Ես չեմ կարող այս ընդդիմությանը լուրջ վերաբերվել․ Ռուստամ Բաքոյան

սեպտեմբերի 26, 2021

Հարցազրույց ԱԺ «Քաղաքացիական պայմանագիր» խմբակցության պատգամավոր Ռուստամ Բաքոյանի հետ։

-«Վարչատարածքային բաժանման մասին» օրենքի փոփոխությունների նախագիծը՝ կից փաթեթով, ընդունվեց միայն իշխանական խմբակցության կողմ ձայներով։ Ընդդիմությունը չմասնակցեց քվեարկությանը, և դարձյալ համաձայնություն չեղավ կարևոր նախագծի շուրջ։ Այս վիճակը Ձեզ չի՞ մտահոգում։

-Իհարկե, ոչ։

-Ինչո՞ւ։

-Իսկ ինչո՞ւ պետք է մտահոգի։

-Գոնե այն առումով, որ խորհրդարանում դարձյալ համաձայնություն չեղավ։

-8-րդ գումարման խորհրդարանում ասեք օրենքի մի նախագիծ, որ ընդդիմությունը կողմ է քվեարկել։ Չեք գտնի, չէ՞, նման նախագիծ։ Բա ինչի՞ պիտի անհանգստանամ կամ մտահոգվեմ, ընդդիմությունը ի՞նչ է արել, որ մի հատ էլ սպասեմ՝ կողմ քվեարկի։

-Դուք Ձեր ելույթում ասացիք, որ Հայաստանը երբեք այսքան բարձր մակարդակի ժողովրդավարություն չի ունեցել, բայց մյուս կողմից օրենքներն ընդունվւմ է միայն խորհրդարանական մեծամասնությունը։ Արդյո՞ք դա ժողովրդավարության ցուցիչ է։

-Երբ ընդդիմությունը բոյկոտում, դուրս է գալիս, կարո՞ղ է մեր խմբակցությունից մի քանի պատգամավորով գնանք, նստենք նրանց տեղերը ու քվեարկենք, է՞լ ինչ անենք։ Խնդրում եմ, մի նախագիծ ցույց տվեք, որի քննարկմանը այդ ընդդիմությունը կառուցողական վարքագիծ է դրսևորել, կողմ է քվեարկել։ Առհասարակ չեն էլ քվեարկել, ես չեմ կարող այդ ընդդիմությանը լուրջ վերաբերվել։ Ասեք՝ ո՞նց լուրջ վերաբերվեմ այդ ընդդիմությանը։ Դուք, որպես լրագրող, ո՞նց եք այդ ընդդիմությանը լուրջ վերաբերվում։

-Ի դեպ, ընդդիմությունը, մասնավորապես, «Հայաստան» դաշինքը հայտարարել է փողոցային պայքարի մեկնարկի մասին․․․

-Ընդդիմությունը վաղուց իրեն սպառել է, իրեն մաշեցրել է, իրենք իրենց շատ են մաշեցրել, հետևաբար, ինչ ուզում են, թող անեն։ Տարբեր ժամանակներում տարբեր հայտարարություններ են արել, հիմա էլ ինչ ուզում են, թող անեն։

-Դուք այդ օրենքին, որով նախատեսվում է 441 համայնքներ միավորել ու դարձնել 37 խոշորացված համայնք, կողմ էիք հատկապես որպես եզդիական համայնքի պատգամավոր։ Բայց ասորական համայնքից դեմ կարծիքներ հնչեցին քննարկման ժամանակ․․․

-Ոչ, դա ամենևին էլ ասորական համայնքի դիրքորոշում չէր, դա Դիմիտրով համայնքն էր, որտեղ բնակչության 14 տոկոսը զտարյուն ասորիներ են, իսկ միակողմանի ասորիները՝ շուրջ 30 տոկոսը։ Եկեք սա արձանագրենք։

-Արձանագրեցինք, բայց միևնույն է, նրանք ասում էին, որ համայնքի խոշորացումը կվտանգի իրենց ինքնության պահպանմանը։ Ինչպե՞ս եք դրան վերաբերվում։

-Շատ անլուրջ եմ վերաբերվում նման հայտարարություններին։ Անլուրջ եմ վերաբերվում նաև ասորական համայնքի ներկայացուցչի պահվածքին, որը խորհրդարանում քննարկումը կիսատ թողնելով՝ լքեց դահլիճը։ Այդ նախագծի ընդդիմախոսները լուրջ հիմնավորումներ չէին ներկայացնում, եթե խոսքը իքս նախագծի մասին է, նրանք խոսում են իգրեկից։

Լուրջ ոչ մի հիմնավորում չկա ընդդիմություն կոչվածի հայտարարությունների մեջ, նրանք էլ են կողմ համայնքների խոշորացմանը, հարցրեք իրենց։ Բայց չէ, մի հատ պոչ են բռնել ու ամբողջ ֆոնը դրա տակ են ներկայացնում՝ ցույց տալով, թե որքան վատ նախագիծ է։

Անհանգստանալու ոչինչ չունենք։ Ես շատ ցավում եմ և մտահոգվում եմ, որ մենք եզդիական երկու համայնք ունենք, որոնք չեն խոշորացել և արդարացիորեն չեն խոշորացել, որովհետև հենց եզդիական գյուղեր են։ Բայց կարծում եմ, որ կառավարությունը այլ առաջարկներ ու լուծումներ կգտնի, որ այդ գյուղերը կարողանան խոշորացված համայնքների հետ հավասարզարգանալ։