Վտանգավոր մթնոլորտ է․հանդուրժողականություն է պետք

մայիսի 4, 2020

Հարցազրույց «Բարգավաճ Հայաստան» խմբակցության քարտուղար Արման Աբովյանի հետ։

-Պարո՛ն Աբովյան, Ձեր կարծիքով՝ Ալեն Սիմոնյանի և Անի Սամսոնյանի վեճն ու փոխադարձ վիրավորանքները պայմանավորված էին համաճարակային իրավիճա՞կով, թե՞ դա «Իմ քայլի և «Լուսավոր Հայաստանի» քաղաքակա ն տարաձայնությունների արտահայտություն էր:

-Չեմ ցանկանում անձնավորել, բայց երևույթը սխալ էր: Խորհրդարանական երկիր ենք, և պետք է ամեն ինչ անենք, որ խուսափենք նման իրավիճակներից: Բայց ես ավելի չեմ ողբերգականացնի տեղի ունեցածը: Մենք միանշանակ կիսում ենք տեսակետը, որ պետք է հանդուրժողականության, համերաշխության, իրար լսելու մշակույթ ներդնել և հետամուտ լինել, որ հետագայում նման դրսևորումները չկրկնվեն:

- Նո՞ւյնն է նաև Ալեն Սիմոնյանի և «Ադեկվատ» կուսակցության անդամ Արթուր Դանիելյանի միջև տեղի ունեցածի գնահատականը:

- Այո, նորից նույնը կասեմ: Բայց այդ գործը իրավապահների մոտ է, քննությունը կավարտեն, նոր եզրակացություն կանենք:

- Ընդունվեց քրեական ենթամշակույթը քրեականացնող օրենքը, բայց երևույթը էլի կա, ու ոչինչ, կարծեք, չի փոխվել: Ինչի՞ հետևանք էին Նորատուս գյուղում տեղի ունեցած սպանությունները:

- Մենք պետք է հստակ հասկանանք, թե ինչ է քրեական ենթամշակույթը: Դրա տակ կարելի է հազար ու մի բան դիտարկել: Օրինակ, հասարակ վիճաբանությունն էլ կարող է լինել քրեական ենթամշակույթի արտացոլում: Խոսքը խորհրդարանի մասին չէ: Երբ ընդունվում էր այդ օրենքը, բազմիցս ընդգծել ենք, որ պետք է հստակ չափանիշներ սահմանել: Ինչ վերաբերում է Նորատուսում տեղի ունեցածին, դա մեծ խնդիր է: Երկու տարի է անցել, բայց բավականին լուրջ անհանդուրժաղություն կա հասարակության մեջ, սևերի ու սպիտակների, ճամբարների բաժանելը անթույլատրելի է: Դա առաջ է բերել է իրավիճակներ, որը վաղ թե ուշ պայթելու են: Այդ մասին մենք զգուշացնում էինք:

- Իրավապահների անգործություն կա՞ր Նորադուսում տեղի ունեցած սպանությունների դեպքում:

- Գործը է քննական փուլում է, և իրավապահների գործողությունների մասին եզրակացություններ կարելի է անել միայն քննությունից հետո կամ երբ հասկանալի կլինի այդ գործողությունների տրամաբանությունը: Քանի դեռ իրարամերժ, կցկտուր տեղեկություններ են շրջանառվում, դժվար է գլուխ հանել:

- Իշխանությունից ի՞նչ եք ակնկալում հանդուրժողականության մթնոլորտ ձևավորելու համար:

- Ակնկալում եմ, որ կանեն ամեն ինչ, որ ատելությունն ու անհանդուրժողականությունը նվազեցնեն: Հակառակ պարագայում՝ կլինենք ավելի ծանր իրավիճակում: Շատ վտանգավոր մթնոլորտ է:

- Չե՞ք կարծում, որ նախկին իշխանությունն էլ է նպաստում անհանդուրժողականության մթնոլորտին:

- Խնդիրը չպետք է դիտարկել նախկինների-ներկաների, սևերի-սպիտակների հարթության վրա, հասարակության մեջ համերաշխության և իրար լսելու մշակույթի անհրաժեշտություն կա: Եթե անգամ դիմացինդ մի բան է ասում, որը քեզ դուր չի գալիս, միևնույնն է, պետք է լսես:

- Իշխանությունն ասում է, թե նախկինները անհանդուրժող են, պայքարում են իրենց դեմ, քանի որ իրենք բացահայտում են նրանց կատարած հանցանքներն ու թալանը:

- Եթե մենք սկսենք վերլուծել նախկինների ու ներկաների փաստարկները, կտեսնենք, որ ոչ մեկ չի ընդունում, որ ինքն է հրահրում այս անհանդուրժողականությունը, մինչդեռ ինչ կատարվում է քաղաքական դաշտում, արտացոլվում է հասարակության վրա:

- Իսկ ինչպե՞ս եք վերաբերվում նախկին պաշտոնյանների հետ կապ ունեցող քրեական գործերին: Գլխավոր դատախազ Արթուր Դավթյանն ասաց, որ աննախադեպ ծավալների հասնող գործ է, մոտ հարյուր ընկերություն համակարգված կերպով ներգրավված է եղել չարաշահումների մեջ:

- Ես չեմ գնահատի իրավապահների մոտ գտնվող քրեական գործերը, մինչև չհասկանամ դրանց իրավական հիմքը:

- Կաշառք տալու, փողերի լվացման ու այլ մեղադրանքներով կալանավորված է նաև ձեր կուսակցության ղեկավար Գագիկ Ծառուկյանի ընտանիքին պատկանող «Մուլտի կոնցեռն գրուպի»-ի տնօրեն Սերգեյ Առուստամյանը: Եվ կարծիք կա, թե այդ պատճառով դուք կաշկանդված եք իշխանությունների ու իրավապահների գործողություններին գնահատական տալուց:

- Ոչ, մենք ոչ մի պարագայում կաշկանդված չենք եղել և չենք լինելու, այդ գործն էլ է իրավապահների դաշտում, և հաշվի առնելով բոլոր հանգամանքները` եզրակացությունները կարվեն քննության ավարտից հետո: