Չեմ զարմանա, եթե մի օր ընդդիմադիրները հայտարարեն՝ քարով ոստիկանին հարվածելը հայկական անհնազանդության տեսակ է․ Սիսակ Գաբրիելյան

հունիսի 13, 2022

Հարցազրույց՝ ԱԺ «Քաղաքացիական պայմանագիր» խմբակցության պատգամավոր Սիսակ Գաբրիելյանի հետ:

-Օրերս ԱԺ 3 ընդդիմադիր պատգամավորներ ներխուժեցին առողջապահության նախարարություն, նախարարի ուղղությամբ զոհված զինծառայողների նկարներ նետեցին, ամոթանք տվեցին: Ի՞նչ կարծիք ունեք տեղի ունեցածի վերաբերյալ։

-Ես բավական ազդվել եմ այդ կադրերից։ Սկզբից տպավորություն էր, թե այլ բան են նետում, բայց հետո պատգամավորը ոտքով կանգնեց նկարների վրա և ցուցադրեց, տգեղ տեսարան էր: Իրենք տեսնում են, թե ինչպես են իրենց վարքին արձագանքում մեր քաղաքացիները, հենց իրենց համակիրներից շատերը: Հուրախություն մեզ՝ նրանց այս և նման մյուս քայլերը հենց իրենց համակիրների քննադատությանն են արժանանում: Պատգամավորի անձեռնմխելությունը չպետք է նույնականացվի լկտիության հետ: Եթե պատգամավոր ես, դա չի նշանակում, որ քո ուզած ժամանակ քո ուզած ձևով կարող ես ներխուժել որևէ աշխատասենյակ: Կա քաղաքակիրթ տարբերակ, եթե բան ունես ասելու այդ մարդուն, կարող ես գալ խորհրդարան և հանրության առաջ այդ բոլոր հարցերը տալ: Նրանք նշում են, որ սա Անահիտ Ավանեսյանի անձնական տարածքը չէ, սա կառավարության շենքն է։ Ես էլ պատգամավոր եմ, հիմա գնամ ոտքով հարվածելով ներխուժեմ ԱԺ փոխնախագահ Իշխան Սաղաթելյանի աշխատասենյա՞կ, սա պատգամավորի անձեռնմխելիության հետ կապ չունեցող, իրենք ոտնահարում և արհամարհում են պատգամավորի անձեռնմխելիության ինստիտուտը: Նրանք զրոյացնումեն հենց իրենց՝ պատգամավորի մանդատը:

Ի վերջո, անհասկանալի է՝ ի՞նչ «հերոսություն» է Անահիտ Ավանեսյանի աշխատասենյակ ներխուժելը։ Նա և մյուս նախարարներն այս ընթացքում երբևէ առիթ չեն տվել ընդդիմությանը՝ իրենց հարցի պատասխանն ստանալու համար սենյակ ներխուժելու։ Արդեն մի քանի քառօրյա՝ մենք ենք մեր ընդդիմադիր գործընկերներին ասում, որ, ի տարբերություն ձեր հեռախոսային լայվերի կամ ֆեյսբուքյան էջերի, ԱԺ-ում կա ուղիղ հեռարձակում, որի դիտելիությունը քսան անգամ շատ է, և դուք կարող եք ամենասուր հարցերը տալ․ այնպես չէ, որ տիկին Ավանեսյանը երբևէ վախեցել կամ խուսափել է ընդդիմադիրների հարցերից:

-Իսկ ի՞նչ կարծիք ունեք այդ օրը շենքի ներսում ոստիկանների գործողությունների վերաբերյալ։

-Իմ անձնական կարծիքով՝ մենք այդտեղ էլ ունենք որոշակի խնդիրներ: Ես ավելի քան վստահ եմ, որ տիկին Ավանեսյանը չի փորձել խոչընդոտել, ավելին՝ կասկածներ ունեմ, որ գուցե հենց տիկին Ավանեսյանն է խնդրել ոստիկանությանը, որ որևէկերպ չխոչընդոտեն ընդդիմադիրների գործողություններին: Մենք գործ ունենք պետական կառույցների հետ, և նույն ոստիկանը պետք է շատ լավ հասկանա, որ դա պետք է կանխել: Այո, պատգամավորը, ըստ ԱԺ կանոնակարգի, սեղմ ժամկետներում ընդունելության իրավունք ունի նախարարի մոտ, բայց ներխուժելը, վազելով մտելը և լայվ անելը որևէ օրենքում սահմանված չէ:

-ՊՊԾ պետ Սարգիս Հովհաննիսյանի դեմ գործի հարուցումը մերժվել է, ըստ ՔԿ-ի՝ լրագրողների գործունեությունը եղել է ոչ օրինաչափ: Չե՞ք կարծում, որ գոնե մեկ անգամ պետք էր քրգործ հարուցել լրագրողների նկատմամբ բռնության դեպքով:

-Չկարողացա մտաբերել, թե որ դեպքի մասին է խոսքը, բայց ընդհանուր կարող եմ ասել, որ ՊՊԾ պետ կլինի, պատգամավոր կլինի, թե մեկ այլ քաղաքացի, ոչ իրավաչափ գործողությունը դատապարտելի է, հատկապես, եթե դա դրսևորվում է բռնության կամ բռնության սպառնալիքի ձևով: Մեր ընդդիմադիր գործընկերները, եթե դժգոհություն ունեն իրավապահ համակարգից՝ քրեական գործերի ընթացքի կամ քրգործեր չհարուցելու հետ կապված, թող գան ԱԺ: Վերջերս ՀՀ գլխավոր դատախազը ԱԺ-ում էր,և մեր ընդդիմադիր գործընկերները, փոխանակ իրենց հարցերը ուղղեին նրան, նախընտրել էին նարդի խաղալ կամ փողոցում մարմնամարզությամբ զբաղվել: Իրենց փոխարեն ես չեմ ցանկանում առաջամարտիկ դառնալ: Ես ասում եմ, որ ոչ իրավաչափ գործունեությունըընդունելի չէ։ Եթե առաջիկայում ընդդիմությունն այդ հարցը չբարձրացնի, ես ամենամոտ առիթի դեպքում խոստանում եմ հարցը բարձրաձայնել,և հանրությունը այդ հրապարակային պատասխանը կստանա: Դա կլինի գլխավոր դատախազի հետ հարցուպատասխանի ընթացքում կամ իրավապահ կառույցի ներկայացուցիչների մասնակցությամբ որևէ քննարկման ժամանակ: Ես դա կանեմ մեր ընդդիմության փոխարեն, եթե ընդդիմությունը չի անում:

-Շատերը, անդրադառնալով հունիսի 3-ի դեպքերին, համեմատում են գործող իշխանությանը նախկինների հետ՝ ասելով, որ երբ իշխանությանը վտանգ է սպառնում, ինչպես ՀՀԿ-ն, այս իշխանությունն էլ է կենտրոնացնում ոստիկանական ողջ ռեսուրսը:

-Կլինի ՀՀԿ, ՔՊ թե մեկ այլ իշխանություն, կան հստակ օրենքներ և հակաիրավական արարքը հակաիրավական է ցանկացած իշխանության ժամանակ: Ես կարող եմ հունիսի 3-ի միջադեպի հետ կապված կադրեր ցուցադրել, թե ինչպես է մի քաղաքացիմուրճով հարվածում ոստիկանին, և օգնության շտապող մյուս ոստիկանը նույնպես հարվածներ է ստանում: Հիմա ուզում եմ հասկանալ, սա որևէ կերպ ընդդիմադիրների պատկերացմամբ տեղավորվո՞ւմ է խաղաղ անհնազանդության բողոքի գործողությունների շրջանակում: Երբ Հայաստանը պատմության մեջ առաջին անգամ արբանյակ է ուղարկում տիեզերք, ևորոշ ընդդիմադիր գործընկերներ դա ներկայացնում են որպես իրենց տեղաշարժը վերահսկելու իշխանության մտադրություն, ես, թերևս, այլևս չեմ զարմանում։ Չեմ զարմանա նաև, եթե մի օր ընդդիմադիր որոշ գործընկերներ հայտարարեն, որ, այո՜, սա հայկական անհնազանդության տեսակ է՝ քարերով, մետաղական իրերով հարվածել ոստիկաններին: Ոստիկանությունը հայտարարեց, որ երբ եղել է բախումը,և իրենք ստացել են հարվածներ, կիրառել են լուսաձայնային նռնակներ՝ օդում, այսինքն, քաղաքացիներից հնարավորինս անվտանգ հեռավորության վրա։ Թե ինչ էին ուզում անել որոշ ընդդիմադիրներ հունիսի 3-ի երեկոյան խորհրդարան գալով՝ ակնհայտ է: Երբ ընդդիմադիր պատգամավորը հայտարարում է՝ կանայք ու երեխաները մի կողմ քաշվեն, մենք հիմա պետք է առաջանանք, դա, կարծում եմ՝ հստակ ազդակ է, որ այստեղ ինչ-որ բան տեղի է ունենալու: Եթե 5-6 կմ նույն այդ կանանց ու երեխաներով միասին քայլելով, երգելով, վանկարկումներով հասել ես մի կետի ու հայտարարում ես, որ չպետք է փակ փողոցներ լինեն,և թող կանայք ու երեխաները մի կող քաշվեն, դա հիմնավոր կասկած է ինձ համար, որ այդ հատվածից սկսած՝ այլևս չէին նախատեսվում խաղաղ բողոքի գործողություններ: Փողոցի այդ հատվածում առկա են տեսախցիկներ, և քրեական գործի շրջանակում մենք նորանոր կադրեր կտեսնենք։ Ուղիղ հեռարձակումների կադրերից էլ էր ակնհայտ, որ ոստիկանները իրենց համար կանգնած էին, երբ սկզբից պլաստմասե շշեր էին նետում, հետո, նախակրթարանի ներքևի հատվածում, որտեղ հողային հատված է, քարեր, ցանկապատի կտորներ կան, արդեն սկսում են մետաղական իրերով, քարերով հարվածել ոստիկաններին: Երբ քարով ու մետաղներով հարվածում են ոստիկաններին, ի՞նչ են ուզում ասել: Ասենք հարվածեցիք, 200 ոստիկանի էլ ծանր վնասվածք հասցրիք և անցաք էդ փողոցով, հետո՞: Տրամաբանություն չկա այդ գործողության մեջ: Ասում են՝ իշխող ուժի պատգամավորները վախեցան գալ: Երբ ընդդիմադիր պատգամավորները սրճարանում նստած էին և միայնակ էին թողել ցուցարարներին, երբ հայտարարում էին, որ իշխանությունը վախեցել է և չի եկել խորհրդարան, լիագումար նիստերի դահլիճից ընդամենը 7-10 մետր հեռավորության վրա, 334 սենյակում, ՔՊ-ի պատգամավորները մարզպետների, Երևանի քաղաքապետի, ուժային կառույցների ներկայացուցիչների մասնակցությամբ անցկացնում էին բյուջեի կատարողականի հերթական քննարկումը։ Որևէ մեկս խորհրդարանից փախչելու կամ խուսափելու նպատակ չի ունեցել։

-«Երկիր մեդիա» հեռուստաընկերությամբ ցուցադրվում է Գոռ Վարդանյանի սերիալներից մեկը, որտեղ եղել են Հայ առաքելական եկեղեցուն ծաղրող դրվագներ, ինչը Դուք անթույլատրելի եք համարել, հատկապես, որ ՀԸ-ն էլ պատկանում է ՀՅԴ-ին։ Մինչդեռ 2018-ից ի վեր ձեր իշխանության ևՀԱԵ-ի միջև անթաքույց լարվածություն կա։ Ինչպե՞ս հասկանալ Ձեր հայտարարությունը:

-Ես համաձայն չեմ, որ իշխանության և հոգևորականության, առավել ևս Հայ առաքելական եկեղեցու միջև կա անջրպետ կամ, ընդդիմության սիրած խոսքով, ջրբաժան: Չկա այդպիսի բան: Երբմեր միջազգային գործընկերներն այստեղ են լինում, մենք երբեմն նաև կազմակերպում ենք այցելություն մեր եկեղեցիներ, հանդիպում հոգևորականների հետ: Բյուջեի կատարողականի ժամանակ ես ասացի, որ չեմ ուզում հեռուստաընկերության անձնակազմի վերաբերյալ որևէ կարծիք հայտնել, իմ խոսքն ավելի շատ ուղղված էր այն քաղաքական ուժին, որն այսօր ուղիղ կապ ունի տվյալ հեռուստաընկերության հետ։ Այդ քաղաքական ուժը չորս տարի հասարակությանը խաբում է։ Հայտարարում է, որ ՔՊ-ն, որը կառավարող ուժ է երկրում, եկել է, որ այլասերում տարածի, եկեղեցին վարկաբեկի, ոտնահարի մեր ազգային արժեքները։ Ուրեմն, հարց է առաջանում՝ այդ քաղաքական ուժը նորմա՞լ է համարում, որ իր հեռուստաընկերությամբ պարզապես ծաղրի են ենթարկում մեր Հայ առաքելական եկեղեցու քիրստոնեական սուրբ արժեքները։

-Բայց Հայ առաքելական եկեղեցու սպասավորներն աջակցում են այսօրվա ընդդիմությանը:

-Երբ ես տեսա, թե սերիալում ինչ ծաղր կա քրիստոնեության հասցեին, սպասում էի, որ առաջինը մեր եկեղեցին հրատապ կարձագանքի։ Միաժամանակ կամ կարճ ժամանակ անց պետք է արձագանք լիներ նաև այդ քաղաքական ուժից։ Եկեղեցին եթե արձագանքեր, Հեռուստատեսության և ռադիոյի հանձնաժողովի անելիքը ավելի կկարևորվեր։ Սա ոչ այնքան դասական օրենքի կամ էթիկայի խախտումէ, որքան ծաղր մեր քրիստոնեական արժեքների նկատմամբ։