Հրապարակն այս իշխանության կյանքի աղբյուրն է․ Ա․Բաբաջանյան

հունվարի 10, 2021

Հարցազրույց ԱԺ անկախ պատգամավոր Արման Բաբաջանյանի հետ։

- Պարո՛ն Բաբաջանյան, Ձեզ համար ընդունելի՞ է արտահերթ խորհրդարանական ընտրությունների անցկացումը, որի մասին արդեն խոսել է վարչապետը:

- Ստեղծված իրավիճակը այլ ելք, քան արտահերթ ընտրությունները, չի ենթադրում: Բոլորս արձանագրում ենք, որ երկրում կա ճգնաժամ, վստահության դեֆիցիտ: Գիտենք նաև, որ 2 տարի առաջ ԱԺ մեծամասնությունը մանդատ ստացել է Նիկոլ Փաշինյանի վարկանիշի շնորհիվ: Հետևաբար, երբ մենք Նիկոլ Փաշինյանի վստահության հարցն ենք բարձրացնում, պիտի խոսենք ողջ թիմի վստահության մասին: Երբ պահանջում են Նիկոլ Փաշինյանի հրաժարականը, ես ասում եմ, որ ամբողջ թիմը պիտի գնա: Գալով ընդդիմությանը, որի մի մասնիկն էլ ես եմ, ասում եմ՝ մենք այստեղ չէինք լինի անհատապես, ու «Բարգավաճ Հայաստանը» և «Լուսավոր Հայաստանը»՝ որպես խմբակցություններ, եթե տեղի չունենային հեղափոխական գործընթացները, եթե այդ ուժերը չողջունեին հեղափոխությունը:

Իմ մասով ես կարող եմ վկայել, որ մենք որոշ առումով նախընտրական քարոզարշավը կառուցել ենք հեղափոխական գործընթացներին աջակցելու հանձնառությամբ: Ընտրողներն ասում էին՝ գիտենք, որ դուք իշխող ուժի աջակիցն եք, դրա համար պատրաստ ենք մեր ձայնը ձեզ տալ, որ փակվի դուռն այն ուժերի առջև, որոնք չեն աջակցում հեղափոխությանը: Երբ ունենք իշխանություն՝ ամբողջությամբ ձևավորված մեկ մարդու հաշվին, և ընդդիմություն, որն աջակցել է Նիկոլ Փաշինյանի հեղափոխությանը, որքանո՞վ է բարոյական կամ քաղաքական, որ այս խորհրդարանն ընտրի մեկին, որը չի ողջունել հեղափոխությունը:

- Վազգեն Մանուկյանի՞ն նկատի ունեք:

- Վազգեն Մանուկյանը երևացող մասն է: Կա չերևացող մասը` նախկին իշխանությունները` Ռոբերտ Քոչարյան, Սերժ Սարգսյան, Կարեն Կարապետյան: Ով ասես: Այս ԱԺ-ն հեղափոխության արդյունք է: Ես կարծում եմ, որ նոր ընտրությւունները պետք է լինեն նոր իրողությունների արդյունքը:

- Իսկ այդ 16-17 կուսակցությունները իսկապե՞ս գործում են Ռուսաստանի ազդեցությամբ:

- Անկեղծորեն՝ մտածում եմ, որ ոչ, բայց նրանք մշտապես ունեն ՌԴ-ի հովանավորությունն ու աջակցությունը ստանալու անհագ ցանկություն: Կա նաև իշխանության հետ մրցելու մարմաջ, թե ով ռուսներին ավելի շատ ինքնիշխանություն կտա: Սա միմյանց արժանի իշխանության և ընդդիմության պայքար է: Եվ դեռ հարց է՝ այդ հրապարակն օգնո՞ւմ է Նիկոլ Փաշինյանին շարունակել պաշտոնավարել, թե՞ խանգարում: Կարծում եմ՝ այդ հրապարակն այս իշխանության կյանքի աղբյուրն է:

- Քաղաքական ուժերի հետ հանդիպումների շրջանակում հանդիպեցին Նիկոլ Փաշինյանն ու ԲՀԿ ղեկավար Գագիկ Ծառուկյանը: Նրանց թիմակիցները անխնա քննադատում են միմյանց, այդ թվում՝ իրենց առաջնորդներին, «Իմ քայլը» Գագիկ Ծառուկյանին զրկել էր անձեռնմխելիությունից, Նաիրա Զոհրաբյանին` հանձնաժողովի նախագահի լիազորություններից, ԲՀԿ-ականների նկատմամբ քրեական գործեր էին հարուցվել, ու այս ֆոնին այդ հանդիպումը արդյո՞ք անսպասելի, զարմանալի չէր:

- Գիտեք, ես տեսել եմ նաև 2018թ. հոկտեմբերի 2-ը, երբ ԲՀԿ-ական նախարարները փողոցում կայացված որոշումներով դուրս էին շպրտվում իրենց աշխատասենյակներից, բայց դրանից հետո հուշագիր ստորագրվեց, ցեմենտի ու այլ հարցերի շուրջ համագործակցության նշաններ եղան: Իսկ հիմա ասում եմ, այս ԱԺ-ն արդեն լեգիտիմ չէ, քանի որ պատերազմից և ստորագրված հայտարարությունից հետո վստահության ճգնաժամ կա: Եվ եթե հարցը Նիկոլ Փաշինյանին է վերաբերում, ուրեմն, վերաբերում է նաև այս քաղաքական ինստիտուտին: Ես հասկանում եմ, որ ընդդիմության անունից հանդես եկող ուժերը չեն էլ պատկերացնում, որ կկարողանան ընտրություններով հայտնվել ԱԺ-ում և որոշում կայացնելու իրավունք ստանալ, դրա համար էլ ժողովրդին անվանարկելու և ժողովրդից կախված չլինելու փուլ է սկսվել:

Ինչ վերաբերում է ԲՀԿ-ին ու Գ.Ծառուկյանին, ապա իրականում վերջինս այս գործընթացներից ամենաշատը կորցնելու բան ունի` կապիտալ: Եթե երկիրը գնաց ընտրությունների, նա լրջագույն խնդիրներ է ունենալու` հաշվի առնելով հարկերի և 2017թ. ընտրություններում ընտրակաշառք բաժանելու վերաբերյալ քրեական գործերը: Ես ևս մեկ խնդիր եմ տեսնում՝ արդյո՞ք կարող է կրկնվել 2018թ. հուշագիրը: Կարծում եմ՝ հեղափոխության արժեքների համար վերջին 20 տարում պայքարած ուժերի միավորման անհրաժեշտություն կա: Դրանց մեջ կարող են նաև լինել «Իմ քայլի» նվիրյալներ: Հեղափոխության ժամանակ հնչած շատ կոչեր իրականում տասնամյակների պահանջ են եղել: Պատահական չէր, որ շատ գործիչներ և ուժեր, որոնք հրապարակում էին ու ոչ թե հարթակում, նաև իրենց պայքարի արդյունքն էին այդտեղ տեսնում` սկսած 1998-ից:

- Իսկ ինչպե՞ս եք գնահատում Նաիրա Զոհրաբյանին Մարդու իրավունքների և հանրային հարցերի մշտական հանձնաժողովի նախագահի լիազորություններից զրկելու որոշումը:

- Դա ինձ համար օրակարգային չէր, հարկատուները մեզ դրա համար չեն ուղարկելԱԺ: Տարեվերջին հաշտության, համերաշխության օրակարգ քննարկելու փոխարեն գնացինք այսպիսի մերժողական, իրավիճակն ավելի աղետալի դարձնող լուծումների: Չեմ կարծում, որ Նաիրա Զոհրաբյանի ֆեյսբուքյան գրառումները, որոնք դրված էին այդ քայլի հիմքում, մեր մթնոլորտն ավելի վատն էին դարձրել, կամ եթե դրանք չլինեին, մեր քաղաքական միջավայրն ավելի լավը կլիներ: Նույն ԲՀԿ-ից շատ ավելի վատ հայտարարություններ են արվել: Այդ հարցը պետք է դառնար էթիկայի հանձնաժողովի քննարկման առարկա, բայց հանձնաժողով ստեղծելու նախաձեռնությամբ ոչ ոք հանդես չեկավ, որովհետև ընդհանուր անգործությունը, անհոգությունն ու անկյալությունը շատ բնորոշ են իշխող խմբակցությանը: Մինչդեռ այսօր այստեղ չափազանց էական է ժողովրդավարության պաշտպանությունը, և դրա համար պետք է ներդրվեն կարևոր մեխանիզմներ:

- Ընտրական օրենսգրքի փոփոխությո՞ւնը նկատի ունեք:

- Ավելի շուտ` դատական իշխանությունը: Այս վիճակից վեթինգն էլ արդեն չի փրկի: Պետք է լյուստրացիա տեղի ունենա, վեր հանվեն բանդիտական աշխարհի ու գործակալական ցանցերի հետ դատական համակարգի ներկայացուցիչների հանցավոր կապերը, որպեսզի իմանանք, թե այդ ոլորտն ում է ծառայում:

- Դատական համակարգի անկախությա՞ն, թե՞ այլ բանի դրսևորում է, որ երկրի ղեկավարի նկատմամբ մահափորձ կազմակերպելու մեջ կասկածվող անձանց նկատմամբ դատարանը կալանք չի սահմանում:

- Կարծում եմ՝ դա ԲԴԽ նախագահ Ռուբեն Վարդազարյանի՝ նոյեմբերի 15-ի ընդգծված քաղաքական հայտարարության հետևանքն էր, որից հետո նա արդեն պետք է քրեական պատժի ենթարկված լիներ: Հրապարակում ուղղակի ռազմական հեղաշրջման կոչերով հանդես եկողներին դատարանն ազատ է արձակում: Սա ուղերձ է գործող իշխանությանը և քաղաքական սուբյեկտներին, որ դատական համակարգն աջակցում է պետական ահաբեկչությանը: Սա աննախադեպ երևույթ է աշխարհում: Ըստ էության՝ նոր Հոկտեմբերի 27-ի հող է պատրաստվում: Եթե ՀՀ-ն ունենար գործունակ արդարադատության նախարար, կտրուկ քայլեր պետք է արվեին: Ես հաստատ կարող եմ ասել, որ մեր միջազգային գործընկերն այդ հարցում ՀՀ իշխանության հետ կլինեն: Դու չես կարող ընտրությունների գնալ առանց առողջացնելու դատական համակարգը:

Մենք պետք է նաև ընտրակաշառքի դեմն առնելու համար ստեղծենք գործունակ համակարգեր: Տեսնում եք, թե ցույցերին մարդ ապահովելու համար ինչպիսի ֆինանսական ներարկումներ են արվում: Բազմաթիվ ահազանգեր անձամբ եմ ստացել: Այո, պետք է փոխվի նաև ԸՕ-ն: Ես ունեմ իմ ճանապարհային քարտեզը, որը ներկայացրել եմ համապատասխան մարմիններին, բայց դեռ պատասխան չունեմ: