Փաստաթուղթ եմ ստորագրել, որ չխոսեմ. Ք. Պողոսյան

հունիսի 21, 2019

Հարցազրույց ԱԺ «Իմ քայլը» խմբակցության պատգամավոր Քրիստինե Պողոսյանի հետ:

ուք ապրիլյան պատերազմի հանգամանքներն ուսումնասիրող հանձնաժողովի անդամ եք: Հանձնաժողովն արդեն երկու նիստ է գումարել: Ո՞ր փուլում եք այսօր:

երողություն եմ խնդրում, բայց չեմ կարող խոսել այս հարցի մասին: Ես շատ պատասխանատու եմ վերաբերվում քննիչ հանձնաժողովում իմ ներգրավվածությանը, դա շատ պարտավորեցնող է: Մենք փաստաթուղթ ենք ստորագրել, որով պարտավորվել ենք չհրապարակել հանձնաժողովում քննարկումների արդյունքները, քանի դեռ ընթանում է քննությունը: Նիստերը գումարվում են, աշխատանքը գնում է, առաջիկա օրերին դրանք ավելի խորքային, ավելի ընդգրկուն են դառնալու: Կարծում եմ՝ նիստերը ամենօրյա կլինեն: Բայց թե ինչ ենք քննարկել, ներեցեք, չեմ կարող փոխանցել:

-Իսկ ի՞նչ եք կարծում, ի՞նչ կարող է պարզել հանձնաժողովը:

-Հանձնաժողովը պետք է պարզի այն, ինչ եղել է: Մեր պարտավորությունն է պարզել իրականությունը, դա ներկայացնել հանրությանը և մեկընդմիշտ փակել այդ թեման, որպեսզի հանրության մոտ չլինի կասկած, թե, այնուամենայնիվ, մնացին չբացահայտված մութ անկյուններ: Ինչ կպարզվի, այս պահին ես ոչինչ չեմ կարող ասել:

-Ձեզ համար այդ իրադարձությունների մութ անկյունը ո՞րն է:

-Հիմա եթե ես ձեզ ասեմ, արդեն պետք է մանրամասնեմ՝ ինչ ենք քննարկում: Խնդրում եմ ըմբռնումով մոտենալ. ոչինչ չեմ կարող ասել: Պաշտպանության և անվտանգության հարցերի հանձնաժողովը ես մտադրված եմ ընտրել, ինձ համար այդ հանձնաժողովի շրջանակում չկան քաղաքական դիրքորոշումներ, ֆիգուրներ: Ես այդ հանձնաժողովի աշխատանքում բոլոր հարցերը դիտարկում եմ միայն երկրի անվտանգության տեսանկյունից:

-Վերջերս Դուք հայտարարեցիք մի ոչ սովորական օրենսդրական նախաձեռնության մասին, որը հոգեկան առողջության խնդիրներ ունեցող անձին պետք է արգելի դառնալ պատգամավոր: Կարո՞ղ եք այլ մանրամասներ հայտնել:

րինագիծն արդեն պատրաստ է, շուտով կներկայացնեմ գործընկերներիս դատին: Լրատվականների ջանքերով մի քիչ խեղաթյուրվեց ասելիքս: Իրականում, ես առաջարկում էի, որ կոնկրետ պաշտոնատար անձանց համար սահմանված բոլոր դրույթները կիրառվեն նաև պատգամավորների նկատմամբ: Շուտով նախագիծը կդնեմ շրջանառության մեջ, ամբողջությամբ տեսանելի կլինի: Այնպես չէր, որ ես որևէ մեկի իրավունքն եմ սահմանափակում կամ խտրական վերաբերմունք եմ ցուցաբերում: Դա բացառվում է: Ես ամենատոլեռանդ մարդկանցից մեկն եմ: Ես ուղղակի տրամաբանորեն կարծում եմ, որ այն բոլոր կետերը, դրույթները, որոնք կիրառելի են մարդկանց նկատմամբ, ում ընտրում է Ազգային ժողովը, պետք է կիրառելի լինեն նաև ԱԺ պատգամավորի նկատմամբ, որը գրելու է օրենքներ: Դրանք կարող են լինել դատավորներ, դատախազներ, իրավապահ համակարգի այլ ներկայացուցիչներ: Խոսքը միայն հոգեկան առողջության խնդիրներ ունեցողների մասին է: Կա կառավարության որոշմամբ սահմանված հիվանդությունների ցանկ, որոնք այդ պաշտոնների համար անհամատեղելիեն: Դրանք կներկայացնեմ, եթե քննարկման ընթացքում իմ գործընկերները կտեսնեն անհրաժեշտությունը:

-Ինչո՞ւ որոշեցիք այդպիսի նախագիծ գրել:

-Չի կարող օրենքը գրող մարդու համար չկիրառվել այն նորմը, որը կիրառվում է այդ օրենքը կիրառող դատավորի ու դատախազի նկատմամբ: Ես, որպես քաղաքացի, հակասություն եմ տեսել այդ ամենի մեջ:

-Անդրադառնանք նաև ՔՊ վարչության կազմին: Ձեզ բավարարո՞ւմ են ընտրության արդյունքները:

-Միանգամային: Հիանալի կազմ է ընտրվել: Ես ուրախ եմ, որ մեր վարչության 21 անդամներից 11-ը պատգամավորներ են: Խմբակցությունը կուսակցաշինության մեջ մեծ դերակատարում է ունենալու: Կազմը շատ ուժեղ է, և ես մեծ սպասելիքներ ունեմ:

-Սուրեն Պապիկյանի ընտրությունը վարչության նախագահ դիտարկվում է մարզային կառույցներն ամրացնելու փորձ, ինչը ենթադրում է վարչական ռեսուրսի կիրառում: Ի՞նչ կասեք այս մասին:

-Ոչ, այդպես չէ: ՍուրենՊապիկյանը մեծ հարգանք է վայելում կուսակցությունում: Նրա՝ տարածքային կառավարման նախարար լինելը ամենևին դեր չի խաղում: Նա մեծ հարգանք է վայելում, ու ակնկալվում էր, որ ինքը կլինի նախագահ: Իսկ այն, որ կուսակցությունը մարզային կառույցների վրա մեծ ուշադրություն է դարձնելու, դա մենք ասելենք ամենասկզբից, երբ կուսակցությունը ստեղծվել է: Հենց այդ ժամանակից մենք տարածքային կառույցներին շատ մեծ ուշադրություն ենք դարձրել:

-Վարչության ընտրությունից հետո շատերը ՔՊ-ն համեմատեցին ՀՀԿ-ի հետ, որտեղ գործադիր մարմնի մեծ մասը կառավարության անդամ էր:

-Պատկերացում չունեմ ՀՀԿ-ի կառույցի մասին: Ես ուրախ եմ ու հպարտ, որ վարչության 21 անդամներից 11-ը խմբակցության անդամ են:

-Քննադատվում է նաև վարչությունում կանանց փոքր ներկայացվածությունը: Դուք մասնակցո՞ւմ էիք վարչության ընտրություններին:

-Այո, ես մասնակցեցի, բայց չեմ ընտրվել մի քանի ձայնով: Չեմ ընտրվել, որովհետև դրանք ժողովրդավարական ընտրություններ էին, և կուսակցականները ում ուզել են, նրանց օգտին էլ քվեարկել են: Ես միշտ հպարտացել եմ ՔՊ-ի ներքին ժողովրդավարությամբ ու ընտրությունների կազմակերպման բարձր մակարդակով: Իսկ կանայք քիչ են, և դա, այո, մտահոգիչ է, բայց ոչ սարսափելի: Ընթացքում, կարծում եմ, կուղղվի: Բայց ասեմ, որ շատ կանայք էին մասնակցում ընտրություններին: Դե, հիմա այդպես է ստացվել, թող այս անգամ էլ էդպես լինի: Առաջին օրվանից լինելով կուսակցության մեջ՝ ես երբևէ չեմ տեսել խտրական վերաբերմունք կանանց նկատմամբ: Սա եղել է ուղղակի կուսակցականների ընտրությունը:

-Սասուն Միքայելյանը, որ մինչև ընտրությունը ղեկավարում էր վարչությունը, չընտրվեց. պատճառը հեղինակության անկո՞ւմն էր:

-Ես նման բան չեմ կարող ասել: Ցավում եմ, որ պարոն Միքայելյանը չընտրվեց: Կուզեի նրան նորից տեսնել վարչության կազմում: Կարծում եմ՝ պարոն Միքայելյանը չընտրվեց մեծ մրցակցության հետևանքով: Իր ծանրաբեռնվածության պատճառով նա չմասնակցեց քարոզարշավին, ինչը որոշակի ազդեցություն ունեցավ: