«Խնդիրը մինչև վերջ գնալն է»․ Սոս Ավետիսյան

հունիսի 21, 2020

Հարցազրույց «Իմ քայլը» խմբակցության պատգամավոր Սոս Ավետիսյանի հետ

-Չե՞ք կարծում, որ Գագիկ Ծառուկյանին անձեռնմխելիությունից զրկելու և քրեական հետապնդում իրականացնելու գործընթացը նաև քաղաքական պատճառներ ունի, ինչպես պնդում են ԲՀԿ-ականները և ԲՀԿ ղեկավարը: Ի վերջո, նրան առնչվող քրեական գործերն ի հայտ եկան հունիսի 5-ի հայտնի ելույթից հետո:

-Պարոն Ծառուկյանի ասածը իրականության հետ քիչ կապ ունի, բայց նա, ամենայն հավանականությամբ, իրավապահ համակարգում ունեցած կապերի շնորհիվ տեղեկացել է եղած քրգործերի մասին և արել այդ հայտարարությունը: Այդ հայտարարությամբ նա փորձ է արվել ստեղծել կերպար, թե դարակազմիկ բան է ասել, դրա համար էլ իր դեմ գործընթաց են սկսել: Մենք գիտենք, որ իրավապահ, հարկային-մաքսային և այլ համակարգերի փոփոխությունները նրանց դուր չեն գալիս. հասկացել են, որ Հայաստանում արդեն օրենքի առջև բոլորն են հավասար: Հենց դա է նրա հայտարարությունների պատճառը:

- Իշխանությանը մեղադրում են հեղափոխությունից անմիջապես հետո Գագիկ Ծառուկյանի խախտումներին առնչվող գործերի քննություն չսկսելու համար, հատկապես որ այդ մասին խմբագիր և ընդդիմադիր պատգամավոր Նիկոլ Փաշինյանը բարձրաձայնել է: Ինչո՞ւ նախ համագործակցեցիք նրա հետ, և երկու տարի հետո միայն այդ գործերը հարուցվեցին:

- Վարչապետի պաշտոնը ստանձնելուց հետո Նիկոլ Փաշինյանը հայտարարեց, որ պատկերացնում էր խնդիրների լրջությունը, բայց չէր պատկերացնում, որ դրանք այդքան մետաստազներ ունեն: Քրեական գործերի ընթացքը քաղաքական իշխանության կամքով չէ, իրավապահ մարմինների դատին է թողնված: Մեր խնդիրն է ապահովել, որ իրավապահներն իրենց գործն անեն արդյունավետ մեխանիզմներով: Ինչ վերաբերում է 2018թ. Գագիկ Ծառուկյանի հետ ստորագրած հուշագրին, ապա այն բացառապես միտված էր արտահերթ խորհրդարանական ընտրություններ անցկացնելուն: Ընտրությունները եղել են ազատ, արդար, թափանցիկ և մրցակցային` որևէ կասկած, բողոք չի եղել որևէ մասնակցի կամ միջազգային հանրության կողմից:

- Գագիկ Ծառուկյանին առաջադրված` կազմակերպված ընտրակաշառք բաժանելու մեղադրանքի հիմքում միայն Գեղարքունիքի մարզում հայտնաբերված փաստերն են: Ճիշտ չէ՞ր լինի, որ վարչապետը իրավապահներին հանձնարարեր քննութուն սկսել նաև մյուս մարզերում, Երևանում և ընտրություններին մասնակցած մյուս կուսակցությունների նկատմամբ:

- Գեղարքունիքում տեղի ունեցածը բացահայտվել է Քաղաքաշինության կոմիտեի նախկին նախագահ Վահագն Վերմիշյանի գործի շրջանակում, բայց ես վստահ եմ՝ իրավապահ մարմինները կհասկանան, որ անհրաժեշտ է լայնամասշտաբ դիտարկել այդ քարտեզագրումները, քանի որ ընտրությունները տեղի են ունեցել ողջ հանրապետությունում, և որին մասնակցել են մի շարք կուսակցություններ: Հանդուրժողականություն չպետք է լինի:

- ՀՀ-ում ՌԴ դեսպանը հանդիպեց ԲՀԿ պատգամավորների հետ, ՌԴ իշխող կուսակցությունը սատարող հայտարարություն տարածեց: Նման հայտարարություններ արեցին նաև Եվրոպական ԵԺԿ-ն և Պահպանողական կուսակցությունը: Ճնշո՞ւմ կա Հայաստանի վրա:

- Համաձայն չեմ, թե մեր որևէ միջազգային գործընկեր մեզ ճնշելու փորձ է անում: Արտահերթ խորհրդարանական ընտրություններից և ամբողջական իշխանության ձևավորումից հետո որևէ մեկը չի կարող Հայաստանի վրա ճնշում գործադրել, բայց նորմալ է, որ գործընկեր կուսակցություններին աջակցող քայլեր են արվում: ՌԴ դեսպանը հանդիպման առաջարկ է արել նաև ԱԺ փոխխոսնակ Ալեն Սիմոնյանին: Ինչ վերաբերում է տարբեր ցածրակարգ պրոպագանդիստական հեռուստաալիքներ գնալուն, վիզ ծռելուն, դա թողնում եմ այդ մարդկանց պարկեշտությանը: Մենք, գուցե, թերացել ենք ու մեր միջազգային գործընկերներին չենք տեղեկացրելու, թե Հայաստանում տարիներ շարունակ կոռուպցիայի ինչ մակարդակ է եղել: Միգուցե մենք չենք կարողացել նրանց բացատրել, թե ինչ է նշանակում պետության զավթումը:

Այս և նման այլ գործերով ձևավորվում են փաստական հենքեր, և եթե մեր միջազգային գործընկերները ուշադիր լինեն ՀՀ-ում տեղի ունեցող գործընթացներին, կոռուպցիայի դեմ պայքարի հետևողականությանը, ինդեքսների փոփոխությանը, բավական լուրջ պատկեր կունենան: Վստահ եմ, որ մեր ծանրակշիռ գործընկերներն այդպես էլ անում են: Մենք պետք է բացատրենք, թե ինչպես է ստացվում, որ ՀՀԿ-ն, ԲՀԿ-ն ու մյուսները 2017թ. ընտրություններին ստանում են հարյուր հազարավոր ձայներ, բայց 2018թ.`իրենց կուսակցության անդամների քանակից էլ քիչ քվե:

- Ասացիք, թե Գագիկ Ծառուկյանն ամենայն հավանականությամբ իրավապահ համակարգում ունեցած կապերով է տեղեկացել, որ իր դեմ քրեական գործեր են հարուցվում, և այդ պատճառով է արտահերթ նիստ հրավիրել ու քաղաքական հայտարարություն արել: Այդ դեպքում արդարացված չե՞ք համարում քննադատությունը՝ հեղափոխությունից հետո դատաիրավական ոլորտում խոստացված վեթինգը չկիրառելու վերաբերյալ. Ի վերոջ, համակարգից արտահոսքը նաև դրա հետևանքն է:

- Եթե ես մնայի քաղհասարակության ոլորտում և գործընթացները կողքից դիտարկեի, գուցե ես էլ ասեի, թե ավելի կտրուկ քայլեր արեք: Բայց կա պետության օրակարգ, որը ենթադրում է ամենօրյա տարբեր աշխատանքներ: Այո, դատաիրավական համակարգում արագ բարեփոխում անելը առաջին հայացքից հաճելի կլներ, բայց տարբեր երկրների փորձը ցույց է տալիս, որ դա ամենարդյունավետ եղանակը չէ: Մյուս կողմից` երբ տեսնում ենք, որ իրավական կամ այլ ոլորտում սպասելիքները չեն արդարանում, այդտեղ արագ կադրային փոփոխություններ են լինում: Դատաիրավական ոլորտում ներդրվում է այն ճանապարհը, որը արդարադատության նախարարն է ընտրել: Մի բանում, սակայն, այս իշխանությանը չի կարելի մեղադրել. դա հետևողականությունն է: Մեր խոստացած բոլոր քայլերն իրականացնելու ենք, արագ, թե դանդաղ, որոշակի հիասթափության արժանանալով, թե առանց դրա, խնդիր չէ: Խնդիրը մինչև վերջ գնալն է: