Հակասահմանադրական ճանաչելը չի նշանակում, որ հոդված գոյություն չունի․ Ն․ Բաղդասարյան

մարտի 29, 2021

Հարցազրույց ԱԺ «Իմ քայլը» խմբակցության պատգամավոր Նիկոլայ Բաղդասարյանի հետ

-Պարո՛ն Բաղդասարյան, Ռոբերտ Քոչարյանի գործով Սահմանադրական դատարանը որոշեց հակասահմանադրական ճանաչել ՀՀ քրեական օրենսգրքի 300.1 հոդվածը (սահմանադրական կարգը բռնի տապալելը): Ինչպե՞ս եք մեկնաբանում այդ որոշումը:

-Ես չեմ կարող գնահատել Սահմանադրական դատարանի որոշումը: Միաժամանակ, մինչև չծանոթանանք ՍԴ որոշման բովանդակությանը, չենք կարող ասել՝ այդ որոշումը ազդեցություն կունենա՞ Ձեր հիշատակած անձի դեպքում, թե ոչ:

-Այսինքն՝ կարծում եք, որ Ռոբերտ Քոչարյանի նկատմամբ առաջադրված մեղադրանքի և հարուցված քրեական գործի հանգամանքների վրա չի՞ կարող ազդել ՍԴ որոշումը:

-Ես նման բան չեմ կարող մտածել, մինչև որոշումն ամբողջությամբ չհրապարակվի: Առանց ՍԴ որոշումը ընթերցելու, չեմ կարող այդ հարցին պատասխանել, որովհետև ՍԴ որոշումը կարող է ազդել Քոչարյանի գործի վրա, կարող է չազդել:

-Քոչարյանի պաշտպանական կողմը պնդում է, որ քրեական գործը պետք է կարճվի:

-Ես չգիտեմ՝ որտեղ է պաշտպանական կողմը ծանոթացել այդ որոշման հետ, քանի որ այն չի հրապարակվել: Որոշումը մինչև չհրապարակվի, հնարավոր չէ դատողություններ անել: Ասում են՝ եթե հակսահմանադրական է, պետք է կարճել, բայց ես էլ ասում եմ՝ որպեսզի դա լինի, պետք է ՍԴ-ն այդ մասին գրած լինի, բայց այդ գրածին մենք չենք ծանոթացել, ինչո՞ւ են ժամանակից շուտ հայտարարություններ անում: Օրինակ՝ Սահմանադրական դատարանը կարող է այդ հոդվածը ճանաչել հակասահմանադրական, քանի որ պատիժը համաչափ չէ, և այդ դեպքում, եթե գործը դատաքննության փուլում է, ապա դրա վրա ՍԴ որոշումը ազդեցություն չի ունենա: Իսկ եթե այդ հոդվածով անձն արդեն դատապարտված է, և պատժի համաչափության հարց բարձրացվի, ուրեմն, ՍԴ որոշումը այդ անձի վրա կազդի:

Սա առաջին դեպքը չէ: Ես զարմանում եմ, որ լրագրողները Ռոբերտ Քոչարյանի գործի վրա են կենտրոնացել: Շատ է պատահել, որ հոդվածները հակասահմանադրական են ճանաչվել, այնուհետև Ազգային ժողովը հակասահմանադրականության հետ կապված խնդիրը ուղղել է, և որևէ հարց չի եղել: Այսինքն, եթե հոդվածը ճանաչվում է հակասահմանադրական, դա չի նշանակում, որ այդ հոդվածն այլևս գոյություն չունի: Դա նշանակում է, որ պատճառաբանական մասի հիմնավորմամբ է այն ճանաչվել հակասահմանադրական, և, հնարավոր է, տեսականորեն հետևանքներ չառաջանան: Բայց հնարավոր է նաև, որ առաջանան: Մինչև որոշման բովանդակությանը չծանոթանանք, հստակ բան ասել չենք կարող:

-Այդ դեպքում, ըստ Ձեզ, ինչո՞ւ է պաշտպանական կողմը հայտարարում, որ ՍԴ որոշման հիման վրա քրեական գործը պետք է կարճվի:

-Չեմ կարող նրանց փոխարեն պատասխանել, բայց հիշեցնեմ, որ նույն իրավիճակն ունեինք, երբ Ռոբերտ Քոչարյանի դիմումի հիման վրա ՍԴ-ն հակասահմանադրական ճանաչեց 35-րդ հոդվածի այն մասը, որը վերաբերում է անձեռնմխելիությանը. դրանից Ռոբերտ Քոչարյանի գործում հո բան չփոխվե՞ց: Ազգային ժողովը ընդամենը քայլեր ձեռնարկեց, խնդիրը լուծվեց, և նոր նախագիծը ընդունելիս հարցը լուծում ստացավ:

-Ձեզ համար անակնկա՞լ էր նման որոշումը:

-Դե, դատարանը, հավանաբար, իր որոշման հիմքում կոնկրետ իրավական հիմնավորումներ է դրել: Հնարավոր չէ պատասխանել Ձեր հարցին, եթե չես կարդացել փաստաթուղթը: Կարող է փաստաթուղթը կարդանք, պաշտպանները ճիշտ լինեն:

-Ընտրական օրենսգրքի մասին մեկ հարց՝ Դուք, այսպես կոչված, ռեյտինգային ընտրակարգով եք պատգամավոր ընտրվել, և վարչապետը հայտարարեց, որ կողմ են ամբողջությամբ համամասնական ընտրակարգով ընտրությունների անցկացմանը: Ի՞նչ եք մտածում այդ մասին:

-Ես մինչև վարչապետի հայտարարելն ասել էի, որ անհրաժեշտ է ռեյտինգային համակարգը հանել Ընտրական օրենսգրքից, քանի որ ինձ վրա եմ զգացել դրա անօգտակարությունը: Դա այն համակարգն է, որտեղ մրցում ես քո կուսակցության անդամների հետ: Դա նորմալ չէ, այսինքն, պետք է ապացուցեմ, որ ես ավելի լավ պատգամավոր կլինեմ, քան մեր կուսակցության որևէ այլ անդամ՝ ներկայացնելով նույն ծրագրերը: Ստացվում է՝ նույն ծրագիրը պետք է իրականացնենք, ու ես պետք է հիմնավորեմ, որ ավելի լավ կանեմ դա, բայց իրականում այդ ծրագիրը կուսակցությունը, քաղաքական թիմն է իրականացնում: Ռեյտինգային ընտրակարգը խնդիր էր քաղաքական գործընթացների համար, և շատ լավ է, որ այն հանվում է:

-Քննարկումները՝ թե ովքեր կլինեն ընտրական ցուցակներում, արդեն սկսվել են: Ձեր մասով ի՞նչ որոշում կա, մասնակցելո՞ւ եք ընտրական պայքարին:

-Ես չեմ այդ որոշում կայացնողը, որոշում կայացնում է կուսակցության վարչությունը: Վարչությունը քննարկում, պատգամավորի թեկնածուներին առաջարկում է ընդգրկվել ցուցակ ու առաջարկում է նաև ցուցակում տեղը: Ես ազդեցություն չունեմ այդ գործընթացի վրա: Եթե գնահատվեմ իմ թիմի կողմից և առաջարկություն ստանամ, այդ ժամանակ կմտածեմ, կասեմ: Կարծում եմ՝ յուրաքանչյուր գործող պատգամավոր կսպասի առաջարկին:

-Օրինակ՝ ի՞նչ սկզբունքով են Ձեզ գնահատելու, ինչի՞ հիման վրա է գնահատում վարչությունը:

-Նրանց փոխարեն չեմ կարող պատասխանել, բայց ինձ թվում է՝ անցած ճանապարհն են հաշվի առնում, կենսագրությունը, կատարված աշխատանքը: Տարբեր չափանիշներ կան:

-Բայց Դուք դեմ չե՞ք նորից լինել պատգամավոր:

-Չէ, դե, բնական է: