2020թ. բյուջեի նախագծին դեմ ենք քվեարկելու․Գ․Գորգիսյան

դեկտեմբերի 2, 2019

Հարցազրույց «Լուսավոր Հայաստան» խմբակցության քարտուղար Գևորգ Գորգիսյանի հետ։

- Պարոն Գորգիսյան, ինչո՞ւ է «Լուսավոր Հայաստանը» որոշել դեմ քվեարկել 2020թ. բյուջեի նախագծին։

- Նախագծի վերաբերյալ բազմաթիվ խնդիրներ էինք բարձրաձայնել, ընդհուպ մինչև նախագծի և «Բյուջետային համակարգի մասին» օրենքի հակասությունը։ Կոչ էինք արել շտկել խախտումը, զուգահեռաբար ներկայացրել էինք 140-ից ավելի առաջարկ մարզերում, Երևանում տարբեր ենթակառուցվածքների կառուցման, վերանորոգման համար։ Մեր դիրքորոշումը պայմանավորված էր լինելու առաջարկների նկատմամբ վերաբերմունքով։ Կառավարությունը մեր առաջարկներից շատ քիչ բան է ընդունել։ Չի ընդունվել նաև բյուջեի նախագիծը «Բյուջետային համակարգի մասին» օրենքին համապատասխանեցնելու մեր դիտողությունը։ Վարչապետ Նիկոլ Փաշինյանը քննարկման ժամանակ հայտարարեց՝ եթե ուզում եք, որ օրենքը պահպանվի, ուրեմն չեք ուզում, որ թոշակներն ու աշխատավարձերը բարձրանան։

- Ի՞նչ եք կարծում, ինչո՞ւ ձեր առաջարկները չեն ընդունվել։

- Չեմ կարող ասել։ Իսկ վարչապետի այդ հայտարարությունը մանիպուլյացիա է, որն այս անգամ չաշխատեց։ Պարոն Փաշինյանը սիրում է մեր ցանկացած քննադատություն նման կերպ խաղարկել։ Նախորդ անգամ, երբ քննադատում էինք կառավարության ծրագիրը, թե այնտեղ չկան իրատեսական ու շոշափելի դրույթներ, մեզ ասեցին՝ դուք «Սերժի մարդն» եք։ Երբ քննադատում էինք կառավարության կառուցվածքը և ասում, թե շարունակում եք հագնել Սերժ Սարգսյանի կոստյումը, մեզ նորից նմանատիպ մեղադրանք էր ներկայացվում։

- Երևանի քաղաքապետարանին մի քանի ընկերությունների կողմից «Կամազ» մեքենաներ նվիրելու իրողությունը որպես քաղաքական կամ, ինչպես գնահատում եք, կոռուպցիոն դրսևորում ազդե՞լ է ձեր այդ որոշման վրա։

- Ոչ։ Դա այլ ազդեցություն, քաղաքական այլ հետևանքներ պետք է ունենա։

- Նկատի ունեք քաղաքապետ Հայկ Մարությանի հրաժարակա՞նը։

- Այո

- Բայց քաղաքապետարանում այդ ամենի այլ բացատրություն ունեն։

- Չգիտեին, որ «Ալեքս ընդ գրուպը» պատկանում է Սամվել Ալեքսանյանի՞ն։ Դա գոհացուցիչ բացատրություն չէ։ Իրավապահներն են սկսել հարցի քննությամբ զբաղվել, և հուսանք, որ անաչառ կգտնվեն։

- Պարոն Գորգիսյան, տպավորությունն այնպիսին է, որ քաղաքական դաշտում օրակարգ թելադրում են հիմնականում արտախորհրդարանական ուժերը։ Ստեղծվեց «Վերնատուն» հասարակական-քաղաքական ակումբը, «Դաշնակցություն» կուսակցությունը բողոքի ակցիաներ է անում և պահանջում ԿԳՄՍ նախարար Արայիկ Հարությունյանի հրաժարականը: Նրանց աջակցում են Հանրապետական կուսակցությունն ու այլ ուժեր: Խորհրդարանական ուժերը չե՞ն կարողանում ավելի ակտիվ լինել:

- Արտախորհրդարանական ուժերն ավելի շատ փորձում են աղմուկ բարձրացնել, և դա ստացվում է ոչ այնքան էական ու կարևոր հարցերի դեպքում։ Նույն Արայիկ Հարությունյանի հարցը։ Վերջինը սխալ արեց, որ հայագիտական առարկաների դասավանդման կարգի նման փոփոխություն ներկայացրեց: Ես առաջարկն ընդունելի կհամարեի, եթե այն լիներ լրջագույն ռեֆորմների մի մասը։ Բուհական համակարգում, հատկապես առաջին կուրսերում, ծրագիրը ծանրաբեռնված է ոչ մասնագիտական առարկաներով։ Թերի է քննական համակարգը՝ 20 միավոր ստացած ուսանողը մտնում է բուհ և հայերենից չունի տարրական գիտելիքներ, չի կարողանում տարրական էսսե կամ շարադրություն, հետո նաև գիտական աշխատանք գրել։ Նույնիսկ ամենադրական ռեֆորմները, եթե այսպես ոտքի վրա են արվում ՝ աջ ձեռքով ձախ ականջը բռնելով, դժգոհություն են առաջացնում։

- Բայց «Լուսավոր Հայաստանը» մերժեց Արայիկ Հարությունյանի հրաժարականի գործընթաց սկսելու վերաբերյալ ՀՅԴ առաջարկը: Եվ հայտնի դարձավ, որ մեկ այլ նախարարի եք պատրաստվում նման պահանջ ներկայացնել: Ո՞ր նախարարի մասին է խոսքը:

-Ոչ թե մերժել ենք, այլև զուգահեռաբար երկրորդ նախարարի նկատմամբ չէինք կարող հրաժարականի գործընթաց սկսել: Իսկ թե ում մասին է խոսքը, շուտով պարզ կլինի, մի քիչ ինտրիգը պահենք: Նա ամենաշատ թերացած նախարարներից է, որի ձայնը հանրությունը երկար ժամանակ սպասում է տարբեր հարցերի շուրջ, բայց չի լսում: Նաև ասեմ, որ Նոր տարուն կկարողանանք մեկ այլ նախարարի մասին էլ քննարկումներ ունենալ:

- Ձեր կարծիքով՝ իշխանություններին կամ խորհրդարանական ուժերին պե՞տք է մտահոգի «Վերնատուն» ակումբի գործունեությունը:

- Կարծում եմ՝ քաղաքական դաշտի համար դրական է, երբ նոր խաղացողներ են մտնում, որովհետև ստեղծվում է մրցակցություն, քաղաքական դաշտը հարստանում է նոր մարդկանցով, գաղափարներով, ինչը միանշանակ օգուտ է ժողովրդավարությանը: Բայց երբ հին դեմքերը հին մոտեցումներով, հին մտածելակերպով ու հին գործիքակազմով փորձում են նոր բան ստեղծել, դա ոչ միշտ է դառնում նոր: Դա դառնում է մուտացիա:

- «Վերնատան» դեպքում այդ իրավիճա՞կն է:

- Կարծում եմ, այո, քանի որ այնտեղ նոր դեմք չեմ հիշում, նոր մոտեցումներ կամ գաղափարներ չկան: Համենայնդեպս դեռ չի հնչել, թե ինչ նոր տեսլական են առաջադրում Հայաստանի համար։