Մարդիկ իշխանությունից կոշտ քայլեր են պահանջում. Հ. Հակոբյան

հունիսի 9, 2019

Հարցազրույց «Իմ քայլը» խմբակցության պատգամավոր Հրաչյա Հակոբյանի հետ

-Ազգային ժողովում ստեղծվեց առաջին քննիչ հանձնաժողովը, որն ուսումնասիրելու է ապրիլյան պատերազմի հանգամանքները: Ի՞նչ եք ակնկալում հանձնաժողովի գործունեությունից:

-Հանձնաժողովը ստեղծվել է, քանի որ դրա կարիքն զգացվել է: Պետք է ճշտվեն կատարվածի հանգամանքները, և կարծում եմ՝ հանձնաժողովը դա կանի, ու պարզ կդառնա, թե ինչպես է ամեն ինչ տեղի ունեցել:

-Դուք կոնկրետ քառօրյային վերաբերող հարցեր ունե՞ք:

-Ես ոլորտի մասնագետ չեմ, ես չեմ կարող ասել՝ ինչ հարցեր կան, բայց գիտեմ, որ նախորդ իշխանության օրոք տեղի ունեցած աղմկահարույց դեպքերը պետք է քննիչ հանձնաժողովներով անցնեն, դա անհրաժեշտ է:

-Պարո՛ն Հակոբյան, ՀԱԿ ակտիվիստի ծեծից հետո մի խումբ դաշնակցականներ, հետևելով Գեղամ Մանուկյանի քայլին, հայտարարեցին, որ իրենք են ծեծել Վարդան Հարությունյանին: Ինչպե՞ս եք սա գնահատում:

-Դա անբարոյականություն է, դա քաղաքականությունից հեռու պահվածք է: Ես չեմ պատկերացնում քաղաքական ուժ, որը բռնություն է քարոզում: Չեմ պատկերացնում քաղաքական գործիչ, որը հպարտ ասում է՝ ես եմ ծեծել: Նրանց որդեգրած քաղաքականությունը հասարակությունը մերժել է, այդ բարքերին վերադարձ չի լինելու: Ծեծն ու ջարդը մերժվել են, իսկ նրանք նույն բաներն են քարոզում, հպարտանում: Հանրությունը իր գնահատականը տվել է, և եթե պետք լինի, ևս մեկ անգամ կտա թե՛ ՀՅԴ-ին, թե՛ բոլոր այն ուժերին, որոնք բռնություն կքարոզեն:

-Դո՞ւք էլ Փաշինյանի պես կարծում եք, որ ՀՅԴ-ն թալանին մաս է կազմել:

-Չգիտեմ՝ թալանին մաս կազմել է թե ոչ, բայց նախորդ իշխանության մաս եղել է, իսկ նախորդ իշխանությունը զբաղված էր թալանով, հետևաբար, այո, թալանին մաս է կազմել:

-Վարչապետը կառավարության նիստում հայտարարեց բռնությանը հակահարված տալու մասին. ինչպե՞ս եք դա պատկերացնում:

-Շատ կոշտ: Այդ անձանց իրավապահ մարմինները պետք է խստագույնս պատժեն:

-Խոսքը ինչ-որ ուժերի ներկայացուցիչների՞ թե՞ շարքային քաղաքացիների մասին է:

-Հասարակ քաղաքացին այդպիսի պահվածք չունի: Դրանք կոնկրետ կետից ուղղորդվող քաղաքացիներ են:

-Որոնք ուզում են ցույց տալ իշխանությունների թուլությու՞նը:

-Մերը օրինական պահվածք է, ինչը նրանք ուզում են ներկայացնել որպես թուլություն: Վարչապետն էլ է մի քանի անգամ ասել, որ մեր քաղաքակիրթ պահվածքը պետք չէ խառնել թուլության հետ:

-Հակահարված տալու մասին վարչապետի հայտարարությունը ոմանց հիշեցրել է Մուսոլինիին:

-Սխալ համեմատություն է: Բոլորը պետք է հավասար լինեն, չի կարող որևէ մեկը մտնի Ազատության հրապարակ ու մեքենա վարի՝ որպես արտոնյալ: Այդ անձին իրավական դաշտ բերելը բռնակալի վա՞րք է: Ծիծաղելի է: Ի՞նչ անենք, թողնենք՝ ով ինչ ուզի՝ անի՞: Ոչ, էդպես չի լինի: Ֆեյսբուքում իրական մարդիկ, ոչ ֆեյքերը, անհարգալից արտահայտություններ են անում վարչապետի հասցեին. սա՞ է բռնատիրությունը: Ծիծաղելի է:

-Շատերի կարծիքով ատելության քարոզը տարածվում է իշխանության թողտվությամբ և հրահանգով:

-Ոչ: Իշխանությունը թավշյա հեղափոխություն արեց՝ առանց բռնության որևէ կոչի և դրսևորման: Իրենք են սկսել այդ գործելաոճը: Ֆեյսբուքում մեկը քննադատում կամ հայհոյում է իշխանությանը, մյուսը նույն բառապաշարով պատասխանում է, պատասխանողին անմիջապես կապում են իշխանության հետ, բայց նա կարող է, չէ՞, լինել սովորական մեկը, ով համակրում է իշխանությանը:

-Ի դեպ, ձեր ուժի աջակիցների 70% -անոց բանակում իրավիճակ չի՞ փոխվել, շարունակու՞մ են մնալ ձեր աջակիցները:

չ միայն մնում են, այլ ավելի ուշադիր են դարձել մեր նկատմամբ. փողոցում տեսնում են, ասում են՝դուխով, ավելի կոշտ եղեք: Մենք էլ շարունակում ենք ասել՝ ոչ, պետք է ամեն ինչ օրենքով արվի: Նրանք մեզ ասում են՝ մեկ-մեկ օրենքը պետք է դնես մի կողմ, դրանց հերն անիծես, մենք ասում ենք՝ չէ, հարգելիս, ամեն ինչ՝օրենքով:

-Ովքե՞ր են ձեր թշնամիները, ովքե՞ր կարող են լինել այդ ուղղորդված մարդիկ:

-Չեմ կարող ասել: Երևի նրանք, ովքեր վտանգ են տեսնում մեր իշխանության մեջ, ովքեր մաքուր չեն, իրենց տակ բազմաթիվ ապօրինի գործեր ունեն ու վախենում են, որ դրանք կբացահայտվեն:

-Վեթինգի մասին, պարոն Հակոբյան, ինչպե՞ս եք այդ ինստիտուտը պատկերացնում:

-Որքան ծանոթ եմ այդ գաղափարին, պետք է բացահայտվեն դատավորների նախկին կապերը, ձեռք բերած գույքը, ու հանրայնացվի: Գործընթացը իրավական տեսանկյունից մասնագետները կներկայացնեն: Ժողովրդը շարունակում է չվստահել դատական համակարգին: Յուրաքանչյուր քաղաքացի գիտի, որ այսօրվա դատավորին նախկինում վերևից ասվել է: Այս անվստահությունը մեծ խնդիր է:

-Ինչպե՞ս մարդիկ հավատան, որ դատավորը վարչապետից զանգեր չի ստանում:

-Մարդիկ արդեն գիտեն, որ այդպես է, թեպետ վստահ չեն, որ այդ նույն դատական համակարգը այլևս կախում չունի այլ ուժերից: Եթե վարչապետը ուզենար, որոշ դատավորներ իրենից կախման մեջ կլինեին:

-Դատարաններն արգելափակելու կոչը, դրան հաջորդած ակցիան համակարգը ենթարկեցնելու քայլ չէ՞ր:

-Ոչ, այդ ակցիայի նպատակն էր ցույց տալ, որ մեզ խամաճիկ դատավորներ պետք չեն: Իսկ այդպիսիք մենք հաստատ ունենք:

-Ինչպե՞ս վերջնականապես համոզվենք, որ դատական համակարգն անկախ է:

-Չգիտեմ: Պրոցես է: Կլինեն դատավորներ, որ պատասխանատվության կենթարկվեն, եթե գործարքների մեջ են եղել: Կլինեն, որ հրաժարականներ կտան, նորերը կունենանք:

-Անհրաժե՞շտ է, որ Հրայր Թովմասյանը հրաժարական տա:

-Չգիտեմ: Չեմ կարծում, որ միայն նախորդ իշխանության հետ աշխատելու համար նա պետք է հրաժարական տա: Եթե կլինեն փաստեր, որոնք կվկայեն, որ Հրայր Թովմասյանը նույնպես, ենթադրենք, ոչ այդքան մաքուր անցյալ է ունեցել, ապա …

-Շատերը պնդում են, որ Թովմասյանը նախկին իշխանության պահանջով Սահմանադրությունն է փոխել, օրենքները դարձրել նրանց քիմքին հաճելի:

-Եթե պարզվի, որ անօրինական գործողություններ են եղել իր կողմից, լավ: Սահմանադրությո՞ւն է գրել. գուցե նախկին իշխանությունն ասել է, թե ինչպիսի Սահմանադրություն է ուզում, ինքն էլ, որպես մասնագետ, գրել է: Ես այդտեղ որևէ հանցակազմ չեմ տեսնում:

-Շատ մեծ է հավանականությունը, որ ԱԺ-ն Վահե Գրիգորյանին կընտրի ՍԴ դատավորի պաշտոնում: Ինչպե՞ս եք պատկերացնում նրանց համատեղ աշխատանքը:

-Ես Հրայր Թովմասյանին գիտեմ որպես լավ իրավաբան, բայց ծանոթ չեմ նրա մարդկային որակներին: Չեմ կարող ասել՝ ինչպես կաշխատեն: Կարող եմ միայն ասել, որ Վահե Գրիգորյանը շատ լավ թեկնածու է, ես ինքս կողմ եմ քվեարկելու նրա թեկնածությանը:

-Նախագահի առաջադրած նախորդ երկու թեկնածուին դեմ էիք, որպեսզի Վահե Գրիգորյանի թեկնածությո՞ւնը ներկայացվի:

-Ոչ: Մեզ չէին գոհացրել նրանց պատասխանները: