Քոչարյանը ստացել է արդարադատության իրավունք, ինչից զրկել է բոլորին.Ն. Բաղդասարյան

մայիսի 17, 2019

-Վերջին օրերի ամենաքննարկվող թեման Ռոբերտ Քոչարյանի խափանման միջոցի փոփոխման դռնբաց դատական նիստն էր: Հետևե՞լ եք այդ նիստին և ի՞նչ տպավորություն ունեք:

-Սա դեռևս բուն գործի դատական նիստը չէր: Սա նախապատրաստական մասն էր, որը իրավաբանական տերմինաբանությամբ կոչվում է նախնական լսումներ, և որի ժամանակ նախապատրաստվում է դատական նիստը: Ես, երկար տարիներ աշխատելով փաստաբան, չեմ տեսել նախնական դատական նիստ, որն այսպիսի ընթացակարգով անցներ: Նախկինում դատավորը որոշում է կայացրել առանց կողմերի մասնակցության: Այս փուլում քննվում են խիստ սահմանափակ թվով հարցեր: Նախնական դատական նիստում չի քննարկվում մեղադրանքի հիմնավորվածությունը: Այն, ինչ այս օրերին դատարանում ներկայացնում էր պաշտպանական կողմը, իմ կարծիքով, օրենքի խախտում էր, որովհետև այս փուլում չի քննարկվում մարդու մեղավորությունը կամ անմեղությունը: Դա պետք է քննարկման առարկա դառնար դատաքննության փուլում: Նախնական դատական նիստում որևէ եզրահանգման գալ հնարավոր չէ: Ամբողջական եզրակացություն կարելի է կազմել դատաքննության ավարտին, երբ կներկայացվեն ապացույցներ, հիմնավորումներ, կհարցաքննվեն վկաներ:

-Այդուհանդերձ, պարոն Բաղդասարյան, որոշ գնահատականներ հնչել են դատարանում: Մասնավորապես, Քոչարյանը պնդեց, որ ինքը պաշտպանության նախարարի հայտնի 0038 հրամանին ծանոթ չի եղել, հայտարարեց, որ Արցախից զորք չի բերվել Հայաստան:

-Քոչարյանը ուղղակի պաշտպանվում է առաջադրված մեղադրանքից՝ ասելով, թե Արցախից զորք չի բերվել Հայաստան: Մեղադրող կողմն էլ պնդում է, որ կան ապացույցներ, որ զորք բերվել է: Մենք պետք է սպասենք դատաքննության փուլին, որտեղ կհետազոտվեն ապացույցները: Մինչև այդ ապացույցները չհետազոտվեն, կողմերից յուրաքանչյուրը կարող է առաջ տանել իր տեսակետները: Մենք բոլորս պետք է տեսնենք այդ ապացույցները, և ոչ թե Քոչարյանի կամ մեղադրողի շուրթերից լսենք այդ հայտարարությունները:

-Դատական նիստում նաև Քոչարյանն ասաց, որ ԱԱԾ նախկին ղեկավար Գորիկ Հակոբյանը իրեն ցույց է տվել մարտի 1-ի իրադարձություններին առնչվող՝ նռնակներ պայթելու, ոստիկանի վիրավորվելու տեսանյութեր, որոնք այժմ քրեական գործում չկան ու չեն ներկայացվել:

-Ճիշտն ասած՝ այդ պահը անհասկանալի էր. ինքն ասում է՝ տեսել է մի բան, որն այժմ գոյություն չունի:

-Նիկոլ Փաշինյանը ասուլիսում հայտարարեց, որ ԱԱԾ-ից նյութեր են կորել: Դուք կապ տեսնո՞ւմ եք, հնարավո՞ր է խոսքը նույն նյութերի մասին լինի:

-Չեմ կարող ասել, քանի որ հայտնի չէ, թե ինչ փաստաթղթերի կորստի մասին է հայտարարել Նիկոլ Փաշինյանը: Ես էլ կարող եմ ասել, որ Գորիկ Հակոբյանը, որն այժմ մահացած է, ինձ ցույց է տվել մի փաստ, ու շարադրեմ այդ փաստը, ինչքանո՞վ լուրջ կհամարեք իմ ասածը:

-Որոշ քաղաքական գործիչներ և իրավաբաններ հայտարարում են, որ այս քրեական գործը ջուր է, ունի քաղաքական ենթատեքստ: Դուք, որպես իրավաբան, ի՞նչ կարծիքի եք:

-Քրեական գործը դատարան դեռ չի մտել, ու իրենք ծանոթ չեն ապացույցներին, ցուցմունքներին: Մի քաղաքական գործիչ օրերս պնդում էր, թե այս քրեական գործը չի կարող ավարտվել մեղադրական դատական ակտով: Ու սա այն դեպքում, երբ քրեական գործի նյութերից մի տող էլ չի կարդացել: Ես ծանոթ չեմ քրեական գործի նյութերին, չեմ կարող ասել՝ գործում կա՞ն ապացույցներ, ապացույցների համակցություն, թե՞ ոչ:

-Փաստաբանները պնդում են, որ մեղադրանքը չունի հիմքեր, գործողության կատարման ժամանակ, ավարտ: Դրա հիման վրա են պնդում, որ մեղադրանքը ջուր է: Դուք, որպես իրավաբան, համարո՞ւմ եք, որ նման մեղադրանքը ապացուցելու հիմքեր չկան:

-Մեղադրանքը ապացուցելու համար պետք է լինեն գրավոր ու իրեղեն ապացույցներ, դրանք ամբողջացնելու համար պետք է լինեն նաև տարբեր կողմերի ցուցմունքներ, առգրավված փաստաթղթեր: Մեկը, ով ծանոթ չէ գործի նյութերին, չի կարող Ձեր հարցին պատասխանել: Մեղադրանքը հիմնավորող ապացույցների համակցությունը կտեսնենք դատաքննության ժամանակ: Իշխանությունն ասել է՝ յուրաքանչյուր մարդու երաշխավորում եմ արդար դատաքննության իրավունք: Դա կարող է լինել նաև Ռոբերտ Քոչարյանը: Իշխանության խնդիրն է նրան երաշխավորել արդար դատաքննության իրավունք, իսկ դատարանի խնդիրն է ձեռք բերված ապացույցներով ձևավորել համոզմունք, և եթե մարդը մեղավոր է, կայացնել մեղադրական դատական ակտ: Ռոբերտ Քոչարյանը ստացել է մի իրավունք, որից ինքը բոլորին զրկել է: Դա արդար դատաքննության իրավունքն է: Լցվենք համբերությամբ, սպասենք դատական քննության փուլին, և պարզ կլինի՝ կատարե՞լ է տվյալ անձը հանցանք, թե՞ ոչ:

-Անցումային արդարադատության վերաբերյալ շուտով խորհրդարանական լսումներ են անցկացվելու: Ի՞նչ է պատկերացնում իշխանությունը անցումային արդարադատություն ասելով:

-Ես այդ հարցին կտրականապես հրաժարվում եմ պատասխանել: Բոլոր հարցերի պատասխանները մայիսի 24-ի խորհրդարանական լսումներից հետո:

-Իսկ կարո՞ղ ենք ասել, որ Քոչարյանի հետ կատարվողը իշխանության հռչակած անցումային արդարադատության շրջանակում է:

-Ոչ, անցումային արդարադատությունը այլ բան է: Անցումային արդարադատությունը արտադատարանային գործիք է, որն ուղղված է լինում նախորդ իշխանությունների թույլ տված մասսայական խախտումների վերացմանը: Դա լրիվ այլ գործընթաց է, որի մասին դեռևս հստակ պատկերացում չկա:

-ՀՀ նախագահը առաջադրել է ՍԴ դատավորի հերթական թեկնածուին, որը դարձյալ իշխանության թեկնածու Վահե Գրիգորյանը չէ: Ի՞նչ է զարգացումներ են հնարավոր այս իրավիճակում:

-Այս պահին թեկնածու առաջադրելու իրավունքը ՀՀ նախագահինն է, և նախագահը կարող է առաջադրել Սահմանադրության պահանջները բավարարող ցանկացած մեկի թեկնածությունը: Պետք է շփվենք նոր թեկնածուի հետ, նա կգա, կհանդիպի ֆրակցիաներին, կունենանք հարցեր տալու հնարավորություն, կստանանք պատասխաններ ու կկայացնենք որոշում:

-Դուք թեկնածու Արթուր Վաղարշյանին ճանաչո՞ւմ եք:

-Կյանքում չեմ լսել նրա մասին:

-Տարօրինակ չէ՞, որ նախագահը ներկայացնում է հանրությանը քիչ ծանոթ մեկի թեկնածությունը:

-Օրենսդիր մարմինը այդ տարօրինակությունը ֆիքսելու խնդիր չունի: Նա կարող է առաջադրել մեկին, որը ՀՀ-ում չի էլ բնակվում, ինչպես եղավ նախորդ թեկնածուի դեպքում: Տարօրինակ բան չկա, կարևորը, որ այդ մարդը համապատասխանի Սահմանադրության չափանիշներին: