Հանրապետության նախագահը հաղորդում տվող չէ. Է. Շարմազանով

դեկտեմբերի 11, 2017

-Պարոն Շարմազանով, սահամանդրական  փոփոխություններից առաջ  և հետո իշխանությունները հայտարարում էին, թե անցումը կառավարման խորհրդարանական համակարգին մեծացնելու է ընդդիմության դերակատարությունը: Կարծում եք՝  ոչ իշխանական ուժերի  դերակատարումն իսկապես մեծացե՞լ է:

- Սահմանադրությունն ընդդիմությանն այդ հնարավարությունը, լիազորությունները տալիս է, բայց հարց է՝  ընդդիմությունը արդյունավե՞տ է օգտագործում այդ հնարավորությունները, թե՞ ոչ: Կարծում եմ՝ սահմանադրական բարեփոխումներից հետո ականատես ենք ընդդիմության բավական ակտիվ աշխատանքի: Մենք ԱԺ կանոնակարգ օրենքով խմբակցություններին տվել ենք լսումներ անցկացնելու իրավունք: Դուք տեսաք, որ ընդդիմադիր փոքրաթիվ խմբակցությունը, չնայած այն հանգամանքին, որ իշխանությունը դեմ էր Հայաստանի՝ ԵԱՏՄ անդամակցությունը դադարեցնելու նախագծին, հնարավորություն ունեցավ  այդ թեմայով լսումներ անցկացնել, արտահերթ կարգով հարցն ընգրկել ԱԺ լիագումար նիստի օրակարգ, քննարկել այն: Ընդդիմությունը խորհրդարանում որևէ խնդիր չունի, ունի փոխնախագահ, որն իրավունք ունի արտահերթ ելույթ ունենալ: Կան օրենքներ, որոնք պետք է ընդունվեն 3/5-ով , և  ընդդիմության դերակատարումը դրանց ընդունման հարցում դառնում է առանցքային: Այսինքն՝ Սահմանադրությամբ և ԱԺ կանոնակարգ օրենքով ընդդիմությանը հնարավորություններ տրվել են  իր գործառույթներն իրականացնել:

-Մյուս կողմից էլ՝   ընդդիմությունը նախագծեր է ներկայացնում, որոնք օրակարգ չեն ընդգրկվում  կամ մերժվում են  քննարկվելուց հետո:

-Իսկ ո՞վ է ասել, որ ընդդիմության բոլոր նախագծերը պետք է ընդունվեն իշխանության կողմից, իսկ իշխանության նախագծերին ընդդիմությունը պետք է միայն կողմ քեվարկի:

Այդպե՞ս պետք է չլինի:

-Ոչ, իհարկե: Մենք խորհրդային համակարգում չենք ապրում, որ բոլորը միահամուռ այս կամ այն նախագծին կողմ կամ դեմ լինեն: Ի՞նչ է, Անգլիայի խորհրդարանում իշխանությունն ու ընդդիմությունը բյուջեին նույն կե՞րպ են քվեարկում: Հիմա  այնպես չէ, որ իշխանությունը հնարավորություն ունի իր կարծիքը ներկայացնել խորհրդարանում, իսկ ընդդիմությունը՝ ոչ: Ընդդիմությունն ունի վերահսկողություն իրականացնելու, լսումներ հրավիրելու, արտահերթ կարգով օրակարգում հարցեր ներառելու  հնարավորություն: Մի քանի տարի առաջ նման հնարավորություններ չուներ: Պարզապես ընդդիմությունը մեր երկրում միատարր չէ, մեկ կուսակցությունից չէ, և այդ պատճառով էլ մի հարցի շուրջ ունի տարբեր կարծիքներ:

Պարոն Շարմազանով, խորհրդարանն ընդունում է հիմնականում կառավարության ներկայացրած նախագծերը, ինչպես նախկին գումարումներում…

-Ես այստեղ որևէ արտառոց բան չեմ տեսնում, քանի որ կառավարությունն ու խորհրդարանական քաղաքական մեծամասնությունը նույնն կուսակցությունն են՝ Հանրապետական և ՀՅԴ: Այն նախագծերը, որոնք ներկայացնում է կառավարությունը, նաև քննարկվում են երկու կուսակցությունների բարձրագույն մարմիններում: Ցանկալի չէ կառավարության և քաղաքական մեծամասնության միջև արհեստական ջրբաժան մտցնել , նաև քաղաքական առումով անգրագետ է, որովհետև, ի վերջո, այդ կառավարությունը ձևավորում է պառլամենտը: Մենք նույն  քաղաքական թիմի տարբեր օղակներ ենք և իրականացնում ենք քաղաքականություն, որն ունի հստակ փիլիսոփայություն:

-Սերժ Սարգսյանն օրերս Դիլիջանում մի քանի ուշագրավ հայտարարություն  է արել: Նախ ասել է, թե մի քանի տարի հետո հասնելու ենք մեկ շնչի հաշվով 10 հազար դոլարին համարժեք ՀՆԱ-ի: Կա՞ն հիմքեր նման պնդում անելու համար:

-Ես միայն մի բան կարող եմ ասել՝ պարոն նախագահի ցանկացած հայտարարություն ունի ռեալ հիմքեր: Այսինքն՝ չի կարող երկրի նախագահը անել հայտարարություն՝ պահի ազդեցությամբ  կամ զգացմունքային գնահատականներից ելնելով: Բնականաբար, եթե պետության ղեկավարը նման հայտարարություն է անում, ուրեմն դրա համար կան հիմքեր: Ինչի՞ մասին է խոսքը:

-Սարգսյանը նույն ելությում մեկ այլ հայտարարություն էլ էր արել: Մասնավորապես, ասել էր, որ տեղական ինքնակառավարման համայնքների որոշ ղեկավարներ չարաշահում են իրենց պաշտոնը և այն օգտագործում  անհասկանալի և անընդունելի եկամուտներ ունենալու համար: Ընդդիմախոսները պնդում են, թե նախագահը ՏԻՄ ղեկավարների կողմից հանցագործության փաստեր է թաքցրել:

-Ես կարծում եմ, որ նման հայտարարությունները ոչ այլ ինչ են, քան դեմագոգիկ գնահատականներ, որոնք որևէ աղերս չունեն իրականության հետ: Պարոն նախագահի ելույթը շատ հստակ էր: Դա նշանակում է մի բան՝ պետք է ավելի արդյունավետ կառավարել, պետք է ոչ ոք արտոնյալ չլինի՝ անկախ կուսակցական պատկանելությունից: Հաշվի առնելով այն հանգամանքը, որ ՏԻՄ-երի առջև արդեն նոր մարտահրավերներ են՝ համայնքները խոշորացված են, լուծման ավելի գլոբալ խնդիրներ կան, դրանց  դիմագրավելու ավելի բարձր պատրաստակամություն, պարտաճանաչություն է անհրաժեշտ, դրա համար պարոն նախագահը հստակ խոսեց: Թող համոզված լինեն՝ բոլոր այն դեպքերում, երբ իրավապահ մարմինները կգտնեն օրենքի խախտում, բնականաբար կկատարեն իրենց գործառույթները: Իսկ այն գնահատականները, թե մինչ այժմ համայնքների ղեկավարներին  դա ներվել է ընտրություններում ձայներ հավաքելու համար, ոչ այլ ինչ են, քան հիմնազուրկ հայտարարություններ, որոնք ես կանվանեի պոպուլիստական:

-Հնարավոր համարո՞ւմ եք, որ նախագահի հայտարարությունը քննության հիմք դառնա:

-Ո՞վ է ասում, ես նման բան չասացի: Ես ասում եմ, որ իշխանությունը ոչնչով կաշկանդված չի եղել, ու այս ընթացքում էլ, եթե ուշադիր նայեն, կտեսնեն՝ և պետական պաշտոնյաներ, և համայնքապետեր եղել են, որոնք գործից ազատվել են ու նրանց նկատմամբ քրեական գործեր են հարուցվել: Նման բան ասվել է, որովհետև դրա տեղն էր, որովհետև յուրաքանչյուր ժամանակաշրջան ունի իր մարտահրավերները: Պարոն նախագահի ցանկացած հանձնարարական իշխանության բոլոր մարմինները՝ ինձնից մինչև հեռավոր համայնքի ղեկավար, պետք է ընդունի որպես հանձնարարական և իրականացնի:

-Պարոն Շարմազանով, բաց տեքստով Սերժ Սարգսյանն ասաց,  որ համայնքների ղեկավարներին  շատ բան ներվել է:

-Ի՞նչն է ներվել:

Ստացվում է՝ հանցագործությունը:

-Պարոն նախագահը չի ասել, թե  հանցագործությունը ներվել է:

-Խախտումը հանցագործությո՞ւն չէ:

Խախտումն ուրիշ է, խախտումը կարող է լինի աշխատանքային թերություն կամ անպարտաճանաչություն, որը քրեորեն պատժելի չէ: Դա աշխատանքային կարգապահական խնդիր է: Եվ խնդրում եմ պարոն նախագահի խոսքը չաղավաղել: Պարոն նախագահը իր խոսքում չի ասել՝ ներվել է հանցագործությունը:

-Հնչել է տեսակետ, որ այս ելույթը քրեական հանցագործության մասին հաղորդում է: Ի՞նչ կարծիքի եք:

-Ես կասեմ, որ հանրապետության նախագահը հաղորդում տվող չէ, այլ վերահսկողն է դատական, գործադիր և օրենսդիր մարմինների համակարգված աշխատանքի: Պետության գլուխն է: Նման գնահատական տվողը ոչ Սահմանադրություն է կարդացել, ոչ էլ տեղյակ է ՀՀ նախագահի իրավասություններին: