Ունեմ համամասնական ցուցակում ընդգրկվելու առաջարկներ․ Ա․ Գրիգորյան

ապրիլի 8, 2021

Հարցազրույց ԱԺ խմբակցություններում չընդգրկված պատգամավոր Աննա Գրիգորյանի հետ

-Տիկի՛ն Գրիգորյան, կարողացա՞ք աշխատել խորհրդարանում՝ որևէ խմբակցությունում ընդգրկված չլինելով:

-Բարդ շրջանում եմ ես հայտնվել խորհրդարանում, և շատ կարճ ժամանակ է անցել դրանից հետո, բայց մի քանի բան հստակ արվել է. գործընկերներիս հետ նախաձեռնել ենք գերիների վերադարձը խոչընդոտելու մասին Ադրբեջանի քաղաքականությունը դատապարտող հայտարարության նախագիծ, որը խորհրդարանն ընդունեց միաձայն, ստեղծել ենք «Արցախ» նախաձեռնությունը, որի շրջանակում սերտ համագործակցության տարբեր ֆորմատներ ենք պլանավորել՝ Արցախի ձայնը ավելի լսելի դարձնելու համար: Շրջանառության մեջ ենք դրել սահմանամերձ բնակավայրերին լրացուցիչ արտոնություններ տրամադրելու մասին օրենքի նախագիծ: Շուտով շրջանառության մեջ կդնենք Արցախին վերաբերող մի փաստաթուղթ, որը հստակ գնահատական կտա օկուպացիային: Ինքս բարձրաձայնել ու հետամուտ եմ լինելու Մեղրիի Նռնաձորի համայնքապատկան հողատարածքների վերադարձման հարցի լուծմանը: Այդ տարածքները տրամադրվել էին Արդարադատության նախարարությանը՝ քրեակատարողական հիմնարկ կառուցելու համար, հիմա մտադիր ենք դրանք վերադարձնել գյուղացուն: Ես հիմնականում բարձրացնում եմ Սյունիքի և պատերազմից հետո առաջացած խնդիրներ:

-Ձեր նշած օրենսդրական նախաձեռնություններին մեծամասնության վերաբերմունքը ինչպիսի՞ն է. ի վերջո, նրանց ձայնը վճռորոշ է դրանք ընդունելու համար:

-Գոնե մեկ նախաձեռնություն՝ գերիների վերադարձը խոչընդոտելու՝ Ադրբեջանի քաղաքականությունը դատապարտելու վերաբերյալ, միաձայն է ընդունվել: Մեզ հետ շատ սերտ համագործակցում էր «Իմ քայլը» խմբակցության պատգամավոր Վլադիմիր Վարդանյանը, որի առանձին դիտարկումներ ևս ներառվել են հայտարարության տեքստում: Այսինքն՝ կան հարցեր, որոնք պետք է վերքաղաքական լինեն: Իսկ «Արցախ» նախաձեռնության մասով մեր գործընկերների ոգևորությունը չեմ նկատել, բայց եթե լայն քննարկումներ կազմակերպենք, նրանք էլ, թերևս, միանան:

Անկախները» վերջերս վիրավորվել էին, որ կառավարությունը Ազգային ժողովում չէր պատասխանել խմբակցություններում չընդգրկված պատգամավորների հարցերին և խորհուրդ էր տվել դիմել գրավոր: Դուք դրանից նեղսրտած չե՞ք:

-Հարցը պետք չէ անձնական, զգացմունքային հարթությունում  դիտարկել: Կառավարությունը պատասխանում է ժողովրդի ընտրած պատգամավորների հարցերին: Չպատասխանելը անարգանք է ինստիտուտի, հետևաբար, ժողովրդի նկատմամբ, որովհետև ժողովրդի համար կարևոր հարցերն են հնչում Ազգային ժողովում, և ոչ թե սեփական փիար է արվում: Ամեն դեպքում, ես կառավարության չպատասխանելուց չեմ կաշկանդվել, մենք շարունակելու ենք նույն ոգով:

-Նոր Ընտրական օրենսգրքով առաջիկա արտահերթ ընտրությունները կայանալու են համամասնական ընտրակարգով: Դուք, որպես վարկանշայինով խորհրդարան եկած պատգամավոր, ինչպե՞ս եք վերաբերվում 100 տոկոս համամասնականին:

-Ես կարծում եմ, որ մեծամասնականը արատավոր երևույթներ առաջ բերած համակարգ էր: Բայց 2018 թվականին մեծամասնական ընտրակարգով խորհրդարան եկան շատ նորմալ մարդիկ, որոնք չէին ընտրվել քրեական հեղինակությունների օգնությամբ, մեծ ֆինանսներ գեներացնելով: Նրանց ժողովուրդը ցանկացել է տեսնել խորհրդարանում: Արատավոր բարքեր 2018-ի ընտրություններում չեն եղել: Ինչ վերաբերում է առաջիկա ընտրություններում համամասնական ցուցակներին՝ ես ունեմ մտավախություն, որ համամասնությունը դրանցում չի պահպանվելու, մարզերը ներգրավված չեն լինելու, և խորհրդարանը դառնալու է երևանյան ակումբ: Ես կողմ էի, որ հիսուն տոկոսը գոնե մեծամասնական լիներ:

-Կարծում եք՝ անհատ պատգամավորը ավելի լա՞վ կներկայացներ մարզային խնդիրները:

-Վստահ եմ: Որքան էլ հայտարարվի, թե խթանում են գաղափարական պայքարը, մեր ժողովուրդը անձերի հետևից է գնում: Եթե տեսել է մարդը կարողանում է հարց լուծել, ձայնը նրան կտա: Հատկապես մարզերում, մարդիկ ուզում են դեմքով ճանաչել նրան, ում կարող են գրել իրենց խնդրի մասին, կարող են զանգել, ձայնը տալ, բայց և պատասխանատվության կանչել նրան:

-Դուք ունե՞ք որևէ ուժի ցուցակում ընդգրկվելու առաջարկ:

-Այո, ցուցակում ընդգրկվելու առաջարկներ ունեմ: Բայց քանի որ իրավական առումով գործընթացը չի սկսվել՝ վարչապետը հրաժարական չի տվել, խորհրդարանը չի լուծարվել և պաշտոնապես չի նշանակվել ընտրությունների օր, դեռ վաղ է այդ առաջարկների մասին հայտարարելը:

-Հնարավո՞ր է՝ սյունեցիների նորաստեղծ կուսակցության հետ մասնակցեք ընտրություններին:

-Վաղ է դեռ այդ մասին խոսելը:

-Դուք Սյունիքից եք և խորհրդարան եկաք, երբ մարզում սահմանային հարցեր էին լուծվում: Այն ժամանակ, նաև հիմա հայտարարվում է, որ իշխանությունը պատրաստվում է Սյունիքը հանձնել թշնամուն: Կա՞ն հիմքեր նման հայտարարությունների համար, թե՞ շահարկումներ են:

-Մարդիկ մտահոգվելու իրավունք ունեն, որովհետև նոյեմբերի 9-ի փաստաթղթով զորքերը պիտի մնային այնտեղ, որտեղ ստորագրման պահին կանգնած էին: Բայց դեկտեմբերի 18-ին Սյունիքի անվտանգության գոտին զիջվեց: Այդ օրվանից գրեթե ամեն օր զիջումներ են եղել Խնձորեսկում, Շուռնուխում: Մենք ունենք հողեր, որոնց շարունակությունն արդեն ադրբեջանցուն է պատկանում, և գյուղացին չի կարողանում մինչև վերջին սանտիմետրը մշակել դրանք, որովհետև անվտանգության երաշխիքներ չկան: Հիմա այդ հողերը հանձնե՞լ ենք, թե՞ չենք հանձնել:

-Իշխանությունն ասում է՝ հարցը մինչև վերջ լուծված չէ, դեմարկացիա է լինելու հատուկ ստեղծվող հանձնաժողովի միջոցով:

-Խոսքը՝ հարցը վերջնական լուծված չէ, նշանակում է, որ նրանք կարող են էլի առաջ գալ: Չեմ բացառում նաև, որ դիրքային փոփոխությունը հօգուտ մեզ լինի, բայց միայն այն, որ դեռ որևէ հստակություն չկա, շատ վատ է:

-Նորաստեղծ կուսակցություններից մեկում ընդգրկվել են Սյունիքի շատ համայնքների ղեկավարներ, և նրանք իշխանությանը դեմ են: Կա տեսակետ, որ փորձ է արվում ստեղծել ավտոնոմ տարածք: Ի՞նչ կասեք այդ մասին:

-Այդ համայնքների ղեկավարներին միավորել է իրենց համայնքի ճակատագիրը: Գորիսի քաղաքապետը կարո՞ղ է մտահոգություններ բարձրացնել, երբ նրա համայնքից հողեր են զիջվում թշնամուն, նույնը՝ Նռնաձորի, Կապանի դեպքում, որի բոլոր բարձունքները զիջվել են թշնամուն, ու Կապանը թշնամու ափի մեջ է հայտնվել: Համայնքների ղեկավարները համախմբված են եղել, որովհետև մարդիկ իրենց մաշկի վրա զգացել են սպառնալիքը, և պատասխանատու լինելով իրենց ընտրած ժողովրդի առջև, դիմել են այդ քայլին: Անկանխատեսելի էր՝ Նիկոլ Փաշինյանի մնալով յուրաքանչյուր օրվա հետ մենք նոր կորուստներ կունենա՞նք, թե՞ չէ: Ինչ վերաբերում է ավտոնոմ տարածք ստեղծելու մասին խոսակցություններին, դա շատ վտանգավոր գաղափար է, նույնիսկ հնչեցնելն է վտանգավոր: Ուղղակի Սյունիքը առավել հստակ է տեսնում՝ ինչ է կատարվում: Սյունեցին շատ լավ է հասկանում իրավիճակը:

-Ըստ հարցումների՝ այս իշխանությանը հանրության 30 տոկոսը աջակցում է: Ձեր նշած անվտանգային խնդիրների պարագայում ձայների այս քանակը տարօրինակ չէ՞:

-Ես այդ հարցումներին չեմ վստահում, որովհետև ինքս տարբեր քննարկումներ եմ ունենում հենց Սյունիքում և տեսնում եմ մարդկանց տրամադրվածությունը: Իշխանության և ընդդիմության ամենամեծ խնդիրն այն էր, որ այս ամիսներին չկարողացան ժողովրդին ներկայացնել արհավիրքի իրական մասշտաբը:

Երբ Սյունիքում մենք խոսում ենք խնդիրներից, շատերը Երևանում կամ ավելի հյուսիսում հստակ չեն պատկերացնում հարցի լրջությունը, մտածում են՝ քաղաքական շահարկումներ են:

Կապան գնալիս դու ստիպված ես անցնել ադրբեջանական տարածքով, սահմանապահը կանգնեցնում և զգուշացնում է այդ մասին: Նույնը՝ Կապանից հետ գալիս. սա է իրականությունը: Ամբողջ միջավայրը փոխվել է: Նիկոլ Փաշինյանը դեռ աջակցություն ունի, քանի որ շեշտը դնում է նախկինների վրա: Մարդկանց մեջ ֆոբիա կա. մտածում են՝ Նիկոլ Փաշինյանը հեռանա, գալու են նախկինները, իսկ նախկիններն այս երկիրը տապալել են: Մինչդեռ հենց այս իշխանության ժամանակ մենք հայրենիք կորցրեցինք: Ես նաև ընդդիմությանն եմ մեղադրում, որ այդպես էլ ժողովրդի հետ չկարողացավ խոսել, ներկայացնել արհավիրքը:

-Բայց ընդդիմությունը օրերով փակեց ճանապարհներ, ցույցեր էր անում, այժմ էլ մարզային այցեր են սկսել:

-Այո, բայց չստացվեց, որովհետև ժողովուրդը նաև նրանց շատ չի վստահում: Նրանց հնչեցրած մտքերը իրականության ռեֆլեքսիան էին, բայց մարդիկ դրանք ավելի շատ ընկալում են որպես քաղաքական շահարկում: