվին» հյուրանոցի սեփականատեր Արտակ Թովմասյանը, որը մեծ ներդրումներ է կատարել հյուրանոցի շահագործման համար, «Հետք»-ին տված հարցազրույցում մտավախություն էր հայտնել պատգամավորների պրոֆեսիոնալության առումով՝ ասելով, որ օրենք գրող հիմնարկը չունի ուժ և հմտություններ: Նման մտավախությունների հիմքեր կա՞ն:

-Ես իրավունք չունեմ նրա մտավախություններին արձագանքելու, բայց կարծում եմ՝ չի կարելի այդպես մոտենալ հարցին: Խնդիրներն առաջանում են, երբ մարդիկ իրենցից այն կողմ որևէ մեկին չեն տեսնում, մտածում են, որ իրենցից լավ որևէ մեկը ոչինչ չի անում: Այնպես չէ, որ օրենսդիր մարմնում չկան բացարձակ որակյալ կադրեր: Հակառակը՝ այդ բացարձակ որակյալ կադրերը հիմա օրենսդիր մարմնում են: Շատ լուրջ խնդիր է. մի քնաի հոգու թիրախավորում են ու այդ կարծիքը տարածում Ազգային ժողովի բոլոր պատգամավորների վրա: Կարծրատիպային մոտեցում կա, թե ԱԺ-ում 20-25 տարեկաններն են: Կներեք, բայց Սեյրան Սարոյանն էլ տարիքով մեծ էր, ի՞նչ արեց: Այո, մենք փորձառությամբ իրենցից պակաս ենք, չենք կարող թալանել, և ես դրա համար հպարտ եմ:

-Դուք Հարկային օրենսգրքի փոփոխությունները համարում եք ներդրումների նախապայման, բայց ամեն օր այդ փոփոխություններին առնչվող բողոքի ակցիաներ են անցկացվում կառավարության դիմաց: Ինչո՞ւ է այդպես:

-Կան ակցիաներ, որ հիմնավոր են, կան, որ արհեստածին են: Հարկային օրենսգրքում առաջարկվում են փոփոխություններ, որոնք մի ոլորտին աջակցում են, մյուսին՝ խանգարում: Բայց էս պահին օրինագիծը դեռ վերջնական մշակված չէ, իսկ բողոքները ձևավորվել են ընդամենը լսած տեղեկությունների հիման վրա: Քննարկումները դեռ գնում են, մասնագետները աշխատում են փաստաթղթի վրա: Օրինագիծը վերջնական տեքսի բերված չէ , և ես ճիշտ չեմ համարում այս պահին բողոքելը: Ավելի լավ կլիներ՝ կառուցողական առաջարկներ արվեին՝ նշելով խնդիրները: Այս ակցիաները ես համարում եմ արհեստական:

-Տիկին Հովսեփյան, բայց բողոքի ակցիաների պատճառը միայն Հարկային օրենսգիրքը չէ: Ամեն օր տարբեր ակցիաներ են կազմակերպվում. սա նորմա՞լ է:

-Ես համարում եմ, որ նորմալ է, որովհետև մարդիկ բոլորն էլ սպասում էին, որ մեկ օրում ամեն ինչ կփոխվի: Նրանք մտածում էին, որ Սերժ Սարգսյանը այս երկրի չարիքն է, և երբ չարիքի գլուխը կտրեցին, ամեն հարցը կկարգավորվի: Բայց չարիքի չափը օբյեկտիվ չէին գնահատել: Աճող ակցիաներից ես ոչ թե լարվում եմ, այլ դասեր եմ քաղում, որ լուծումներ գտնելու համար մի փոքր տեմպը արագացնեմ:

-Շուտով նաև մարզպետարաններում են կրճատումներ լինելու: Սուրեն Պապիկյանը ասաց՝ մինչև 40%: Դուք Շիրակի փոխմարզպետն եք եղել, կարծում եք՝ ճի՞շտ որոշում է սա, արդյո՞ք նոր դժգոհությունների ալիք չի բարձրացնի:

-Թող բարձրացնի: Ես չեմ նեղվում դրանից: Հակառակ դեպքում՝ ես էլ կդժգոհեմ պետության հաշվին արհեստածին վճարվող անձանցից: Վաղուց կար մարզպետարաններում կրճատումների կարիք: Փոխմարզպետ աշխատելիս հասկացա, որ եթե մեկ փոխմարզպետը կարող է անել մարզպետին հավասար և ավելի գործ, և մեկ փոխմարզպետ կարող է անել երեք փոխմարզպետի չափ գործ, ուրեմն, ինչո՞ւ պետք է երեք փոխմարզպետ վճարվի: Այստեղ ընդամենը ճիշտ մարդու ճիշտ տեղում հայտնվելու հարցն է: Եթե մարզպետն ու մեկ փոխմարզպետը ճիշտ ընտրված անձինք են, ապա վստահ եղեք, որ մյուս արհեստածին պաշտոնների կարիքը չկա: 2 փոխմարզպետի աշխատավարձի գումարը մեկ անօթևանի խնդիր կլուծեր: Նախկին իշխանությունը իր ծանոթների, ընկերների ու դաշնակիցների համար լրացուցիչ պաշտոններ էր իջեցրել. ու այժմ էլ բաժիններ կան, որոնց 50 %ը պետք է կրճատվի:

-Կա՞ն պաշտոնյաներ, որոնց գործունեությունը Ձեզ չի գոհացնում:

-Իհարկե, կան: Հայ ժողովրդին պետք են արագ քայլեր: Մենք իրավունք չունենք դանդաղելու:

-Վարչապետն ասել էր, որ չկա պաշտոնյա, որի աշխատանքից դժգոհ է:

-Վարչապետը շփվում է հիմնականում վերին օղակների՝ կառավարության անդամների հետ: Իսկ ես լինում եմ մարզերում, համայնքներում ու շատ դժգոհ եմ համայնքապետերի, մարզպետարանների որոշ վարչությունների աշխատանքից: Եթե մարզի բնակիչը գտնում է Սոֆյա Հովսեփյանին, որը այդ մարզի հետ որևէ կապ չունի, ու հայտնում խնդիրը, ապա մարզպետարանը թերացել է, որոշ անձինք իրենց տեղում չեն: Իրավապահ համակարգն է շատ դանդաղ աշխատում, լուծումները ուշանում են: Օրինակ՝ ամբողջ Անի համայնքը մատնված է անտարբերության. համայնքապետի նկատմամբ քրեական գործ է հարուցվել, նա հրաժարական չի տալիս, բնակիչները բողոքում են ու պահանջում, որ հեռանա, բայց համայնքապետը չի հեռանում, անդրդվելի է: Ամենաթողություն է Անի համայնքում: Քրեական գործն էլ առաջ չի գնում: Այդ դանդաղության արդյունքում քաղաքացին տուժում է ու հիասթափվում: Դատախազությունը արագ քայլերով գործողություն պետք է իրականացնի: