Սերժ Սարգսյանին, գուցե, այլ մեղադրանք էլ առաջադրվի․ Հ․Հակոբյան

դեկտեմբերի 11, 2019

Հարցազրույց «Իմ քայլը» խմբակցության պատգամավոր Հրաչյա Հակոբյանի հետ

-Պարոն Հակոբյան, զարմացա՞ք, որ երրորդ նախագահ Սերժ Սարգսյանին մեղադրանք առաջադրվեց։

-Մի փոքր զարմացել եմ, որ մեր հասարակության որոշ շերտեր ասում են, թե այսքանից հետո ընդամենը 1 մլն դոլարի գործ են հարուցել։ Կարծում եմ՝ այդ զարմանքը մի փոքր ծիծաղելի է, քանի որ մարդիկ 1 մլն դոլարի մասին այնպես են խոսում, կարծես դա փողոցում ոտքի հետ գնում է։

-Ոտքի հետ չի գնում, բայց ելնելով իշխանության տարբեր ներկայացուցիչների ու անձամբ վարչապետ Նիկոլ Փաշինյանի հայտարարություններից, թե նախկինում համակարգված թալան է եղել, կոռուպցիա, որ գործարարներն ու պաշտոնյաները Բաղրամյան 26 ճամպրուկներով փողեր են տարել, 1 մլն դոլարն իսկապես ծիծաղելի փոքր է։

-Թերևս գործընթացը դեռ շարունակվում է, և այլ գործեր էլ կլինեն: Ժողովուրդն էր կոռուպցիայի մասին աղաղակում, ու դրա արդյունքում է հեղափոխությունը եղել։ Իսկ այդ կոռուպցիան նախկինների կողմից այնքան գրագետ է արվել, որ հիմա, այո, մեր իրավապահ մարմինները դժվարանում են պոչը բռնել, բայց վստահ եմ, որ կծիկը կբացվի: Ինչ վերաբերում է, Սերժ Սարգսյանին, նրան, կարող է, այլ մեղադրանքներ էլ առաջադրվեն:

-Մարտի 1-ի՞ գործով:

-Գուցե այլ կաշառքի դեպքեր լինեն, գուցե նույն Մարտի 1-ի գործով:

-Մարտի 1-ի գործով մեղադրյալ, պաշտպանության նախկին նախարար Սեյրան Օհանյանն ասում էր, թե Մարտի 1-ի գործը վերաբերում է նախկին 3 նախագահներին, և արդարացի չէ, որ մեղադրանք է առաջադրվել միայն երկրորդ նախագահ Ռոբերտ Քոչարյանին: Համաձայն չե՞ք նրա հետ:

-Ես չեմ կիսում այդ կարծիքը, դա իրավապահ մարմինների որոշելիք հարցն է: Եթե Սեյրան Օհանյանի ասելով լինի, դա կլինի ռեպրեսիա, պատվիրված քրեական գործ: Եթե մեր իրավապահ մարմինները հանցանք տեսնեն Սերժ Սարգսյանի գործողություններում, այո, նա էլ պետք է պատասխանատվության ենթարկվի, եթե հանցանք տեսնեն Լևոն Տեր-Պետրոսյանի մասնակցության մեջ, ապա նա էլ կենթարկվի:

-Առաջին նախագահ Լ.Տեր-Պետրոսյանի գործողություններում Դուք հանցանք տեսե՞լ եք:

-Նախորդող 10 տարիներին նրան այդպես էլ չկանչեցին դատարան ու պատասխանատվության չենթարկեցին: Մինչդեռ ՀՀԿ-ականներն անընդհատ ասում էին, թե Մարտի 1-ի համար Լևոն Տեր-Պետրոսյանն է մեղավոր: 10 տարի իշխանության էիք, մեղավո՞ր էր, պատասխանատվության ենթարկեիք: Ես նրա արարքներում, կարող է, մեղքի նշույլ տեսնեմ, բայց դա ոչ թե քրեական հանցանք է, այլ, միգուցե եղել են կազմակերպչական սխալներ:

-Սերժ Սարգսյանը կամ նրա կուսակիցները ժամանակ առ ժամանակ հայտարարում են, որ շուտով նա խոսելու է: Եվ տպավորություն կա, թե ինչ-որ բան է բացահայտելու: Մտահոգություն չունե՞ք, որ նա կխոսի ու ձեր իշխանության մասին ինչ-որ բացահայտումներ կանի:

-Որևէ բան կուլիսներում չի եղել, չի թաքցվել, որ Սերժ Սարգսյանը կարողանա այնպիսի բան ասել, որ հանրությունը չիմանա:

-Նախկինները ասում են, որ խորհրդարանական ընտրություններից մեկ տարի հետո ձեր վարկանիշն ընկել է: Դա մտահոգո՞ւմ է ձեզ:

-Նախկին իշխանությունն ինչ ասում է, իրականությունը դրա հակառակն է: Նրանք այնպես են ներկայացնում, որ եթե վաղը ընտրություն լինի, մեր դաշինքը զրո տոկոս կհավաքի: Մեր վարկանիշը միգուցե 71 տոկոս չէ, ասենք, 67 տոկոս է: Աշխատանքից հետո ես մշտապես զբոսնում եմ փողոցներով, ընկերներով սրճարան ենք գնում, և մարդիկ մոտենում են, խոսում ենք, շնորհակալություն են հայտնում: Լինում է, որ դժգոհում են, թե նախկիներին ինչու չեք պատժում: Դրանից հասկանում եմ, որ մեր վարկանիշը եթե անգամ տատանվել է, ապա շատ չնչին չափով: Դա էլ բնական է, քանի որ տարբեր ակցիաներ են եղել՝ Ամուլսարի դեպքերը կամ վերջերս Մետրոպոլիտենի Հանրապետության հարապարակ կայարանի հարակից տարածքի ակցիան: Բայց դրանց զուգահեռ թող հարցում անեն ու պարզեն, թե մարդիկ որքան են գոհ մեր վերանորագած ճանապարհներից:

-Նախկին իշխանություններից բացի ձեր նկատմամբ սուր դժգոհությունն ու քննադատություն են հնչեցնում նաև է խորհրդարանական ընդդիմադիր ուժերը՝ «Բարգավաճ Հայաստանը» և «Լուսավոր Հայաստանը»: Դա չի՞ նշանակում, որ ձեր նկատմամբ, այնուամենայնիվ, հանրային որոշ դժգոհություն կա

-Նրանց քննադատությունները որոշ դեպքերում օբյեկտիվ են, որոշ դեպքերում էլ պոպուլիստական հայտարարություններ են:

-Նիկոլ Փաշինյանն ու իշխանության այլ ներկայացուցիչներ նախկինում քննադատում էին նաև ԲՀԿ ղեկավար Գագիկ Ծառուկյանին ու նրա կուսակիցներին՝ հիշատակելով նրանց վերագրվող ինչ-ինչ չարաշահումններ: Ինչո՞ւ դրանց վերաբերյալ գործեր չեն հարուցվում, թե՞ այդ մարդկանց վերագրված հանցագործություններն իրականությանը չեն համապատասխանում:

-Մենք շատ գործընթացներին չենք տիրապետում, զարգացումներ կան, որոնց մասին դեռ չի բարձրաձայնվել: Վաղը, եթե որևէ ԲՀԿ-ականի նկատմամբ գործ հարուցվեց, չասենք, թե դա ճնշում է: Ոչ, կան հանրությանը ոչ տեսանելի գործընթացներ, որոնց մասին իրավապահները կհայտնեն անհերքելի ապացույցներ հայտնաբերելուց հետո:

-Պարոն Հակոբյան, դատելով օրերս ԱԺ-ում Ձեր ելույթից՝ չե՞ք ծխում։

-Հազվադեպ եմ ծխում։ Ցերեկը տանը, աշխատավայրում, ավտոմեքենայում երբեք չեմ ծխում։ Երեկոյան մութ սրճարանում մի բաժակ գինու հետ՝ միգուցե ծխեմ։

-Օրական քանի՞ գլանակ եք ծխում։

-Կարող է՝ 4-5 օր կամ մեկ շաբաթ չծխեմ, և կարող է՝ մի երեկո 5 հատ ծխեմ։

-Դրա համար էլ չեք հասկանում ծխողներին ու կոչ եք անում նրանց «վտարանդի» համարել։

-Վտարանդին սխալ ընտրված և դահլիճից սխալ հուշած բառ էր, ի սկզբանե ընտրել էի «изгой» բառը, որը վտարանդին չէ, ելակետային բառը մեկուսացվածն էր։ Այսինքն, ծխողներն իրենց պետք է մեկուսացված զգան։ Երբ ուզում ենք, որ մեր երեխաները չծխեն, ինքներս պետք է օրինակ ցույց տանք՝ չպետք է նստենք տանը կամ սրճարանում և ծխենք, խմենք ու կինո նայենք։ Մենք պետք է ստիպված լինենք ոչ հարմարավետ միջավայրում ծխել և մեզ մեկուսացված զգալ։ Այդ օրինակով մեր երեխաները կտեսնեն, որ դա լավ բան չէ։

-Բոլոր երկրներում էլ կա վեճ, որ ծխախոտի արտադրության դեմ պայքարը և ծխելու կամ ծխախոտի արտադրության կրճատումը տնտեսություններին մեծ վնաս կհասցնի: Մեր երկրում նույնպե ծխախոտագործությունը արտադրության հիմնական ոլորտներից է:

-Համաձայն չեմ: Մարդն ասում է՝ պարապությունից եմ ծխում կամ նյարդայնացել էի, ծխեցի։ Երկու դեպքում էլ եթե չծխի, մի բան է անելու կամ մի կոնֆետ է ուտելու։ Այսինքն, այդ նույն գումարն ինչ-որ բանի վրա է ծախսվելու և գնալու է տնտեսությանը։