Սերժ Սարգսյանի պատասխանները կարևոր են լինելու․ Գ․ Գորգիսյան

ապրիլի 15, 2020

Հարցազրույց «Լուսավոր Հայաստան» խմբակցության պատգամավոր Գևորգ Գորգիսյանի հետ

-2016թ. ապրիլյան քառօրյայի հանգամանքները ուսումնասիրող քննիչ հանձնաժողով-Սերժ Սարգսյան նամակագրությունից կարո՞ղ ենք ենթադրել, որ ՀՀ երրորդ նախագահ Սերժ Սարգսյանը կգա Ազգային ժողով և կպատասխանի հանձնաժողովականների հարցերին:

-Ըստ նամակի`իր մասնակցության համար Սերժ Սարգսյանը կարևորել է հարցուպատասխանի արձանագրությունը ունենալու հնարավորությունը: Մենք դրան դեմ չենք, ուղղակի մեր պահանջն այն է, որ իր կողմից էլ պահպանվի անվտանգության և գաղտնի նյութերի հետ աշխատելու կանոնները:

-Այսինքն, չպիտի՞ հրապարակի:

-Ոչ միայն չպիտի հրապարակի, այլև պիտի պահվի այնպես, որ ուրիշների ձեռքում չհայտնվի և չհրապարակվի: Հակառակ պարագայում դա օրենքի խախտում կհամարվի: Մենք գոնե ինչ-որ երաշխիքներ պիտի ունենանք, որ այդպես չի լինի: Ամեն դեպքում, Սերժ Սարգսյանը եղել է ՀՀ նախագահ, և հաշվի առնելով նրա անցած ճանապարհը`կարծում եմ, որ լավ տիրապետում է գաղտնի նյութերի հետ աշխատելու կանոններին:

-Որպես այդ հանձնաժողովի անդամ, ի՞նչ հարց եք ուղղելու Սերժ Սարգսյանին:

-Այս ընթացքում փաստաթղթերն ուսումնասիրելուց, շրջանառվող տարաբնույթ դավադրությունների տեսություններից ու բամբասանքներից մի քանի հարց է առաջացել, որոնք, ի վերջո, պետք է պատասխան ստանան: Հարցերը չեմ կարող հրապարակել, բայց կարևոր եմ համարում դրանց տրվելիք պատասխանները:

-Հանձնաժողովում կուտակված նյութերը ի՞նչ են հուշում՝ արդյո՞ք պատերազմը պայմանավորված է եղել, եղե՞լ են դրա մասին տեղեկություններ:

-Այդ հարցին դեռ չեմ կարող պատասխանել, բայց վստահեցնում եմ, որ մեր վերջնական եզրակացության մեջ բոլոր պատասխանները կլինեն:

-Վարչապետ Նիկոլ Փաշինյանը մոտ 1,5 տարի առաջ հայտարարեց, թե մեր հակահետախուզությունը տեղեկատվության պակաս չի ունեցել: Ի՞նչ է դա նշանակում:

-Դա դեռ պետք է ապացուցվի, միայն հայտարարությունը մենք չենք կարող եզրակացության հիմք ընդունել: Մենք ուսումնասիրում ենք փաստաթղթեր, որոնց մեջ կարող են լինել կամ չլինել նման տեղեկություններ: Չեմ ուզում ժամանակից շուտ նման հարցերի պատասխանել, որովհետև հանձնաժողովում կա գաղտնիության ռեժիմը պահելու պայմանավորվածություն: Մենք պետք է տարանջատենք՝ հավաքված նյութերից որն է հրապարակման ենթակա, որը պիտի ուղարկվի հատուկ մարմիններին, բանակին` այնտեղ փոփոխություն կատարելու առաջարկի տեսքով, միգուցե իրավապահներին, որոշ առաջարկներ` միգուցե ԱԺ-ին օրենսդրական նախաձեռնություններ անելու համար: Վերջնական փուլին մնացել է մեկ-երկու ամիս, և մենք կտանք բոլոր հարցերի պատասխանները: Այնուամենայնիվ, կարող եմ ասել, որ մենք ունենք գրեթե բոլոր հարցերի պատասխանները, պարզապես պետք է մի քանի կարևոր նրբություններ ճշտել: Կարծում եմ՝ Սերժ Սարգսյանն այդ հարցերի պատասխանները կտա:

-Ինչո՞ւ եք վստահ, որ ձեր հարցերին տրվելու են ճիշտ պատասխաններ:

-Նա է եղել գլխավոր գերագույն հարամանատարը, և չեմ կարծում, որ տեղյակ չի լինի հարցերից, որոնք պատրաստվում ենք նրան ուղղել:

-Իսկ հնարավո՞ր է, որ Սերժ Սարգսյանից հետո գլխավոր շտաբի նախկին պետ Յուրի Խաչատուրովը ևս համաձայնի գալ հանձնաժողով:

-Ի սկզբանե համարում էի, որ նա պետք է գար, որովհետև լինելով այդ պաշտոնին`պիտի շահագրգռված լինի, որ մենք կարողանանք բացահայտել բանակի թերացումները, որպեսզի հաջորդ անգամ չկրկնենք նույն սխալները: Կարծում եմ՝ նա պարտավոր էր գալ ու աջակցել բանակն ավելի անթերի ու մարտունակ դարձնելու գործում: Հուսով եմ, որ Յուրի Խաչատուրովը դեռ կմտքափոխվի ու կգա:

-Նա կարո՞ղ է ունենալ ինչ-որ տեղեկություններ, որին չի տիրապետում Սերժ Սարգսյանը:

-Չեմ կարծում:

-Իսկ ո՞վ է եղել այն գեներալը, որը լսելով Ադրբեջանի հարձակման մասին` շարունակել է բիլիարդ խաղալ:

-Դուք խոսում եք մամուլի անհիմն բամբասանքների մասին, որոնք մենք պետք է փարատենք մեր վերջնական եզրակացության մեջ: Մեզ արդեն հաջողվել է պարզել երկու կարևոր բան, որ մեր տղաները առաջնագծում սննդի և զինամթերքի պակաս չեն ունեցել: Երբեմն ունեցել ենք դրանք ժամանակին հասցնելու խնդիր:

-Իսկ ինչպե՞ս եք գնահատում առաջին նախագահ Լևոն Տեր-Պետրոսյանի այն հայտարարությունը, թե կորոնավիրուսի համաճարակի շրջանում ցանկալի կլիներ սառեցնել քառօրյայի հանգամանքներն ուսումնասիրող ժամանակավոր հանձնաժողովի աշխատանքը:

-Դա անելու իրավական որևէ մեխանիզմ չկա, և ես չեմ էլ կարծում, որ հիմա դրա անհրաժեշտությունը կա, որովհետև մենք սահմանափակված ենք ժամկետներով` եզրակացությունը պետք է տանք մինչև հունիս:

-Հանձնաժողովն ու հատկապես նախագահ Անդրանիկ Քոչարյանը հաճախ են քննադատվում Քառօրյայի թեման քաղաքականացնելու, հարցազրույցի եկող նախկին պաշտոնյաների նկատմամբ հեգնանքով արտահայտվելու համար:

-Նման մեկնաբանություններ նկատել եմ մամուլում, սոցցանցերում, բայց պետք է ասեմ, որ հանձնաժողովը սահմանադրական մարմին է, և մարդիկ, որոնք խոսում են այդ կառույցի մասին, պետք է հարգանք ունենան ՀՀ պետականության և դրա տարր հանդիսացող սահմանադրական մարմինների նկատմամբ: Որպես ընդդիմության ներկայացուցիչ, հանձնաժողովի ստեղծման օրվանից ասել եմ, որ անձամբ ես երբևէ թույլ չեմ տա, որ այն վերածվի քաղաքական շահարկումների կամ, ինչպես վախենում էին ՀՀԿ-ական մեր որոշ գործընկերները, քաղաքական հետապնդումների գործիքի: Բարեբախտաբար, այդպիսի փորձ անգամ չի եղել: Մեր աշխատանքներն ուղղված են փաստերն ուսումնասիրելուն և դրանց հիման վրա եզրակացություն կազմելուն, ինչն էլ ուղղված կլինի բանակի խնդիրների շտկմանը: