Խորհրդարանը պասիվ չէ. Լենա Նազարյան

մայիսի 9, 2019

Հարցազրույց ԱԺ փոխնախագահ, «Իմ քայլը» խմբակցության անդամ Լենա Նազարյանի հետ:

-Տիկին Նազարյան, ԱԺ-կառավարություն վերջին հարցուպատասխաններից մեկի ժամանակ վարչապետը մեղադրեց խորհրդարանին ունեցած լիազորությունները լիարժեք չօգտագործելու մեջ։ Ընդունելի համարո՞ւմ եք այդ դիտողությունը։

-Այո, համաձայն եմ այդ դիտարկմանը, բայց կան օբյեկտիվ, ժամանակավոր պատճառներ. պատգամավորները նոր-նոր են գործնականում կիրառում ԱԺ կանոնակարգը, հանձնաժողովներում ձևավորում ոլորտային օրակարգերը, խորամուխ լինում խնդիրների մեջ: Հաշվի առեք նաև, որ շատերը նոր են սկսում պատգամավորական գործունեությունը: Վարչապետի դիտարկումը ես ընկալում եմ որպես հուշում և օգնություն: Ակնհայտ է, որ վարչապետն ուզում է, որ Հայաստանում ամրանա խորհրդարանական կառավարումը, խորհրդարանական վերահսկողությունը: Ասեմ, որ խմբակցության հետ հանդիպումներից մեկի ժամանակ վարչապետը խնդրեց պատգամավորներին օգնել իրեն վերահսկել կառավարության աշխատանքը, և դա շատ կարևոր ազդակ էր հատկապես այն պատգամավորների համար, որոնք դեռ չէին կողմնորոշվում՝ զբաղվել կառավարության վերահսկողությա՞մբ, թե՞ կառավարության վարած քաղաքականության պաշտպանությամբ: Իմ կարծիքով՝ մեկը մյուսին չի հակասում, որովհետև լավագույն պաշտպանությունը հենց վերահսկողությունն է, խնդիրների բարձրաձայնումը:

-Վարչապետի այդ հայտարարությունից հետո «Իմ քայլը» խմբակցությունը հայտարարեց Քննիչ հանձնաժողովներ ստեղծելու մասին։ Փորձո՞ւմ եք ակտիվացնել խորհրդարանի աշխատանքը։

-Խորհրդարանը պասիվ չէ: Նախկինում, եթե նիստերի օրեր չէին կամ նիստերի օրերին էլ, հազվադեպ էր պատահում, որ պատգամավորները լինեին իրենց աշխատասենյակներում: Անգամ նիստը նախագահողի հրավերը՝ ուղղված աշխատասենյակներում աշխատող պատգամավորներին ընդմիջումից հետո դահլիճ գալու մասին, ծիծաղով էր ընդունվում, որովհետև բոլորին պարզ էր, որ պատգամավորների մեծ մասը աշխատասենյակներում չէ, ու նիստը շարունակվում էր մի քանի հերթապահ պատգամավորի ներկայությամբ: Իսկ այժմ պատգամավորների մեծ մասն իրենց աշխատասենյակներում է կամ որևէ հանրային միջոցառման է մասնակցում: Հիմա հարցերի առատության պատճառով հերթական նիստերը քառօրյաներից վերածվում են վեցօրյաների, իսկ կառավարության հետ հարցուպատասխանը տևում է մինչև ուշ երեկո: 4 ամսվա ընթացքում երկու հանրային լսում է անցկացվել: Տարբեր հարցերի ուսումնասիրության համար աշխատանքային խմբեր են ձևավորվել: Ինչ վերաբերում է քննիչ հանձնաժողովների ստեղծմանը, ապա, այո, գուցե վարչապետի ուղերձն արագացրեց եղած քննարկումները կանոնակարգելու ու ֆորմալացնելու գործընթացը:

-Ո՞ր հարցերի ուսումնասիրության համար եք մտադիր Քննիչ հանձնաժողովներ ձևավորել։

-Արդեն մյուս շաբաթ կստեղծվի ջրօգտագործման հարցերի քննության համար հանձնաժողով: Կարծում եմ, որ առաջիկայում գյուղատնտեսական աշխատանքների ակտիվացման հետ ջրօգտագործման հարցերը կդառնան ամենաթեժը և լավ կլինի, որ քննիչ հանձնաժողովը նախապես բացահայտի խնդիրները և գտնի հնարավոր հարցերի պատասխանները:

տադիր չե՞ք վերսկսել ԱԱԾ տնօրենի և ՀՔԾ պետի հեռախոսազրույցի գաղտնալսման հարցով Քննիչ հանձնաժողովի գործունեությունը։ Մի շարք հարցեր անպատասխան մնացին՝ ո՞վ, ինչպե՞ս գաղտնալսեց , արդյո՞ք դատավորներին զանգեր եղել էին, հատկապես որ այս փաստով քրեական գործը տեղից չի շարժվում։ 

-Հարցեր մնացել են իհարկե, բայց եթե իրավապահ մարմինները, ունենալով այդ հարցերին պատասխաններ գտնելու գործիքներ, չեն կարողացել բացահայտել գործը, ապա ոչ մի քննիչ հանձնաժողով չի կարողանալու դա անել: Քննիչ հանձնաժողովը պետք է հրավիրի այդ նույն իրավապահ մարմիների ներկայացուցիչներին և հարցեր տա, որոնց պատասխանները, ինչպես իրենք էլ ասում են, հայտնի չեն: Հետևապես՝ իմաստ չունի: 

-Տիկին Նազարյան, խորհրդարանական փոքրամասնությունը մեծամասնությանը մեղադրում է ընդդիմության նախագծերը մերժելու, դրանց քննարկմանը խոչընդոտելու մեջ: Ասում են՝ շարունակում եք նախկին արատավոր գործելաոճը։ Կա՞ն հիմքեր նման հայտարարությունների համար։

-Ես խմբակցությունում հայտնել եմ իմ կողմ կարծիքը՝ ընդդիմադիրների նախագծերը լիագումար նիստերի օրակարգում ընդգրկելու մասին: Հանձնաժողովականների մի մասը կարծում է, որ եթե հանձնաժողովը բացասական եզրակացություն է տվել, ապա չարժե նախագիծն ընդգրկել լիագումարի օրակարգում: Հանձնաժողովակնների մյուս մասն էլ պնդում է, որ տարբերակենք լրացուցիչ փաստական հիմնավորումների կարիք ունեցող և զուտ գաղափարական հիմնավորումների կարիք ունեցող նախագծերը: Այսինքն, մոտեցումն այն է, որ այն նախագծերը, որոնք փաստերով կամ վիճակագրությամբ հիմնավորված չեն, իմաստ չունի բերել լիագումար նիստերի օրակարգ ու նորից պարզել, որ առաջարկները բավարար հիմնավորված չեն: Իսկ այն նախագծերը, որոնք զուտ գաղափարական հիմնավորումների կարիք ունեն, արժե, որ քննարկվեն լիագումարի ժամանակ, քանի որ այդ դեպքում իսկապես հնարավոր է, որ ընդդիմադիր հեղինակը կարողանա համոզիչ խոսքով կողմ ձայներ ստանալ: Ես կողմ եմ երկրորդ տարբերակին: Դեռ չունենք վերջնական որոշում: 

-Խորհրդարանում «Բարգավաճ Հայաստան»-«Իմ քայլը» խմբակցությունների միջև մի տեսակ սառը պատերազմ է։ Արարատ Միրզոյանը գրություն ուղարկեց Գագիկ Ծառուկյանին՝ խնդրելով պարզաբանում տալ իր գործունեության մասին, Գագիկ Ծառուկյանն էլ պատասխան հայտարարությամբ ասաց, որ ձեռնարկատիրությամբ չի զբաղվում։ Ձեզ բավարարե՞լ է այդ պատասխանը, թե՞ դեռ ունեք կասկածներ։

-Չկա սառը պատերազմ: Մենք չենք գնում հակամարտության: Այս հարցում ես կողմ եմ բացառապես քաղաքական լուծումների. այսինքն առաջիկա տարիներին ծպտյալ գործարարներին էլ ավելի պարզ կդառնա, որ բացարձակ կարիք չկա ֆինանսավորել մի ամբողջ կուսակցություն և ձգտել խորհրդարան՝ մասնավոր սեփականությունը ինչ-ինչ վտանգներից պաշտպանելու կամ քաղաքական դերակատարմամբ հովանավորություն ունենալու համար: Սեփականության պաշտպանության պայմանները բոլորի համար ապահովում է պետությունը, իսկ դրա տեղը՝ դատարանն է: Այս ամենը պետք է այնքան համոզիչ լինի, որ մարդիկ ինքնակամ հեռանան քաղաքականությունից, եթե նրանց առաջնային գործունեությունը ամենևին քաղաքականությունը չէ: Սա ժամանակի հարց է: Իհարկե, քաղաքականությունն ամեն դեպքում կշարունակի ֆինանսավորվել գործարարների կողմից, եթե անգամ նրանք անձամբ ներկա չլինեն խորհրդարանում, բայց ինչպես այլ՝ այս ճանապարհն արդեն անցած երկրներում, դա գոնե կարվի բացահայտ օրակարգով և թափանցիկ, հաշվետու մեխանիզմներով:

-Այդուհանդերձ, տիկին Նազարյան, իշխանական խմբակցությանը մեղադրում են բիզնեսի ու քաղաքականության սերտաճման հարցի շուրջ լռելու մեջ։ Ի՞նչ եք կարծում, չկա՞ր հնարավորություն ի սկզբանե հայտարարելու, որ Գագիկ Ծառուկյանը բիզնեսմեն է և անհրաժեշտ է, որ նա զբաղվի բացառապես այդ գործունեությամբ, իսկ խորհրդարանը քաղաքական մարմին է։ 

-Գոնե ես ընտրություններից առաջ մշտապես խոսել եմ այդ մասին՝ հուսալով, որ ընտրողների մոտ կձևավորվի կարծիք այդ առումով, սակայն, պարզ է, որ այս հարցի լուծումը իմ նշած ճանապարհով մի օրվա հարց չէ: Մեր կուսակցությունում չկա գեթ մեկ հոգի, որ հակառակ կարծիքն ունի: Նորից եմ ասում, որ հարցը պետք է լուծվի մի կողմից սեփականության պաշտպանության օրինական երաշխիքների անժխտելի պայմաններ ձևավորելով, մյուս կողմից՝ գիտակցությամբ, որ խորհրդարանը բիզնես շահերի պաշտպանության տեղ չէ: 

-Անհրաժեշտ համարո՞ւմ եք, որ այդ հարցով Էթիկայի հանձնաժողով ստեղծվի Ազգային ժողովում, ինչպես առաջարկել էր «Քաղաքացու որոշում» կուսակցությունը։ 

-Այդ որոշումը պետք է կայացվի խմբակցությունում, և խմբակցության ղեկավարն արդեն իսկ հայտարարել է, որ սպասելու ենք իրավապահ մարմինների եզրակացությանը:

-«Գնումների մասին» օրինագծում «Լուսավոր Հայաստանի» առաջարկած փոփոխություններում դուք իսկապե՞ս տեսել եք անվտանգության հետ կապված խնդիրներ, ինչպես հայտարարեց վարչապետը կառավարության նիստում։ 

-Չեմ հասցրել մանրամասն ուսումնասիրել այս հարցը: Դեռ չունեմ պատասխան: