Դժվար է փաստերով ապացուցել Միքայել Մինասյանի և ԼՀԿ-ի համագործակցությունը

մայիսի 1, 2020

Հարցազրույց «Իմ քայլը» խմբակցության պատգամավոր Հովիկ Աղազարյանի հետ։

-Պարոն Աղազարյան, լարվածությունը «Իմ քայլը» և «Լուսավոր Հայաստան» խմակցությունների միջև վերջին օրերին ավելի է սրվել. ո՞րն է պատճառը Ձեր կարծիքով:

-Դժվար հարց է: Եթե հանենք այն պահը, որ պատգամավորները միմյանց անձնական վիրավորանքներ ուղղեցին, ապա կատարվածը ամբողջությամբ տեղավորվում է խորհրդարանական կյանքի տրամաբանության, ընդդիմադիր գործունեության տրամաբանության մեջ։ Անձնական վիրավորանքն էր մեզ համար անթույլատրելի։ Եթե դա հանենք, ապա մնացածը տեղավորվում է պառլամենտական պայքարի ործունեութան շրջանակում։

-Ինչո՞ւ են Ձեր թիմակիցները անընդհատ հիշում անցյալը և խոսում «Լուսավոր Հայաստան»-ի ու Միքայել Մինասանի համագործակցության մասին:

-Իմ թիմակիցները, սովորաբար, արձագանքում են «Լուսավոր Հայաստանի» ոչ կոռեկտ արտահայտություններին և ոչ թե նախաձեռնում դրանք:

-Ի՞նչ ոչ կոռեկտ հայտարարություններ են արել ԼՀԿ-ից։

-Դե, օրինակ, Անի Սամսոնյանի մտքերը Ալեն Սիմոնյանի հետ կապված։ Ո՞նց կարելի է Ազգային ժողովի պատգամավորին, որը 22 հազար ձայն է հավաքել, ընտրվել է ԱԺ փոխնախագահ, որը նաև «Քաղաքացիական պայմանագիր» կուսակցության վարչության անդամ է, նման ձևակերպում տալ: Ես հիմա չեմ էլ ուզում արտաբերել։ Ինչպե՞ս կարելի է դա մեկնբանել։ Մարդը ընտրովի մակարդակներում հաջողություններ է արձանագրել։ Այդ պատգամավորի հայտարարությունների մեջ քաղաքական տեքստ չկար, հետևաբար, դրան հաջորդեց իմ գործընկերների արձագանքը, որոնք պաշտպանեցին Ալեն Սիմոնյանին։

-ԼՀԿ-ի՝ Միքայել Մինասյանի հետ համագործակցելու փաստեր Ձեր թիմում ունե՞ն, թե՞ անհիմն խոսակցություններ են: Նրանք պարբերաբար նման պնդումներ են անում ԱԺ ամբիոնից։

-Նման դրսևորումները և այդ մասին հայտարարությունները փաստերով հիմնավորելը բավականին դժվար է, որովհետև, եթե կան այդպիսի դրսևորումներ, ապա դրանք իրականացվում են շատ կոնսպիրատիվ մակարդակով։ Խոսքը այն քաղաքական կուրսի, այն դիրքորոշման մասին է, որին հարում է տվյալ քաղաքական ուժը: Մարդիկ հետազոտում, նայում են, որ այս-այս քաղաքական գիծն է առաջ տանում տվյալ քաղաքական ուժը, ինչը համընկնում է կամ մոտ է այդ անձի դիրքորոշմանը։ Ամեն ինչ համեմատության մեջ է երևում։

-Բայց պնդումներ են արվում, կարծես փաստեր կան։

-Անձամբ ես այդպես եմ կարծում, միգուցե իմ գործընկերներն ունեն կոնկրետ փաստեր։ Ես կարող եմ, օրինակ, քաղաքական որևէ հակառակորդի հանդիպել, սուրճ խմել, քննարկել հարցեր, բայց դա չի նշանակի, որ ես կիսում եմ նրա քաղաքական գիծը կմ տեսակետները։ Ես կարող եմ չհանդիպել նրան, բայց իմ գործելաոճը, քաղաքական դիրքորոշումները համընկնեն այն գծի հետ, որն ունի տվյալ անձը կամ քաղաքական ուժը։

-Պարոն Աղազարյան, մամուլը վերջին շրջանում շատ ակտիվ գրում է, որ «Իմ քայլում» պառակտումներ կան: Նշվում է, որ որոշ պատգամավորներ վայր են դնելու մանդատը։ Կա՞ նման բան։

-Չէ, պառակտումներ խմբակցությունում, բարեբախտաբար չկան՝ ի հեճուկս մեր քաղաքական հակառակորդների։ Իհարկե, շատ հարցեր կան, որոնց շուրջ խմբակցությունում քննարկումների ժամանակ տարբեր տեսակետներ են հայտնվում, բայց դա չի ենթադրում, թե կան պառակտումներ։ Նման դրսևորում ես չեմ նկատում։

-Իսկ Նիկոլ Փաշինյանը ոմանց մանդատից հրաժարվելու մասին խոսե՞լ է:

-Համենայնդեպս, ես էդպիսի ինֆորմացիա չունեմ։

-Ձեր գործընկերը հայտարարություն էր արել՝ ակնարկելով, որ հնարավոր է ԱԱԾ նախկին տնօրեն Արթուր Վանեցյանը հավաքագրված լինի օտար գործակալների կողմից։ Դուք նման բան հնարավոր համարո՞ւմ եք։

-Ես այդ մասին ոչ մի բան չեմ կարող ասել։ Ես Վանեցյանին երբեք չեմ ճանաչել, ուղղակի երբ ԱԱԾ տնօրենի պաշտոնում էր, առիթ է եղել մի քանի անգամ շփվելու։ Հետևաբար, ես նման գնահատական չեմ կարող տալ, քանի որ այդ ոլորտից շատ հեռու եմ ու չեմ տիրապետում նրբություններին։

-Ձեր կարծիքով՝ կարո՞ղ է Վանեցյանը հայտնվել ապօրինի գույքի բռնագանձման մասին օրենքի գործունեության դաշտում։

-Իհարկե, կարող է։

-Այսինքն, ապօրինի կուտակած հարստություն ունի՞։

-Բոլորը, այդ թվում՝ ես կարող ենք ընկնել այդ օրենքի կիրարկման տիրույթում: Ես չեմ կարող ասել, որ նա ապօրինի գույք ունի, պետք է համապատասխան մարմինները ստոգեն։ Բայց այն, որ ինքն էլ, ես էլ, շատերը կարող են ընկնել այդ օրենքի կիրարկման տակ, հաստատ է։