Արթուր Վանեցյանի հետ ունեմ ջերմ հարաբերություններ․ Թ․ Թովմասյան

մայիսի 28, 2021

Հարցազրույց Աժ պատգամավոր Թագուհի Թովմասյանի հետ

- Տիկի՛ն Թովմասյան, Դուք նույնպես մասնակցում էիք մայիսի 27-ին ԱԺ-ում անցկացված հանդիպմանը՝ Արտաքին գործերի և Պաշտպանության նախարարությունների ներկայացուցիչների հետ: Քննարկվում էր մեր երկրի սահմաններին տիրող վիճակը, Ադրբեջանի կողմից վեց հայ զինվորների գերեվարությունից հետո: Ձեզ ինչպիս՞ի իրավիճակ ներկայացրեցին:

- Մենք գտնվում ենք խիստ պայթյունավտանգ իրավիճակում: Ամեն պահ անկանխատեսելի է: Եվ մենք պետք է հաշվենք ռիսկերը: Ես, օրինակ, կարևորեցի մեր կազմակերպվածության ու ինքնակազմակերպվածության հարցը: Պատերազմի 44 օրվա ընթացքում ես արձանագրել էի բազմաթիվ խնդիրներ: Այդ խնդիրներն արձանագրել էր նաև Հայաստանի ցանկացած քաղաքացի: Մենք իրավունք չունենք կրկնելու անկազմակերպվածության նույն սխալները:

- Գերեվարության դեպքն ինչի՞ հետևանք էր: Նիկոլ Փաշինյանն ասաց, մեր զինվորներն ականապատում էին մեր տարածքը, և ադրբեջանցիներն առգրավել են նրանց:

- Շատ վատ է, որ ականապատման մասին ընդհանրապես խոսք է գնում: Նրանք կատարում էին մարտական հանձնարարություն և իրականացնում էին ինժեներական աշխատանքներ: Եվ այդ գործողությունների ժամանակ հակառակորդն ավելի մեծ թվով է եկել ու մեր վեց տղաներին գերեվարել: Գերեվարե՞լ, թե՞ առևանգել, սա արդեն իրավական խնդիր է, որովհետև եթե առևանգումը նշանակում է, որ նրանք մտել են մեր տարածքն ու մարդ են գողացել, ամեն դեպքում վարչապետն այդպես է ասում: Իսկ գերեվարել կլիներ, եթե մեր տղաները մտած լինեին նրանց տարածքները:

- Դա՞ էլ անկազմակերպվածության հետևանք էր:

- Ես այս դեպքն այդպես չէի բնութագրի, բայց ընդհանուր առաջնագծում կան անկազմակերպվածության տարբեր դրսևորումներ:

- Իսկ խոսք գնա՞ց մեր երկրում ռազմական դրություն հաստատելու մասին, կա՞ նման իրավճակ:

- Նման նպատակադրվածություն չկա: Բայց անհրաժեշտությունն, իհարկե, կա, որովհետև մայիսի 12-ից Ադրբեջանը ներխուժել է մեր ինքնիշխան տարածք, ու խախտվել է մեր սահմանների անձեռնմխելիությունը: Ռազմական դրություն հաստատելու համար սրանից ավելի մեծ առիթ չի կարող լինել: Ես հասկանում եմ, որ եթե դու իրավական առումով հայտարարում ես ռազմական դրություն, ուրեմն, պիտի գործողություններ սկսես, իսկ մենք դեռ նման գործողություններ չենք նախաձեռնում` գերադասելով խնդիրն առայժմ կարգավորել բանակցային դաշտում:

- Աջակցություն ստանալու համար Հայաստանը դիմել է ՀԱՊԿ-ին, բայց այնտեղ դեռ կոնսուլտացիաներ են գնում: Դուք ինչպե՞ս եք գնահատում ՀԱՊԿ-ի այդ գործելաոճը:

- Ես ունեմ իմ մշտական անփոփոխ տեսակետը. մենք ինքներս պետք է մեզ պաշտպանենք, հետո նոր ուրիշներից պաշտպանություն ակնկալենք: Եթե մեր սահմանները կահավորված չէին, եթե մեր սահմաններին զինվորներ չկային, և թշնամին անարգել մտել է մեր տարածք, նշանակում է, ինքներս մեզ լավ չենք պաշտպանել: Եվ ուրիշների վրա «մունաթ» գալուց առաջ պետք է երևույթներին ինքնաքննադատաբար մոտենալ: Ինչ վերաբերում է հարցին, թե ՀԱՊԿ-ը մեզ պիտի արձագանքեր, նորից ասում եմ՝ նախ պետք է մենք մեզ պաշտպանեինք, այլապես միշտ ինչ-որ մեկը մեղավոր է:

- Քանի որ փոքր երկրները միայնակ չեն կարող դիմագրավել արտաքին մարտահրավերներին, անդամակցում են որևէ միջազգային կառույցի: Եվ այդ նկատառումներով ՀՀ-ն համաձայնել է անդամակցել ՀԱՊԿ-ին, ու այդ կառույցը պարտավորություն է ստանձնել աջակցել ՀՀ-ին: Եվ դա փոխադարձ է: Հակառակ պարագայում ինչո՞ւ էինք անդամակցում

- Ոչ միայն ՀԱՊԿ-ը, այլև ՌԴ-ի հետ փոխօգնության պայմանագիր ունենք: Եվ այդ ամենը հաշվի առնելով է, որ հրազենով կամ ծանր տեխնիկայի գործադրմամբ սահմանային միջադեպեր չեն գրանցվում:

- Բայց չասեցիք՝ ՀԱՊԿ-ի արձագանքից բավարարվա՞ծ եք, թե՞ ոչ:

- Քանի դեռ գործողություններ չեմ տեսել, չեմ կարող բավարարված լինել:

- Դուք «Պատիվ ունեմ» դաշինքում առաջադրվել եք «Հայրենիք» կուսակցության կողմից, բայց ենթադրվում էր, թե ՀՀԿ-ն կառաջադրի: Ձեզ համար տարբերություն չկա՞ր, թե որ կուսակցությունը կառաջադրեր:

- Տարբերությունը շատ մեծ է, բայց ես չեմ ուզում խոսել ընտրությունների մասին, ես ուզում եմ խոսել մեր երկրի լինելիության և ոչ թե մեր քաղաքական ապագայի մասին: Իսկ «Հայրենիք» կուսակցության ղեկավար Արթուր Վանեցյանի հետ ես ունեմ մարդկային ու քաղաքական ջերմ հարաբերություններ: Եվ մենք այնտեղ շատ ունենք նախկին հեղափոխականներ:

- Էլ ովքե՞ր կան Արթուր Վանեցյանից ու Ձեզանից բացի:

- Ցուցակում և ոչ միայն ցուցակում նախկին թիմից Արթուր Վանեցյանի կողքին կարող եք գտնել այլ մարդկանց:

- Արթուր Վանեցյանի հետ ջերմ հարաբերություններ ունեիք մինչև հեղափոխությունը, հետո դա շարունակվեց գործող իշխանության հետ, հետո իշխանությունից դուրս. այո՞:

- Այո:

- Բայց լրագրողն ի՞նչ առնչություն կարող էր ունենալ ԱԱԾ պաշտոնյայի հետ:

- Իսկ լրագրողին ո՞վ է արգելում որևէ մեկի հետ հարաբերություն ունենալ:

- Ոչ մեկը:

- Ուրեմն, պետք չէ տարակուսել:

- Իսկ «Պատիվ ունեմ» դաշինքում ի՞նչն էր Ձեզ հոգեհարազատ, որ անդամակցեցիք:

- Մենք ունենք հետհեղափոխական իրավիճակներ, մենք ունեցել ենք այլ պատկերացումներ: Պատկերացրել ենք, որ հեղափոխական Հայաստանում պետք է այլ գործողություններ իրականացվեն, բայց գործող իշխանությունը շեղվել է հեղափոխական արժեքներից, ու մենք պետք է ապահովենք շարունակությունը: