Վաղ թե ուշ՝ հնչելու է նաև Գագիկ Խաչատրյանի անունը. Հ. Գևորգյան

մայիսի 13, 2019

Հարցազրույց «Իմ քայլը» խմբակցության պատգամավոր Հայկ Գևորգյանի հետ:

-«Բարգավաճ Հայաստան» խմբակցության ղակավար Գագիկ Ծառուկյանն իր «ԱրարատՑեմենտ» գործարանը դեռ չի՞ նվիրել Ձեզ։

-Նորություն չկա, անհամբեր սպասում եմ:

-Գուցե նրան հաջողվե՞լ է ապացուցել է, որ Ձեր տվյալները իրականությանը չեն համապատասխանում:

-Բնականաբար, ոչ: Ես պնդում եմ, որ 2002թ․ սեպտեմբերի 12-ի 1465-Ա որոշմամբ գործարանը վաճառվել է «Ռոբերտո» ընկերությանը 200.000 դոլարով։

-Գործարանից հակադարձում են, որ 10 մլն դոլարի պարտք են մարել, ավելի քան 6 մլն դոլարի ներդրում կատարել, և այդ գումարը մտնում է գնի մեջ։

-Դա գործարանի գին չէ, բայց այդ ժամանակ գուցե գործարանում 7 մլն դոլարի ցեմենտ է եղել։ Շատ հետաքրքիր տվյալներ կհրապարակվեն, որոնք արդեն մեզ մոտ են, մենք դեռ շարունակում ենք հավաքել։ Եվ «ԱրարատՑեմենտի» մասին շատ աղմկահարույց բացահայտումներ կլինեն՝ ինքնարժեքի, վաճառքի գնի, անհայտ ուղղությամբ կորած գումարների վերաբերյալ:

-«ԱրարատՑեմենտի» 1 տոննա ցեմենտը վաճառվում է 40.000 դրամով, ինքնարժեքը որքա՞ն է կազմում։

-Ինքնարժեքն այնքան է, որքանով արտահանվում է. դրա մեջ մտնում է նաև շահույթը՝ շուրջ 22%։

-Վրաստանում վաճառվել է 24 000 դրամով։ Այսինքն, 1 տոննայի մեջ հավելյալ 15.000 դրամը գերշահո՞ւյթ է համարել։

-Դուք ասացիք։ Մենք համեմատել ենք նույնատիպ գործարանների գազի ծախսը. կզարմանաք, թե ինչպես է կոնկրետ տարիների դա կտրուկ իջել: Կամ՝ երբ ասում են, որ ինքնարժեքից ցածր գնով արտահանել ենք Վրաստան, որ կանխենք այդ երկրից ցեմենտի մուտքը. տնտեսագիտական նման սխեմա գոյություն չունի։ Դա նույնն է, թե մենք Իտալիա ինքնարժեքից ցածր գնով կոշիկ պետք է արտահանենք, որ այնտեղից կոշիկ չներմուծվի։ Եթե ասում են, թե 200.000 դոլարով չեն առել, այլ ավելի թանկ, ես խորհուրդ կտամ ցույց տալ այն փաստաթուղթը, որի համաձայն պետք է «Իտերա» ընկերության հետ որոշակի հարաբերությունների մեջ մտնեին, «Հայռուսգազարդին» ազատեին «Իտերային» ունեցած պարտքից, ինչը, կառավարության որոշման համաձայն, պետք է լիներ որոշումին հաջորդող երեք բանկային օրվա ընթացքում։

-Նիկոլ Փաշինյանը հայտարարեց, թե ավելի քան 1000 հանցագործություններ են քննվում, որոնք պետությանը շուրջ 89 մլրդ դրամի վնաս են պատճառել, և դրանից 32 մլրդ դրամը կամ 65 մլն դոլարը վերականգնվել է։ Միլիարդավոր դոլարներ թալանելու և Հայաստանից հանելու հայտարարությունների ֆոնին վերականգնված գումարը քիչ չէ՞:

-Եթե մենք գնայինք կացիններով ու սրերով, ավելի արագ հետ կբերեինք, բայց մենք գնում ենք օրենքով, ինչը ժամանակ է պահանջում։ Եվ որպես նպատակին հասնելու միջոց` քննարկում ենք անցումային արդարադատության ներդրումը, որպես այդ միջոցները վերադարձնելու միջոցներից մեկը։ Ի դեպ, անցումային արդարադատության ներդրման կարևոր նպատակը հասարակության մեջ հաշտություն կնքելու խնդիրն է: Եթե շատ պարզ ձևակերպենք՝ թալանչիները թալանած գումարը վերադարձնելով՝ հասարակության հետ հաշտություն են կնքում։ Հասարակությունը և նրանց կողմից պատվիրակված իրավապահ մարմինները այլևս նրանց չեն հետապնդում։

-Կա՞ պատկերացում, թե որքան գումարի մասին է խոսքը։

-Մենք կարող ենք ընդհանուր գնահատականներ տալ՝ հաշվարկել, թե որքան է ստվերային տնտեսությունը, դրա մեջ որքան է եղել մի քանի ընտանիքի բաժինը, դա բազմապատկել որոշակի տարիներով և մոտավոր թիվ ունենալ։ Դա իրավապահների և այլ պատկան մարմինների խնդիրն է։ Հենց այսօր էլ գլխավոր դատախազը հայտնեց, որ արդեն մեկ դեպքով կալանք է դրվել մի անձի արտասահմանյան հաշվի վրա։

-Մի քանի ընտանիք ասելով՝ ո՞ւմ նկատի ունեք։

-Հենց այն ընտանիքներին, ում Դուք էլ նկատի ունեք։ Գնահատելու տարբեր մեթոդներ կան, որոնց հաշվարկով, մեղմ ասած, տնտեսության, ՀՆԱ-ի մի զգալի մասը տիրապետում էր ընդամենը 44 ընտանիք` հիմնականում նախկին պաշտոնյաներ։

-Ալեքսանդր Սարգսա՞ն, Գագիկ Ծառուկյա՞ն, Գագիկ Խաչատրյա՞ն, Ռոբերտ Քոչարյա՞ն…

-Դուք ասացիք:

-Ի դեպ, ՊԵԿ նախկին նախագահ Գագիկ Խաչատրյանի անունը իրավապահների հայտարարություններում որևէ կերպ չի հնչում, մինչդեռ Դուք Ձեր հոդվածներում, Նիկոլ Փաշինյանը՝ իր պատգամավորական նյութերում նրան ամենակոռումպացված պաշտոնյանների թվին էիք դասում:

-Եթե անկեղծ լինեմ, ես էլ կուզենամ նրա անունը լսել, և վստահ եմ, որ վաղ թե ուշ լսելու եմ:

-Նիկոլ Փաշինյանն ասուլիսում հայտարարեց, թե նախկին պաշտոնյաներից միայն մեկը Երևանի կենտրոնում 250 անշարժ գույք ունի, հետո մամուլը գրեց, թե խոսքը նախկին քաղաքապետ Գագիկ Բեգլարյանի մասին է: Ճի՞շտ է այդ տեղեկությունը:

-Ես հետևում եմ մամուլին և գրվածին հավատում եմ: Եթե դա ճիշտ չլիներ, հերքում կտպվեր:

-Վարչապետը հայտարարեց, որ անցումային արդարադատությանն առնչվող օրենսդրական նախաձեռնությունը պետք է պատրաստ լինի մինչև տարեվերջ, բայց այդ համակարգի ներդրման մասին իշխանությունը խոսել է դեռ մեկ տարի առաջ, ինչո՞ւ է այդքան ուշանում:

-Դա շատ բարդ փաթեթ է, պետք է փորձաքննություններ անցնի, որևէ կերպ չպետք է հակասի միջազգային պարտավորություններին, արդարադատության մասին մեր ունեցած պատկերացումներին, և պետք է լիարժեքորեն պաշտպանվեն մարդու իրավունքները:

-ԱԺ-ն ընդունեց Ընդերքի մասին օրենսգրքում փոփոխություններ և լրացումներ կատարելու մասին օրինագիծը, որը ենթադրում է հանքարդյունաբերական ոլորտում իրական սեփականատերերի բացահայտում: Ինչո՞ւ է այդ ինստիտուտի ներդրումն այդքան անհրաժեշտ:

-Դա նախ տարիներ առաջ ՀՀ կողմից միջազգային կոնվենցիաներից մեկին միանալու արդյունքն է, բայց եթե դա էլ չլիներ, հանքարդյունաբերության ոլորտի իրական պատկերը ստանալու համար անպայման այդ քայլին գնալու էինք, օրինակ` որպեսզի ՀՀ-ում արդյունահանված հանքանյութը չվաճառվի օֆշորային ընկերություններին: Շահութաբերությունը նվազեցնելու համար օֆշորային գոտում կարող են միջնորդ կազմակերպություն գրանցել, որին վաճառեն էժան գնով: Սա էլ հանքանյութը ավելի թանկ գնով վաճառում է վերջնական գնորդին: Այդ ընթացքում հսկայական շահույթ է գոյանում ոչ թե արդյունահանող ընկերության, այլ այդ միջնորդ վերավաճառողի մոտ և նստում է օֆշորում: Այդ մեխանիզմի արդյունքում մեր երկիրը հսկայական հարկեր է կորցնում: Պետք է դա բացահայտել:

-Ձեր ընդդիմախոսները հայտարարում են, որ Նիկոլ Փաշինյանը խոստացել էր կարճ ժամանակում բյուջեն ավելացնել 800 մլն դոլարով, բայց անցած տարի դա իրականություն չդարձավ, և բյուջեն, նախորդի համեմատ, ընդամենը 144 մլրդ դրամով է ավելի:

-Առաջին տարվա ընթացքում, առանց հարկային օրենսդրության որևէ փոփոխության, բյուջեն ավելանում է 144 մլրդ դրամով, 62 մլրդ դրամով էլ գերակատարում է լինելու: 400 մլն դոլարը քի՞չ է: Քըրք Քըրքորյանը կրկնակի քիչ նվիրաբերություն էր արել, երեք տարի Հայաստանը ասֆալտապատում էին, չէր վերջանում: