Խորհրդրանական պետության վարչապետը ինքնըստինքյան սուպեր է. Վ. Բաղդասարյան

փետրվարի 8, 2018

Հարցազրույց ԱԺ ՀՀԿ խմբակցության ղեկավար Վահրամ Բաղդասարյանի հետ: 

-Պարոն Բաղդասարյան, «Ելք»-ը նախաձեռնեց ԱԺ արտահերթ նիստ՝ Հարկային օրենսգրքում փոփոխություններ կատարելու նպատակով, և «Ծառուկյան» խմբակցությունը միացավ նրանց։ Ո՞րն է ՀՀԿ-ի դիրքորոշումը:

-Արտահերթ նիստ նախաձեռնողները մոտեցել են ինձ, պայմանավորվել ենք, որ փոփոխությունների նախագիծը կուղարկեն։ Դա ստանալուց հետո խմբակցության նիստում կքննարկենք և որոշում կկայացնենք։

-Հնարավո՞ր է՝ ՀՀԿ խմբակցությունը, քվորում չապահովելու նպատակով, որոշի պարզապես չներկայանալ նիստին։

-Եթե լինելու են այն հարցերը, որոնք մենք գնաճը կանխելու թեմայով լսումների ժամանակ արդեն պարզաբանել ենք, ապա դա ուղղակի շոուի է վերածվելու։ Եթե կլինեն կարևոր հարցեր, ինչպիսիք, օրինակ, ես և Խոսրով Հարությունյանը ներկայացրել էինք Հարկային օրենսգրքի փոփոխությունների նախագծում՝ ավելացված արժեքի ու տրանսպորտային միջոցների համար դիզվառելիքի հետ կապված, ուրիշ բան: Դրանք մենք սկզբունքային էինք համարում, նախագիծը ընդունվեց ու հրատապության կարգով երկրորդ ընթերցումն էլ կանցնի։ Եթե կլինեն այնպիսի առաջարկություններ, որ մենք զգանք՝ իրոք քննարկման կարիք ունեն, մենք այդպիսի քննարկմանը դեմ չենք: Ես միանձնյա չեմ կարող որևէ բան ասել, պետք է քննարկենք, և հետո կորոշվի՝ մասնակցելո՞ւ ենք արտահերթ նիստին, թե՞ ոչ։

-Խորհրդարանում վարկանիշային ընտրակարգը վերացնելու շուրջ քննարկումներ են սկսվել: ՀՅԴ-ն հայտարարում է, որ դեմ է, նույնն է ասում նաև «Ծառուկյան» խմբակցությունը: ՀՀԿ-ի մոտեցումը ո՞րն է:

-Ռեյտինգային ընտրակարգի հարցում Դաշնակցությունը ի սկզբանե կատեգորիկ դիրքորոշում է ունեցել. կողմնակից են 100 տոկոսանոց համամասնական ընտրակարգին։ Դա եղել է իրենց քաղաքական դիրքորոշումը և մինչև այսօր պահպանվում է։ Մենք կողմնակից ենք, որ այդ անցումը կատարվի ներդաշնակ, և ավելի շատ տեղ ենք հատկացնում մեծամասնական ընտրակարգին, որովհետև նորանկախ պետություն ենք, ու ժողովրդավարության քայլեր կատարող երկիրը պետք է ադապտացվի նոր քաղաքական համակարգին։ Մենք փոփոխություններ կատարեցինք, ու տարիների ընթացքում աստիճանաբար հրաժարվեցինք մեծամասնական համակարգից։ Երբ որոշում կայացվեց, որ պետք է անցնենք խորհրդարանական կառավարման, մենք քննարկում ունեցանք մեր դաշնակցական գործընկերների հետ, և նրանք եկան այն համոզման, որ այս անցումային շրջանում ավելի արդյունավետ կարող է լինել այն համակարգը, որով գնացինք ընտրության։ Դրանից հետո քաղաքական զարգացումները բերում են նոր պահանջներ։ Մինչև 2022 թվականը մենք ունենք ժամանակ։ Որևէ առաջարկություն չենք հրաժարվում քննարկել։ Մինչև ընտրությունները մենք Ընտրական օրենսգրքին անդրադառնալու ենք, և, բնականաբար, կքննարկենք այդ հարցերը։

-Վարկանիշային ընտրակարգից հրաժարվելու քաղաքական որոշում այս պահին չկա՞։

-Ոչ, ոչ։ Ընդ որում՝ ես ասեմ, որ նման քաղաքական որոշումները չեն կայացնում խմբակցությունները, կառավարությունը։ Դա կուսակցությունն է որոշում։ Ու ինձ թվում է՝ մենք պետք է ճշտենք կուսակցության դիրքորոշումը այդ հարցում։

-Վերջերս մի քանի օրինագծեր դրվեցին քննարկման և հատկապես շատ քննադատության արժանացավ այն փոփոխությունը, որի համաձայն ուժային մի շարք կառույցներ՝ ոստիկանությունը, ԱԱԾ-ն, ՊՊԾ-ն անցնում են վարչապետի ենթակայության ներքո: Ավելին, այդ նախաձեռնությունը որակվեց «սուպերվարչապետական» համակարգի ներդրում։ Ի՞նչ եք կարծում, կա՞ նման միտում։

-Ի՞նչ է նշանակում «սուպերվարչապետություն»։ Դուք կարող եք ամբողջ աշխարհի խորհրդարանական պետությունների փորձը վերցնել, նայել: Դրանք Սահմանադրությունից բխող վարչապետի լիազորություններ են և հատուկ են բոլոր երկրներին։ Յուրաքանչյուրը՝ նախագահը, վարչապետը, Ազգային ժողովը պետք է բխեն Սահմանադրությունից բխող իրենց լիազորությունները։ Շատ նորմալ երևույթ է։ Խորհրդարանական պետության վարչապետը ինքնըստինքյան սուպեր է, որովհետև ունի բավականին լիազորություններ։ Այդ ամենը բխում է Սահմանադրությունից։

-Քննադատության թիրախ դարձավ նաև «Կառավարության կառուցվածքի և գործունեության» մասին օրինագծի այն դրույթը, համաձայն որի կառավարության նիստերը պետք է դռնփակ անցկացվեն:

-Դա շատ վաղուց հասունացած միտք էր, որովհետև կառավարությունը իշխանության թիմի մասն է: Քննարկումների ընթացքում հաճախ նրանք ունենում են տարբեր կարծիքներ ու ներկա գտնվող լրատվամիջոցների պատճառով խուսափում են բանավեճից: Եթե ուզում ենք, որ ազատ քննարկում, ազատ բանավեճ լինի, ես կոնստրուկտիվ եմ համարում, որ կառավարության նիստերը լինեն դռնփակ, ու մարդիկ կարողանան իրենց կարծիքն ազատ արտահայտել և վիճաբանության արդյունքում գալ ընդհանուր հայտարարի։

-Հրապարակայնության խնդիր այստեղ չե՞ք տեսնում։

-Հարցի հրապարակայնությունը Ազգային ժողովն է ապահովում։ Ցանկացած նախագիծ, որը քննարկվում է կառավարությունում, հետո բացվում է ԱԺ-ի մշտական հանձնաժողովներում, այնուհետև՝ լիագումար նիստում։ Ավելի նպատակահարմար է, որ կառավարությունում այդ հարցի բացումը արհեստական չլինի։ Այսինքն, եթե վարչապետը մի բան է ասում է, թիմը պետք է կարողանա ազատ քննարկել այն, ու այդ քննարկման ընթացքում կարող են հակադարձել միմյանց։ Իսկ երբ լրագրողները տեսնեն այդ ամենը, պետք է ասեն՝ թիմում պառակտում կա, մեկը մյուսին նկատողություն արեց և այլն։ Փակ նիստի ժամանակ մարդիկ ազատ են լինում: Ես կարող եմ օրինակ բերել մեր կուսակցության գործադիր մարմնի փակ նիստերը, որտեղ ազատ, անկաշկանդ բոլորը իրենց կարծիքն արտահայտում են։ Նույնն է նաև խմբակցության նիստը։