Ուզում են սեպ խրել ԲՀԿ-ի և «Իմ քայլի» միջև. Գ. Պետրոսյան

մայիսի 2, 2019

Հարցազրույց «Բարգավաճ Հայաստան» խմբակցության պատգամավոր Գևորգ Պետրոսյանի հետ

-«Քաղաքացու որոշում» կուսակցության գործադիր մարմնի քարտուղար Սուրեն Սահակյանը դիմել է Գլխավոր դատախազություն «Բարգավաճ Հայաստան» կուսակցության նախագահ Գագիկ Ծառուկյանի նկատմամբ քրեական հետապնդում իրականացնելու և մանդատից զրկելու պահանջով: Մտավախություն չունե՞ք, որ այդ պահանջը կարող է կատարվել:

-Դա ուղղակի ծիծաղելի է: Մարդիկ պարապ են մնացել ու ինքնադրսևորումներով են զբաղված:

-Նա հայտարարում է, որ Գագիկ Ծառուկյանի՝ «ես իմ կառավարիչներին ասել եմ 10.000 դրամով իջեցնել ցեմենտի գինը», «նոր գործարան եմ կառուցում Արարատի գործարանի կողքը» և այս կարգի այլ արտահայտություններ ապացուցում են, որ նա ձեռնարկատիրական գործունեությամբ է զբաղվում ու այդպիսով խախտում է ՀՀ Սահմանադրության 95-րդ հոդվածը:

-Ոչ։ Գագիկ Ծառուկյանը սեփականատեր է, և պետք չէ այդ արտահայտությունները հասկանալ տառացիորեն: Սեփականատերն իրավունք ունի իր բիզնեսի մասին կարծիք ունենալ, բայց դա չի նշանակում, որ նա զբաղվել է ձեռնարկատիրական գործունեությամբ: Եթե այդքան տարի նա ձեռնարկատիրական գործունեությամբ է զբաղվել, մեր իրավապահ մարմիններն ինչո՞ւ են անգործության մեջ եղել: Անգամ 2015թվականին, երբ պարոն Ծառուկյանի նկատմամբ սկսվեց հայտնի արշավը, և հսկիչ-վերահսկիչ բոլոր մարմինները զբաղված էին նրա բիզնեսով, նրա՝ ձեռնարկատիրական գործունեությամբ զբաղվելը չապացուցվեց:

-Այն ժամանակ կար քաղաքական խնդիր՝ Գագիկ Ծառուկյանը համագործակցում էր ընդդիմության հետ՝ դուրս էր եկել իշխանության դեմ, միտինգներ էր կազմակերպում, ելույթ ունենում:

-Ես չգիտեմ, թե ինչ համագործակցության մասին եք խոսում: Գագիկ Ծառուկյանի նկատմամբ երկու տարի ամենաբարձր մակարդակով հետապնդում իրականացվեց։ Դա ամենահարմար պահն էր, որ տոտալ ստուգումների արդյունքում նրա նկատմամբ մեղադրանք հարուցեին, եթե նա, իսկապես, ձեռնարկատիրական գործունեությամբ էր զբաղվում: Բա ինչո՞ւ դա չեղավ:

-Ըստ երևույթին նախկին իշխանությունը Գագիկ Ծառուկյանից պահանջում էր այլևս չհամագործակցել ընդդիմության հետ, չպայքարել իրենց դեմ և հասան դրան. արդյունքում մեղադրանք չառաջադրվեց։

-Այդպես չէ: Յուրաքանչյուր ոք ինքն է պատասխանատու իր գործողությունների համար: ՔՈ-ի դիմումատուները պետք է հասկանան, որ եթե իրենց գրածները չապացուցվեն, իրենք նույնպես կարող են պատասխանատվության ենթարկվել:

-Սուրեն Սահակյանը դիմել է նաև Արարատ Միրզոյանին, որպեսզի նա, որպես ԱԺ նախագահ, Գագիկ Ծառուկյանին մանդատից զրկելու դիմում ներկայացնի ՍԴ: Կարծում եք՝ Արարատ Միրզոյանը կգնա՞ այդ քայլին:

-Չեմ կարող գուշակություններով զբաղվել, բայց լիահույս եմ, որ նա կհետևի Սահմանադրության և օրենքների պահանջներին:

-«Իմ քայլի» պատգամավոր Հայկ Գևորգյանը հրապարակել է տվյալներ այն մասին, որ Գագիկ Ծառուկյանը «Արարատ Ցեմենտը» ձեռք է բերել ընդամենը 200.000 դոլարով, որ այն գրանցված է օֆշորային գոտում և աշխատել է ստվերում։ Այսինքն, այս ընկերությունը հարկային դաշտից դո՞ւրս են գործել։

-Ոչ: Հայկ Գևորգյանին երևի պետք է հարցնել, թե ինչու է նման ակտիվություն դրսևորում և ուզում մեկ հայտարարությամբ դառնալ գործարանատեր։ Ես հակված չեմ արժևորել Հայկ Գևորգյանի հայտարարությունը և դա վերածել միջ կուսակցական հակասության։ Նա իրավունք չունի իրավապահ մարմինների գործառույթ իրականացնել։

-Դուք հիշեցիք 2015 թվականը, բայց Գագիկ Ծառուկյանը հայտարարել է, որ ՊԵԿ-ը իր սեփականությունը հանդիսացող օբյեկտներում ստուգումներ է իրականացրել նաև հեղափոխությունից հետո։ Գուցե հիմքեր կան, և դրա՞ համար է նա անընդհատ հայտնվում իշխանության տարբեր օղակների ուշադրության կենտրոնում։

-Գագիկ Ծառուկյանը միշտ էլ գրավել է նրանց։ Եթե խնդիրներ լինեին, կհայտնաբերվեին. տարիներով ստուգումներ անեն ու ոչ մի էական բան չհայտնաբերե՞ն։ Տեսաք՝ վերջերս «Առինջ մոլի» գրոհը որևէ արդյունք չտվեց, խախտում չկար։ 40 հոգով մտնում են երկու փաստաթուղթ առգրավելու։ Իրավական, ժողովրդավարական, սոցիալական երկրում սա պատշա՞ճ վարչարարություն է։ Ես այդպես չեմ կարծում:

-Վայոց ձորի փոխմարզպետ Ռազմիկ Տոնոյանը ոստիկանությանը հաղորդել է, թե ԲՀԿ պատգամավոր Սերգեյ Բագրատյանը հարձակվել է իր վրա։ Դուք պարզե՞լ եք՝ ինչու է նա այդպիսի քայլի դիմել։

-Նա հակաօրինական որևէ բան չի արել, ընդամենը հորդորել է, որ ծխախոտի մնացորդը գետնին գցելու համար ճիշտ չէ մարդուն Ոստիկանություն տանել, ազատությունից զրկել։ Երևի ինչ-որ մարդիկ դատամոլությամբ են տառապում և մարզի խնդիրները թողած՝ Ոստիկանություն, ԱԱԾ հաղորդումներ են տալիս։

-Ինչո՞ւ են լարվել «Բարգավաճ Հայաստան» և «Իմ քայլը» խմբակցությունների հարաբերությունները:

-Կարծում եմ՝լարվածություն չկա, Ազգային ժողովն այն մարմինն է, որտեղ կա ու պետք է լինի տարակարծություն, այլ խնդիր է, որ առանձին անձինք, առանձին գործիքներ ու գործիչներ ուզում են այդպիսի լարվածության իմիտացիա ստեղծել: Մենք խաղաղասեր, քաղաքակիրթ ուժ ենք և որևէ մեկի հետ անհարկի լարվածության, անպտուղ գզվռտոցի մեջ մտնելու ցանկություն չունենք:

-Ո՞ւմ նկատի ունեք՝ գործիք ասելով:

-Դուք շատ լավ գիտեք, թե ովքեր են գործիք: Գործիքներն այն մութ ուժերն են, որոնք ծառայում են սրա-նրա ձեռքին: Ակնհայտորեն կան մարդիկ, որոնք շահագրգռված են, որ սեպ խրվի «Իմ քայլի» ու «Բարգավաճ Հայաստանի» միջև: Բայց այսօր մեր կուսակցությունների միջև հակասություն չկա:

-Ձեր ֆեյսբուքյան էջը վերականգնվե՞ց։

-Ոչ։ Իմ ելույթներից դժգոհ ինչ-որ ցածրամիտ մարդիկ գաղտնի բողոքել են, ու փակվել է։ Նոր Հայաստանում խայտառակություն է, երբ իր գործունեությունից բխող հարցեր հնչեցնելու համար նման ճղճիմ եղանակներով սահմանափակվում է պատգամավորի խոսքի ազատությունը։ Դրանով ես ոչ կզրկվեմ իմ կարգավիճակից, ոչ էլ իմ հայացքները կփոխեմ։ Հակառակը, նրանք ստիպում են ավելի բարձրաձայն արտահայտվել իրավիճակի մասին։